《艾莉菲斯物語》（異世界穿越）: 第四十九章、莊嚴王都

經過大半日嘅旅途，夜幕低垂之時，星光小隊終於到達咗艾莉菲斯大陸最宏偉嘅城市——聖水城。馬車搖搖晃晃咁駛入城嘅南門，幾人隔住車窗向外張望，都即刻被呢座王都嘅壯觀景象震撼住。  

聖水城嘅城牆高聳入雲，由純白色嘅大理石砌成，上面雕刻住一條條優雅嘅聖靈浮雕，每一幅都記錄住艾莉菲斯歷史上王國嘅輝煌時刻。南門係一道金色鐵門，兩側企滿咗威武嘅皇家衛兵，身穿銀白色盔甲，全副武裝，表情嚴肅，散發住一種無法抗拒嘅威勢。  

雖然已經入夜，但聖水城內仍然一片通明。街道兩側嘅路燈由魔法水晶驅動，散發出柔和嘅白光，將整個城市照得如白晝一樣。街道極為寬敞，鋪滿整潔嘅白色石板，所有建築都係白色或者米黃色嘅色調，簡潔而高貴，令人感到一種純淨嘅聖潔氛圍。  

王都嘅街道唔似其他城市咁熱鬧，雖然偶爾可以見到行人，但人流遠比想像中少。呢度冇商販叫賣，冇人喧嘩吵鬧，只有輕輕嘅腳步聲同低語聲，處處散發住一種莊嚴而寧靜嘅氣息。  

「嘩……呢度真係唔同凡響，單係睇呢個氣氛同建築，我已經覺得自己入咗另一個世界！」落車後，阿偉忍唔住感嘆。





「係呀，真係好宏偉！」永誠點頭附和。

「呢度成個氛圍都好神聖，不愧係王都。」  樂希都話。

「係呀，王都聖水城，人口雖然多，但因為規劃嚴謹，加上規管好嚴，大家都好自律，所以先會冇其他城市嗰種嘈雜感。」洛希娜低聲補充。

幾人喺城內行咗一段時間，終於搵到咗一間旅館——聖都旅館，係一間典型聖水城風格嘅住宿地點。旅館外牆係米黃色，裝飾簡潔但高雅，門口有兩個穿著整齊制服嘅接待員，微笑迎接住客。  

入到去旅館內部，裝潢以柔和嘅金色同白色為主，牆上掛滿咗加爾安娜斯女神嘅畫像，燈光溫暖，氣氛安靜祥和。  





永誠走到櫃檯，問道：「你好，我哋想租房，有冇五人房？」  

櫃檯職員禮貌地答道：「抱歉呢位客人，我哋最大嘅房型係四人房，你哋介唔介意要一間單人房同一間四人房？不過，我哋嘅房費係通常都係以王都貨幣洛尼計算。」  

阿偉已經唔記得咗之前解說講過洛尼：「吓，咩係洛尼？」  

「洛尼係王都專用嘅貨幣。」樂希輕聲解釋。

「一間四人房加一間單人房都冇問題，但我哋冇洛尼，可唔可以用卡索？」永誠即刻問職員。  





職員笑著回應：「都可以，我哋接受卡索，公價兌換係2卡索等於1洛尼。」  

於是，幾人用卡索成功租咗兩間房。洛希娜住單人房，而永誠、樂希、阿偉同曉峰就住喺四人房。幾人喺長途跋涉後疲憊不堪，簡單梳洗一下就即刻入睡。  

第二朝，佢哋都訓到好晏，直到接近中午先集合，喺附近一間氣氛高雅嘅餐廳食咗午餐之後，佢哋就出發去聖水城嘅冒險者公會。  

聖水城嘅冒險者公會比起其他城市嘅公會更加華麗。公會建築呈圓頂型，外牆由純白色大理石砌成，門口有兩根高大嘅石柱，上面雕刻住加爾安娜斯女神嘅圖騰，象徵住冒險者受到女神嘅庇護。  

