《艾莉菲斯物語》（異世界穿越）: 第四十八章、城市墓園
當天晚上，五人各自喺公會學習咗新技能，雖然過程中遇到咗唔少挑戰，但每個人都感受到自己力量嘅進步，對未來嘅冒險充滿咗期待。夜晚，佢哋簡單食咗晚飯，就返到旅館嘅大房聚埋一齊傾計，佢哋爭先恐後咁分享自己學識嘅新技能，氣氛熱鬧又溫馨。
講完技能，永誠率先提議：「我哋而家都二轉哂，又學咗咁多唔同嘅新技能，實力應該有所提升，聽日不如接啲難啲嘅任務試試！」
呢個提議即刻得到阿偉、曉峰同樂希嘅贊成。
「好呀！咁樣可以試下我哋二轉後嘅實力！」阿偉興奮回應著。
「好，我都想試試啲新技能。」曉峰點頭附和。
樂希微微一笑：「好呀，咁樣我哋先可以繼續成長。」
唯獨洛希娜雖然口頭上應咗一句「好呀」，但神情卻顯得悶悶不樂。
作為男朋友嘅永誠即刻注意到，佢皺起眉頭，輕聲問：「洛希娜，你唔開心？」
「唔係呀......冇嘢呀。」洛希娜搖頭。
「洛希娜，我哋都一齊冒險咗咁耐，你有咩仲怕同我哋講架咩？」樂希見狀，語氣溫和但認真地問。
「係呀，有咩事就講出嚟，我哋都係自己人。」阿偉附和。
曉峰默默推推眼鏡，用肯定嘅眼神望住洛希娜，表示支持佢勇敢講出心事。
洛希娜低著頭，沉默咗幾秒，然後輕輕吸咗一口氣，終於開口：「其實......聽日係我前隊友嘅死忌。」
一提起呢句，房間內頓時安靜下嚟，氣氛變得嚴肅。洛希娜繼續講落去，聲音中帶住一絲顫抖，眼神似乎被拽回到一年前嘅記憶中。
「我應該同你哋講過......一年前，我仲係水光小隊嘅一員......」洛希娜嘅聲音逐漸低落，眼中浮現一片濕潤。
「我記得呀，你隊友嘉林、阿保、優兒.....佢哋都當你親妹妹咁錫。」永誠幫洛希娜講落去。
「嗯，我都有記住，你哋喺瑪利安納雪原不幸遇到傳說級魔物雪魔女......佢哋為咗保護你逃走，全部……都戰死咗......」樂希語帶憂傷咁接住講。
洛希娜哽咽，面上滿是痛苦嘅表情：「嗯.....嗰陣我已經放棄咗求生嘅希望，但……當時一個路過嘅死靈法師救咗我，我後尾先知佢係阿夢，佢擊退咗雪魔女，將我由雪地帶返城入面……但係，嘉林哥哥佢哋三個，就永遠留咗喺雪原……」
洛希娜講到呢度，聲音已經帶著啜泣，佢用雙手掩住臉，情緒崩潰。
坐喺佢身邊嘅永誠輕輕攬住佢，柔聲安慰：「洛希娜……我哋喺呢度陪住你。」
「……我想去拜祭佢哋......聽日我想去西南角落嘅冒險者墓園……但係，我又驚會耽誤大家嘅時間。」洛希娜喊咗一陣，之後抹咗抹眼淚講。
「點會耽誤？」永誠即刻用堅定嘅語氣回應，「洛希娜，你唔使咁講。我相信大家都唔會介意。」
「係呀，拜祭佢哋先啦，呢啲事一定要做。」阿偉表態支持。
「冇錯，呢啲係對逝者嘅尊重。」曉峰亦點頭贊同。
樂希輕輕一笑，語氣溫柔：「洛希娜，我知道水光小隊嘅隊友喺你心目中一定有個好重要嘅地位。我哋做任務唔急，先去掃墓完全冇問題。我哋都想去探下你嘅前隊友，順便向佢哋致敬。」
「係囉，記得你講過，佢哋之前好錫你。我都想去多謝佢哋，仲有向佢哋講明，而家我係你男朋友，我會代替佢哋保護你。」永誠補充。
洛希娜聽到呢到，眼淚再度滑落，但呢次係感動嘅淚水。佢撲到永誠懷裡，啜泣著：「多謝你……多謝你哋……」
「傻啦，呢啲係應該嘅。」永誠輕輕拍住懷中嘅洛希娜嘅嘅背。
