聖殿門口,夕陽斜照,一片寧靜中,傳來一陣細微喘息聲。

「夢仔——?」甘霖語氣微顫,率先發現角落一抹虛弱身影。

黑袍身形搖搖欲墜,阿夢單手撐住紫光魔杖,勉強站穩,嘴角滲出血絲,臉色蒼白如紙。佢望見甘霖,強忍住痛楚,想講咩,但下一秒已劇烈咳嗽起來,然後吐出一大口鮮血,身體一軟,向前栽倒,昏迷不醒。

「夢仔!」甘霖急步上前,接住倒下嘅阿夢,眼神驚懼。

佢立即舉起法杖,施放出重生術——一種高階治療法術,除咗可以回復生命,仲可以解除幾乎所有異常狀態。





溫暖聖光籠罩住阿夢身體,但幾秒後光芒迅速黯淡,毫無效果。

甘霖臉色驟變,換成施放驅除術,聖光化為一圈清澈波動,試圖驅走任何附身惡靈。但效果依舊無效,阿夢氣息依然虛弱。

「唔得⋯⋯係詛咒,而且……仲有強化法印保護。」甘霖低聲咬牙,神色罕見地凝重。

佢馬上施展傳音術,將魔力傳送出去:「莫耶,緊急狀況,速來聖殿!」

話音未落,甘霖已一手抱起阿夢,轉身急步衝向聖殿門口。





兩名白甲守衛上前一步,眉頭緊鎖:「甘霖大人,佢係死靈法師,根據規定——」

「讓開!」甘霖罕有地動怒、語氣嚴厲,「老夫會承擔所有後果。」

兩人從未見過甘霖動怒,面面相覷,急忙讓出通道。

樂希見狀亦驚慌失措,急忙跟上甘霖。

甘霖抱住阿夢快速穿過神殿走廊,直奔治療室。厚重石門被推開,聖殿內部光輝略顯不穩,彷彿感受到異樣。





甘霖將阿夢輕放於白石病床上,緊握佢手腕:「夢仔,頂住。」

幾秒之後,一陣傳送光芒閃爍,莫耶現身房內,神情嚴肅,一身灰袍微微浮動。

「乜事……?」佢見到床上人影,瞳孔一縮,走近幾步:「阿夢?點解會……」

冇等甘霖解釋啲咩,佢已舉起雙手,一手放出魔法「解析術」,無數浮動符文纏繞阿夢身體;另一手連續唸咒,轉為「逆轉術」,逐層破解法印。房間內光芒閃爍,壓力急升。

過咗半分鐘,莫耶停下,臉色陰沉得可怕。

「係……加莉安娜嘅詛咒。——崩壞術。」

甘霖身體一震,神情瞬間面如死灰。

「崩壞術……」佢喃喃自語。





莫耶望住佢,語氣沉重:「冇錯,係加莉安娜創造嘅詛咒術,喺記錄入面屬極高階禁咒,會令受術者法力逆流崩解,逐步瓦解受術者身體機能,最後……」

「點破解?」甘霖聲音帶住一絲顫抖。

莫耶搖頭,手上唔知幾時已經拎住一本魔法書:「根據加莉安娜自己寫嘅書上記錄,要破解崩壞術,唯一方法——就係用聖火鳳凰之心。」
房內空氣凝固。

甘霖低聲重複:「……聖火鳳凰……」然後喃喃補上一句,「八大災難級魔物之一……」

莫耶補充:「係,但佢同其他災難級魔物好似龍王瑪爾艾路、巨人雷姆達呢啲可以搵到嘅唔同,聖火鳳凰只喺古書出現過,但現代冇任何明確記錄。佢棲息地、習性、甚至外貌都不詳。你應該知道,我感知術範圍已經橫跨大半個艾莉菲斯,但從來都冇感知過佢。」

甘霖沉默一會,眼神轉為堅定,語氣低沉但有力:「咁......莫耶,傳送我去王都,我要求艾莉絲陛下幫手,召集七聖賢。我哋聯手出動,搵出聖火鳳凰,就算真係打唔贏,都要去搏一搏。」

莫耶面色難看:「甘霖,你知冇可能......陛下唔會為咗一個死靈法師咁做.....」





甘霖當然知道艾莉絲同已失蹤嘅死靈法師、半精靈杜爾之間嘅恩怨,佢手指緊握衣袖,雙眼泛淚:「我知,但冇其他辦法啦……」

「我試下破解佢。但你要知道,成功機率……唔高。」莫耶一手揚起,開始持續釋放另一道魔導士專屬高階法術——魔法重組術、用作穩定魔力波動,試圖直接干擾、重組其他法術嘅招式。

甘霖跌坐在地,雙手無力垂下,只能靜靜望住床上少年蒼白面孔。

莫耶眼神冇絲毫鬆懈,忽然低語:「仲有……」

佢左手再度掐出傳送手印,光芒一閃,黑霧凝聚,一名全身黑衣、臉龐冷峻嘅男子出現喺房中。

被傳送進來者正是七聖賢之一,殺手、影。

佢雙眼掃視四周,望見莫耶和甘霖神色和床上阿夢的情況,眼神微微變化。





莫耶簡短下令:「影,麻煩你幫我追查聖火鳳凰嘅下落,盡你能力。」

影愣咗半秒,然後也不問因由、微微點頭:「收到、莫耶大人。」

話音剛落,佢已化作黑霧,消失喺原地。

房間內,剩低跌坐地上流住淚祈禱嘅甘霖、努力施法嘅莫耶、企喺一邊手足無措嘅樂希,同埋靜靜躺著、毫無意識嘅阿夢。

空氣中只剩下陣陣魔力波動,同一股近乎無力嘅絕望。
已有 0 人追稿