《艾莉菲斯物語》（異世界穿越）: 第三十六章、彩光奇蹟

莫耶眉頭緊鎖，雙手持續釋放魔法重組術，空氣中魔力扭曲如漣漪。佢已經努力咗差唔多一個鐘，但崩壞術結構仍然完整。

「……個魔法結構好緊密......」佢喃喃自語。

樂希仍然不知所措咁企喺一旁，擔心咁望住床上阿夢嘅蒼白面孔。明明唔算熟絡，但經歷過封印洞穴一齊冒險，佢心入面都當阿夢係同伴。再加上阿夢雖然一向冷淡，卻從未真正做過壞事，樂希一直相信，佢只係一個傷心孤單嘅小男孩。

佢忍唔住眼淚，眼淚靜靜滑落臉頰，滴落地上，又滴落喺佢緊握住嘅聖彩之願上。

原本入到城自動收斂光芒嘅法杖，突然之間散發出一陣璀璨嘅七彩光芒，如彩虹瀑布般環繞全身，杖身微微震動，強大嘅魔力波動一陣陣擴散。





「……！」莫耶同甘霖同時轉頭，望住眼前異象，面露驚愕。

「呢股魔力……」甘霖低聲講。

樂希望住震動嘅法杖，眼中帶淚，嘴角顫動：「你……你係咪幫到手？聖彩之願！」

法杖光芒更盛，似乎正在回應樂希。樂希於是舉起法杖，一道七彩繽紛嘅光柱自杖尖爆發，籠罩住昏迷中嘅阿夢。

彩光如瀑，柔和而堅定。





莫耶原本仲持續施法，但下一刻，佢猛然間神色一變，收手定住，眼神震驚：「等陣……崩壞術……消失咗。」

甘霖聞言瞪大雙眼，望住阿夢身上彩光慢慢淡去，而少年嘅臉色亦稍微恢復血色。

阿夢眉頭微動，眼皮掙扎咁掀起，望咗眾人一眼，嘴角微微一動，卻仍然虛弱地講唔到嘢。下一刻，佢又合埋眼睛，再度沉睡，但氣息已穩定。

莫耶立即使用探知術，片刻之後，點頭道：「冇詛咒痕跡，只係仲需要休息……真係冇事啦。」

甘霖激動得熱淚盈眶，一手抱住樂希：「希仔……你救咗夢仔，真係多謝你……」





樂希含淚輕輕搖頭：「唔係我……係聖彩之願出手……」

甘霖破涕為笑：「係你嘅善意同淚水感動咗聖彩之願，亦都感動咗女神。」

莫耶一邊鬆一口氣，一邊坐返落椅背：「我會喺度睇住佢……等佢醒返我要問清楚點解佢會中咗崩壞術。」

「你懷疑……加莉安娜返咗嚟？」甘霖面色凝重。

「我唔敢排除呢個可能性。你知我一向都唔太信佢，尤其係佢失蹤多時，而家又突然間出現佢嘅詛咒……」莫耶望住阿夢講。

「唔，老夫相信佢唔會對夢仔落咒，始終夢仔都係佢徒弟。你可能唔知，希仔今日同老夫講過，夢仔曾單獨探索封印洞穴，可能喺冒險途中觸發咗啲陷阱。」甘霖搖頭。

「唔緊要，等佢醒返，我會親自問清楚。」莫耶冷靜咁話。

甘霖望住病床上沉睡嘅阿夢，走近憐愛咁摸摸佢個頭：「好彩你有聽話，有嚟聖殿搵老夫幫手……」





然後佢再望一眼窗外夕陽：「都過咗約定時間啦，希仔……你出去搵返你啲隊友啦，費事佢哋擔心。至於今晚餐飯……就第日補返，老夫想留喺到睇住夢仔先，你嘅救命之恩，老夫無以為報。」

「唔需要㗎甘霖大人，你之前話過，我係女神揀選之人，得到聖彩之願，就應該努力幫助身邊需要幫助嘅人……」樂希抹乾眼淚，微笑住講。

「多謝你，希仔。願加爾安娜絲女神與你同在。」甘霖心感安慰。

樂希微笑點頭，走近阿夢輕握住佢嘅手講：「阿夢，願加爾安娜絲女神與你同在。」然後輕輕轉身離開治療室，步出聖殿。
————————————————————
聖殿外，夜色已起。

永誠、阿偉、曉峰、洛希娜四人正焦急等候。佢哋見到樂希出現，阿偉第一個衝上前，緊緊攬住佢：「傻豬你去咗邊呀？我好擔心你……」

「對唔住……」樂希輕聲講。





「你冇事就好。」永誠鬆咗口氣，拍咗拍佢膊頭。

幾人邊行邊問發生咗咩事，樂希一邊跟住佢哋行向餐廳，一邊將整件事——從阿夢中詛咒、甘霖急救失敗，到聖彩之願奇蹟救人——一五一十道出。返到旅館，佢哋又聚係樂希佢哋間房入面，七嘴八舌咁討論分享今日各自學到嘅技能。

夜幕低垂，迷夢城燈光漸亮，但星光小隊安穩咁進入夢鄉。
————————————————————
第二朝，佢哋一行人食完早餐，先去到聖殿，樂希獨自入去探望阿夢。

阿夢仍然未醒，已經有人幫佢換上普通衣服，冇著住死靈法師法袍嘅阿夢，就好似城內四處可見嘅普通細路咁，甘霖正喺佢旁邊守候住。

「咁早呀希仔。」

「嗯，早晨甘霖大人，今日諗住同隊友去接個任務，順便試下啲新技能，見順路咪過嚟探下阿夢。」樂希微笑住講。

「希仔，去冒險者公會其實唔係太順路，老夫知道你哋住喺光影旅館。」甘霖笑說。





「哈哈，唔緊要啦，咁我出發啦，辛苦你啦甘霖大人。」樂希被識穿，尷尬咁低頭講。

「祝任務順利，願加爾安娜絲女神與你同在。」