曉峰推咗推眼鏡，語氣平靜咁幫大家總結：「咁聽朝，我哋就先去買一啲祭品，然後一齊去掃墓，之後先去冒險者公會睇下有咩任務啦。」
「好呀！」阿偉同樂希同聲應和。
洛希娜感激地望住眾人，輕聲道：「多謝大家……」
「都夜啦，我返去訓啦。」然後佢企起身，返到隔籬房休息。
洛希娜離開後，氣氛重新變得輕鬆。阿偉露出一抹邪笑，打趣道：「永誠，你今晚唔過去洛希娜房訓啦？唔使運動下咩？」
「係囉，呢邊得我哋幾個男仔，驚唔驚悶呀？」 曉峰推一推眼鏡，語氣似笑非笑。
樂希臉紅，尷尬地低頭，但嘴角卻忍唔住微微上揚。
「唔驚呀！如果你哋咁鐘意運動，我喺呢邊陪你哋玩囉！」永誠毫不示弱咁反擊。
話音未落，永誠就撲向阿偉，兩人喺雙人床上扭打嬉戲起上嚟，曉峰亦加入戰局，場面一片混亂。樂希一開始唔想參與，但最終都被拖入混戰中，三人將佢壓喺床上，樂希忍唔住大叫：「等等先……關我咩事呀！」
「點會唔關事！我見到你啱啱都有偷笑！」永誠哈哈大笑。
無奈嘅樂希面上仍然掛住笑容，最終被迫加入呢場鬧劇。呢一晚喺一片歡笑同嬉鬧中渡過，為第二日嘅行程留下咗溫暖嘅伏筆。
————————————————
翌日早晨，洛希娜帶住隊伍一齊出發，第一站係馬利安城內嘅一間花店。佢哋喺店內買咗一紮靈魂花——清新而純白嘅花瓣，如雪般潔白，每片花瓣嘅邊緣帶有細緻嘅銀色條紋。靈魂花嘅花心呈現淡淡嘅金色，有一種溫柔而樸素嘅光芒，象徵住加爾安娜斯女神嘅祝福。
喺艾莉菲斯大陸，靈魂花係掃墓必備嘅花束，無論種族同背景，所有人都會選擇靈魂花作為對逝者嘅敬意，佢嘅寓意係「喺加爾安娜斯女神嘅祝福下安息」。除咗靈魂花，洛希娜仲買咗清潔墓碑嘅工具，包括刷同潔淨水。
準備好之後，洛希娜帶住隊伍向馬利安城西南角落嘅冒險者墓園出發。
冒險者墓園同馬利安城其他地方嘅熱鬧氛圍形成咗強烈對比。呢個墓園寧靜而樸素，冇過多嘅裝飾，只有排列整齊嘅墓碑同四周搖曳嘅綠樹，樹葉微微搖晃，發出輕微嘅沙沙聲。小徑鋪滿咗細碎嘅石子，踩喺上面會發出輕輕嘅咯吱聲。
雖然墓園喺馬利安城內，但呢度似乎被時間隔絕，冇喧鬧嘅人流，冇商販嘅叫喊聲，城市嘅聲音都被隔絕於外。呢片地方，雖然喺城內，但似乎唔屬於馬利安城，而係屬於加爾安娜斯女神庇護嘅一片聖地。
洛希娜拖住永誠，帶領隊伍穿過小徑，來到三座並排嘅墓碑前停下。墓碑上刻著三個熟悉嘅名字，讓洛希娜眼眶微微泛紅。
佢放低靈魂花，跪喺墓碑前，低頭閉上雙眼，雙手合十，開始默禱：
「嘉林哥哥、阿保哥哥、優兒姐姐……多謝你哋之前一直咁愛護我。多謝你哋喺雪原為咗救我犧牲咗性命……我永遠都唔會忘記你哋對我嘅好。」
「而家，我加入咗星光小隊，搵到一班好好嘅新同伴，佢哋對我好好，仲有……我識咗一個好好嘅男朋友永誠，佢對我好細心，亦好愛我……」
「請你哋放心，我一定會好好活下去。喺加爾安娜斯女神嘅庇護下，請你哋安息……願加爾安娜斯女神與你哋同在。」
永誠企喺洛希娜旁邊，望住墓碑，心中默默祈禱：「多謝你哋對洛希娜嘅守護同愛護。放心，守護洛希娜嘅責任，從今以後就交俾我。」
隊伍其他人冇打擾洛希娜，靜靜喺後方默禱，然後等佢完成禱告。之後，眾人齊心協力清潔墓碑，將上面嘅塵埃同污漬抹乾淨。
