《艾莉菲斯物語》（異世界穿越）: 第二十三章、緊急救援
今章鏡頭又返返去阿夢嗰邊，之前講到死靈法師阿夢同七聖賢之一嘅影喺死亡沼澤正面臨龍王瑪爾艾路嘅月龍吐息，命懸一線！我之前已經唔小心劇透咗佢哋會得救，我哋一齊嚟睇吓佢哋點樣脫險啦！
喺千鈞一髮之際，月龍吐息嘅銀白色光芒即將吞噬阿夢同影嘅一刻，兩個人突然傳送咗去佢哋隔籬！其中一人迅速舉起木杖，杖頭嘅白色寶石散發出一陣耀眼嘅金光，佢施放出聖職系最高階魔法——加爾安娜絲聖域。一道金色光幕喺阿夢同影面前升起，聖域散發出溫暖嘅力量，硬生生擋住咗月龍吐息嘅毀滅性攻擊！吐息擊中聖域，發出「轟」嘅一聲巨響，濃霧被衝散，地面嘅泥沼被熱力蒸發，但聖域紋絲不動，保護住四人。
龍王瑪爾艾路見到來者，血紅色雙眼閃過一絲忌憚，佢低吼一聲，緩緩落地。來者正係兩位七聖賢：聖職系公會會長、職業神喻者嘅甘霖，同埋傳送佢哋兩個入來嘅法師系最強戰力、魔導士莫耶。
甘霖一身白色長袍，銀白長髮同長鬚喺濃霧中飄動，佢嘅眼神溫和而慈祥；莫耶則穿住一條深藍色長袍，袍上繡滿銀色符文，雖然係男性，但留有一把及腰黑色長髮，長髮令佢散發出一種獨特嘅氣質，眼神銳利，散發出一陣強大嘅魔力波動。
甘霖望住龍王，慈祥咁講：「瑪爾艾路，今日就此為止啦。你一個對四個，已經冇勝算。」
莫耶喺一邊加咗一句，語氣帶有一絲冷笑：「更何況你用完月龍吐息，魔力都見底啦。」
龍王瑪爾艾路低吼一聲，血紅色雙眼掃視咗四人一圈，佢知道自己再打落去真係冇勝算，尤其係甘霖同莫耶嘅出現，佢完全唔想同呢兩個七聖賢交手。佢拍咗拍巨翼，識趣咁向沼澤更深處走去，巨大嘅身軀喺濃霧中漸漸消失，只留低一聲：「哼……」
影望住龍王離開，綠色眼睛毫無波動，佢平淡咁轉向甘霖同莫耶，微微低頭講：「多謝甘霖大人、莫耶大人救命之恩。」阿夢喺一邊完全冇講嘢，佢嘅深紫色眼睛望住濃霧，表情冷淡得像冰。
甘霖走近阿夢，溫柔咁將佢抱住，慈祥咁安撫：「夢仔，冇事啦，你做咩咁傻？」阿夢第一次有咗反應，佢嘅眼神終於閃過一絲情緒，兩行眼淚無聲咁流咗落來，但佢好快就推開咗甘霖，冷漠咁講：「我有必須完成嘅使命。」
莫耶喺一邊用傳送術，藍色光芒一閃，將四人都傳送返安全地方——迷夢城。迷夢城嘅街道同馬利安城好唔同，充滿住濃厚嘅魔法氣息，建築物都係用晶石同魔法符文裝飾，空氣中瀰漫住一陣淡淡嘅魔力波動。
四人出現在城中心嘅廣場，莫耶收起傳送術嘅光芒，銳利嘅眼神望向阿夢，質疑講：「阿夢，你要龍王嘅核心，到底有咩用意？」
阿夢完全唔出聲，佢低頭抹乾咗眼淚，深紫色眼睛回復咗冷漠，彷彿剛剛嘅脆弱從未存在過。
甘霖喺一邊輕聲講：「莫耶，唔使逼佢。老夫已經睇到夢仔嘅內心係善良嘅。」
係呀，讀者們，你哋可能唔記得，甘霖喺第七章幫樂希轉職時講過，佢有能力一眼睇穿人心，所以佢知道阿夢嘅本質。
甘霖溫柔咁望住阿夢，講：「夢仔，唔好太勉強自己。如果有咩需要幫手，老夫同其他聖賢會幫你。」
阿夢抬頭望咗甘霖同莫耶一眼，深紫色眼睛毫無波動，佢冇講任何嘢，自己轉身走咗，背影喺迷夢城嘅街道上顯得好孤單。
