《艾莉菲斯物語》（異世界穿越）: 第二十四章、初戰樹妖

今章我哋又返返嚟睇星光小隊呢邊，佢哋更新咗裝備之後，準備接一個新任務，繼續冒險！

星光小隊休息夠後，第二朝一早喺光影旅館食完早餐，就一齊去咗馬利安城冒險者公會接任務。喺公會嘅告示板前，永誠望住一堆任務單話：「我哋而家有洛希娜幫手，又換咗新裝備，不如試吓接個難少少嘅任務啦！」洛希娜點頭，講：「好呀！我覺得我哋隊伍而家配合得好啲，可以試吓挑戰高啲難度。」曉峰推咗推眼鏡，低聲講：「嗯，但都要小心，唔好太勉強。」

佢哋揀咗一個任務，係討伐聖果森林嘅中階魔物古樹妖一隻。聖果森林位於馬利安城東邊，任務特別係要喺迷夢城冒險者公會交任務。走出聖果森林繼續往東走，經過諾籮村，就會到達迷夢城。

星光小隊覺得呢個任務好吸引，因為佢哋想去迷夢城幫樂希買啲聖職系裝備，同埋佢哋都好想去迷夢城睇吓，畢竟嗰度係魔法之城，聽落好神秘！佢哋預咗喺迷夢城住一晚，順便探索吓。

永誠喺櫃檯登記任務，職員一見到樂希嘅白光，又係好尊敬咁鞠躬，講：「聖職大人，討伐古樹妖嘅任務要喺迷夢城交，路途有啲遠，但報酬好高，有300卡索！祝星光小隊任務順利！」阿偉笑住講：「300卡索！今次可以買多啲裝備啦！」





星光小隊收拾好裝備，沿住馬利安城東邊嘅小路出發，行咗大約半個鐘，就到咗聖果森林嘅入口。聖果森林同波利波利大平原好唔同，入面樹木高大，樹葉濃密得連陽光都透唔入，地上長滿青苔，空氣中瀰漫住一陣清新嘅果香。森林入面有好多聖果樹，結咗一啲紅色嘅小果子，聖果雖然同星輝果樣有啲似，但聖果係有劇毒唔食得的。

佢哋行咗一陣，終於搵到一隻古樹妖。古樹妖係一棵巨大嘅樹形魔物，體型好似一座小山咁大，樹幹上長滿咗尖刺，樹枝好似手臂咁揮動，速度慢，但物理防禦極高。永誠一見到古樹妖，即刻大喊：「星光小隊，準備戰鬥！大家上！」

永誠一馬當先，拎住新大劍衝上前，鐵火龍骨大劍劈喺古樹妖嘅樹幹上，發出「砰」嘅一聲，但只留下一條淺淺嘅裂痕。阿偉舉起新盾牌，硬接古樹妖嘅樹枝攻擊，佢嘅鐵甲幫佢擋咗唔少傷害，佢大叫：「佢好硬！大家小心！」曉峰喺側面潛行，用新匕首刺向古樹妖嘅根部，匕首嘅毒性效果生效，但傷害好低，古樹妖幾乎冇反應。洛希娜喺後排拉開新弓，連射幾箭，箭矢精準擊中古樹妖嘅樹幹，但同樣只留低淺淺嘅痕跡。

樂希喺後方幫隊友支援，佢施展強化術，白光包圍住永誠、阿偉、曉峰同洛希娜，提升佢哋嘅力量同防禦，又用治癒術幫阿偉補血。但古樹妖唔係不死生物，樂希都唔可以用聖光彈輸出，佢只能專心支援。星光小隊全隊都係物理輸出，偏偏古樹妖嘅物理防禦太高，佢哋打咗好耐都傷唔到佢幾多。

更麻煩嘅係，打打下仲有幾隻初階魔物森林狼加入戰鬥！森林狼係一啲灰色嘅小型狼形魔物，速度快，會用爪同牙齒攻擊。永誠同阿偉負責正面頂住古樹妖，曉峰同洛希娜轉頭應付森林狼，曉峰用匕首快速刺中一隻森林狼嘅頸後，洛希娜一箭射穿另一隻嘅頭部，但森林狼數量多，足足有五隻，佢哋被逼分心應付。