做完一切之後，洛希娜最後望咗墓碑一眼，低聲道：「下年再見，嘉林哥哥、阿保哥哥、優兒姐姐……」
離開墓園後，隊伍初時都顯得有啲拘謹，冇人主動講嘢，氣氛有啲壓抑。洛希娜見狀，露出一抹笑容，打破沉默：「好啦，多謝你哋陪我，我真係冇事啦！而家去冒險者公會啦！」
永誠望住洛希娜，突然開口：「洛希娜，你記唔記得，我喺萊茵沙漠應承過你一樣嘢？」
洛希娜愣咗一下，然後問：「咩？」
「我應承過你，要帶你再去瑪利安納雪原，帶返你前隊友嘅遺體返嚟。雪原咁凍，佢哋嘅遺體應該唔會咁易腐爛。」
「但係……雪原好危險……」洛希娜聞言一震。
「我哋而家已經二轉啦！怕咩！」阿偉拍拍胸口，加入對話。
永誠笑著附和：「阿偉講得啱。我哋唔會怕。同埋呢個係我應承過你嘅事，我一定要做到。」
「咁，不如去冒險者公會睇下有冇啲去瑪利安納雪原嘅任務？咁樣我哋可以順便完成任務。」 曉峰冷靜建議。
「好主意！」眾人和議，於是佢哋一齊向冒險者公會出發。
喺冒險者公會，眾人翻查咗任務公告板，但發現完全冇關於瑪利安納雪原嘅任務。永誠走到櫃檯問公會職員：「唔好意思，點解冇去瑪利安納雪原嘅任務嘅？」
公會職員耐心解釋：「哦，因為雪原距離馬利安城太遠，冒險者通常唔會喺馬利安城接相關任務。如果你哋真係要接，可以一路北行，去王都聖水城嘅冒險者公會。反正瑪利安納雪原係喺王都嘅再北方，如果想去雪原，點都會經過王都。」
永誠將呢個消息帶返俾隊伍，幾人喺公會一個角落商量咗一下，最終一致決定去聖水城。曉峰提議：「反正我哋都未去過聖水城，呢次就當係一場新嘅冒險。」
洛希娜補充：「我之前去過兩次聖水城，但都係短暫停留，今次都想同你哋一齊好好參觀下。」
樂希臨走之前都不忘去聖殿再探多次阿夢，順便同甘霖交代聲，佢哋會去王都同雪原冒險。
隊伍僱咗一架馬車，由車夫駕駛，帶佢哋向聖水城出發。馬車有蓋，內部舒適，座位用柔軟嘅布料鋪成，幾人圍坐喺一齊。拉車嘅係兩隻「馬加里」，一種外型似馬但額頭有短角嘅中階魔物，比較似現實認知中嘅獨角獸。馬加里性情溫馴，跑動時步伐穩健，因此被艾莉菲斯嘅人類馴化，馬車(馬加里車嘅簡稱)成為最常用嘅交通工具。
馬車搖搖晃晃行咗一段時間，洛希娜、樂希同阿偉都靠喺座位上熟睡咗，樂希仲窩喺阿偉懷裡，流露住幸福嘅表情。
永誠留意到，曉峰望住佢，表情沉重。佢怕嘈醒其他人，細聲問：「曉峰，做咩？」
「你仲記得我哋嘅目的？」曉峰深深嘆咗口氣
「記得呀，成為聖賢。」永誠愣咗一下之後點頭。
「成為咗又點？」
永誠冇諗太多，直接答：「咪可以返原本世界囉。」
「嗯。所以……我怕你投入太多感情。」 曉峰平淡咁講。
永誠愣住，恍然大悟，佢之前從未深思過呢個問題。佢同洛希娜嘅戀情自然而然咁發生，佢根本冇諗過關於返原本世界嘅事。
永誠低聲道：「我……」
曉峰狠下心腸，一語道破：「你應該要知道，你同洛希娜係冇可能永遠一齊。」
「得㗎喇……我有分數啦。」 永誠知道曉峰講得啱，但心中仍有一絲唔開心曉峰嘅直接。
曉峰見永誠語氣微慍，語調放軟：「對唔住，我太直接。」
「唔使……我只係一時唔知點算先咁。你講嘅都係啱......」
曉峰望咗永誠一眼，就轉頭望住出面嘅風景，冇再講嘢。
馬車喺沉重嘅氣氛中繼續前行，向住聖水城嘅方向進發。