莫耶望住阿夢離開，轉頭責備影：「影，你亂咁嚟做咩？龍王唔係咁易打嘅！」他嘅語氣帶有一絲激動，講：「差一秒，你同阿夢就死啦！」（莫耶其實係擔心佢哋，但佢唔識表達，佢嘅性格就係咁硬邦邦。）
影低咗頭，平淡咁講：「對唔住，莫耶大人。」
甘霖喺一邊打圓場，笑住講：「算啦，莫耶。起碼影有派分身通知我哋，我哋先及時趕到。」
莫耶聽完，哼咗一聲，但語氣軟咗啲，講：「下次唔好咁亂來！」
甘霖笑住講：「好啦，老夫請你哋去迷夢餐廳食啲嘢，今日都攰啦。」
呢個時候，馬莉娜娜突然用小女孩嘅幻象出現，佢笑嘻嘻咁講：「甘霖大人請食飯？我又去！」
莫耶瞇咗瞇眼，冷笑講：「幻象唔使食嘢架喎。」他一揮手，施展一招現身術，一陣藍色光芒閃過，馬莉娜娜嘅小女孩幻象瞬間被打破。
然後莫耶再用虛靈之手，將一個二十出頭嘅少女用從後面不遠處捉咗過嚟，少女有一頭金色長髮，穿住一條紫色長裙，五官精緻但帶有一絲狡黠，佢掙扎咗一下，講：「喂呀，莫耶！你咁樣我冇哂神秘感啦！」
甘霖喺一邊笑咗笑，講：「呵呵，呢度得影未見過你真身啫。」
影望咗馬莉娜娜一眼，平淡咁講：「而家見過啦。」
跟住佢哋四個——甘霖、莫耶、影同馬莉娜娜，就一齊去咗迷夢餐廳。迷夢餐廳係迷夢城最出名嘅食肆，店面用晶石同魔法符文裝飾，入面嘅燈光係用魔法浮空燈，散發出一陣溫暖嘅藍光，氣氛好舒適。佢哋四人坐低，點咗幾款招牌菜，例如燉雪精靈湯、燒魔聖羊肉、魔法生物什錦炒飯同星輝果甜湯，邊食邊傾計。
甘霖一邊飲星輝果甜湯，一邊問：「艾莉絲陛下同亞當係咪出咗去做任務？」
讀者們，你哋可能又唔記得，艾莉絲係艾莉菲斯女國王，七聖賢之一，職業聖騎士，統治王都聖水城；亞當亦係七聖賢之一，職業狂戰士，曾單挑傳說級魔物冥燈龍，喺第九章講過佢曾經同阿夢交手打成平手。
莫耶放低咗湯匙，閉上眼施放感知術，一陣藍色魔力波動從佢身上散開，佢感知咗一陣，隨後睜開眼講：「佢哋喺爾尼斯森林，好似同傳說級魔物馬奧斯打緊。」
馬莉娜娜咬咗一口燒魔聖羊肉，歪咗歪頭，講：「區區一隻傳說級魔物，點解佢哋要特登一齊出去打？」
莫耶冷淡咁回應：「馬奧斯唔同，佢好似智力好高，想組織魔物大軍進攻王都。」
甘霖點咗點頭，慈祥咁講：「喔，咁嘅確值得出去討伐。」
馬莉娜娜即刻舉手，興奮咁講：「叫埋我嘛！我都想打！」
莫耶瞇咗佢一眼：「佢兩個夠哂打啦，使鬼你。」
「唓！」馬莉娜娜不滿咁嘟起個嘴。
「係咪都係冇加莉安娜嘅消息？」甘霖又問。
莫耶搖咗搖頭：「我嘅感知術都搵唔到佢。一係佢已經死咗，一係佢隱藏咗自己。」
「呵呵，佢點會死咗。」甘霖笑說。
「的確，加莉安娜條友戰力好高，連莫耶你都打唔贏。」馬莉娜娜邊講邊推咗推莫耶。
「平手啫。何況我哋打嗰陣，兩邊都冇用全力。」莫耶哼咗一聲。
「老夫希望快啲見返加莉安娜，呵呵，好耐冇見過佢。」甘霖笑住講。
好啦又係我同讀者解說嘅時間，加莉安娜係七聖賢之一，應該得佢未介紹過，佢職業係巫師，睇落係三十幾歲普通女人，但真實年齡不祥，相傳已經過百歲，佢份人好神秘。佢已經失蹤咗一段時間，冇人見過佢。女國王艾莉絲對加莉安娜嘅評價係：精通幾乎所有毀滅性法術，又精通所有最可怕嘅詛咒術，係冇人敢得罪嘅天才。
好啦，下章繼續。Bye！