持久戰打咗三個鐘，星光小隊已經攰到氣喘吁吁，但古樹妖睇落仲冇咩受傷，樹幹上嘅裂痕雖然多咗，但佢嘅樹枝攻擊依然有力。永誠抹咗抹汗，講：「唔得！佢太硬啦！我哋咁落去唔掂，繼續打落去會好危險！」洛希娜點頭，講：「係呀，古樹妖嘅物理防禦太高，我哋無魔法輸出，傷唔到佢。不如先撤退，搵個地方休息吓，再諗其他方法！」樂希細聲講：「大家都攰...…我都冇魔啦......我同意撤退。」

於是星光小隊同古樹妖拉開距離，迅速撤出聖果森林，繼續往東走。行咗大約三十五分鐘，佢哋到咗諾籮村，好彩一路上都冇遇到咩會主動攻擊嘅魔物。

諾籮村係一個好古風嘅小村，人口唔多，民風淳樸，村入面嘅屋都係用木材同茅草搭建，街道上只有幾個村民喺走動，氣氛好寧靜。村民一見到樂希身上嘅白光，個個都好尊敬，紛紛鞠躬講：「聖職大人！歡迎蒞臨諾籮村！」

星光小隊決定唔去迷夢城住，喺村入面唯一一間簡陋嘅旅館住一晚，喺諾籮村休息吓再計劃。旅館係一間小木屋，入面只有兩張單人床，房間好簡單，只有一張木桌同幾張凳，窗戶望出去係村子嘅田野。

喺佢哋入咗旅館冇耐，年老嘅村長域拿親自來拜訪。域拿係一個滿頭白髮嘅老人，拎住一支木手杖，佢一見到樂希嘅白光，即刻深深鞠躬，講：「聖職大人！我係諾籮村村長域拿，聽講您同您嘅隊友蒞臨敝村，我特意帶咗村入面好珍貴嘅燒珍珠兔肉來款待您哋！」燒珍珠兔肉係用村入面稀有嘅珍珠兔烤成，肉質嫩滑，帶有一絲甜味，表面烤到金黃，香氣四溢。





樂希連番拒絕：「村長……你話係好珍貴嘅嘢，我哋唔可以收㗎。」永誠都話：「係囉，村長，不如你留返自己食啦。」

「聖職大人！敝村嘅旅館如此簡陋，本來就已經屈就咗您哋，希望您哋可以收咗呢盤燒珍珠兔肉，唔係我老人家會好唔安樂。」域拿更差點想跪下，曉峰連忙著佢扶住，樂希只好收下食物。

「多謝你嘅款待，村長……」

「願加爾安娜絲女神與您哋同在。」村長講埋呢句祝福就離開咗。

佢哋食完燒珍珠兔肉，因為房入面只有兩張單人床，又要傾下點訓。

永誠講：「洛希娜，你係女仔，應該訓一張床。我哋四個男仔迫一張啦！」佢哋讓咗一張單人床畀洛希娜，但另一張床根本就訓唔落四個人，然後佢哋又爭住主動訓地下。洛希娜見到佢哋咁，就話：「唔使咁勉強，我唔介意一齊訓，不如將兩張床拍埋，我哋一齊訓啦，我最多訓最邊邊。」

於是佢哋將兩張單人床拍咗埋，洛希娜訓喺最邊邊，永誠訓喺佢旁邊，阿偉、樂希同曉峰依次排開，都仍然係幾迫，但起碼訓到。夜晚，永誠望住熟睡嘅洛希娜，佢嘅金色長髮散喺枕頭上，睡臉好安詳，永誠心入面突然有種溫暖嘅感覺，覺得好想保護佢。佢開始意識到，自己可能真係鐘意咗洛希娜，佢嘅心跳得好快，連訓覺都唔安穩。

星光小隊喺諾籮村渡過咗一個寧靜嘅夜晚，但佢哋同古樹妖嘅戰鬥仲未完結，佢哋有咩辦法呢？永誠同洛希娜嘅關係又會唔會有新進展？下章再同你哋講！