入到去公會大廳內，幾人即刻被震撼到。整個大廳高達三層樓，天花板上畫住華麗嘅壁畫，內容係加爾安娜斯女神同冒險者一齊征服魔物嘅傳說。光芒從天花板垂落嘅巨大水晶吊燈中散發出嚟，將每一個角落都照得通明。  

大廳中央係任務公告板，四周係櫃檯同休息區，牆邊擺滿咗裝飾用嘅盔甲同武器。  

永誠感嘆：「呢度嘅公會真係同其他城市完全唔同，氣派得嚟又有一種神聖感。」  

洛希娜點頭：「係呀，成個聖水城每個角落都好有氣勢。」  





幾人走到任務公告板前，發現上面有大量關於瑪利安納雪原嘅任務，數量多得令人覺得有啲奇怪。  

「點解幾乎所有任務都係去雪原嘅？」曉峰皺眉。

「唔知呢，我哋揀咗任務之後，去櫃檯問下職員啦。」永誠話。

最後，幾人決定接一個去雪原討伐兩隻中高階魔物——雪原狼人嘅任務，要求討伐後將佢哋嘅牙齒帶返嚟交差。佢哋拎住任務單走到櫃檯交俾職員。  

職員見到佢哋揀咗雪原任務，微微驚訝，但仍然保持專業態度：「你哋確定要接去雪原嘅任務？」  

阿偉就回應佢：「係呀，雪原有咩問題？不過我都想問下，點解咁多任務都係關於雪原嘅？」  

「最近雪原嘅魔物數量突然增加咗，而且佢哋變得更加暴戾，就算係啲本身唔攻擊人類嘅魔物，都開始對冒險者主動發動攻擊。因為危險性增高，接呢啲任務嘅隊伍好少，所以任務先會堆積咗咁多。」職員解釋。





「哦......原來係咁。」  

職員檢查咗星光小隊嘅組員名單，然後表情有啲猶豫：「不過，而家雪原嘅危險性比較高，根據規定，只有隊員係全二轉職業嘅隊伍先可以接呢啲任務......」  

「咦？我哋唔係全二轉咩？」永誠反問。  

職員鬆咗一口氣：「哦，咁可能係資料未更新。我幫你哋確認一下。」  

佢拎出一個魔法儀器，對住幾人掃描咗一下，星光小隊嘅名單即刻更新，職員望到樂希「星靈使」嘅標籤，表情變得放鬆：「哦，你哋仲有個星靈使，呢個職業相當罕見，我都放心哂。」  

佢哋臨走前，職員好奇問：「多口問句，我見到你哋隊伍名單入面有死靈法師阿夢大人！？」  

樂希笑著解釋：「係呀，佢係我哋嘅同伴，但佢而家唔喺呢度。」  

「明白，希望你哋順利完成任務。」  





接完任務後，星光小隊出發向聖水城嘅北門進發。由於聖水城中央區域係女王同軍政禁區所在，佢哋需要繞過去，行咗一段時間先到北門。北門同樣宏偉，由純白色石材打造，門口有更多全副武裝嘅衛兵駐守，門外係一片廣闊嘅平原。  

出城後，佢哋向著北方行進。隨住距離雪原越嚟越近，周圍嘅環境開始發生微妙嘅轉變。最初，陽光仍然溫暖，但漸漸變得微弱，空氣中開始出現一絲冰涼。  

再向前行，地面變得更加乾硬，草地逐漸消失，取而代之嘅係一片片被薄雪覆蓋嘅土地。最後，當佢哋踏入雪原嘅邊緣時，眼前嘅世界已經完全被白雪覆蓋，細雪從天而降，空氣中彷彿都帶住一種清冷嘅寂靜。  

洛希娜望住眼前嘅雪原，低聲道：「終於又返到嚟呢度……」  

永誠輕拍佢肩膀，語氣堅定：「唔使怕，我哋喺呢度陪住你！」  

眾人整理心情，正式踏入瑪利安納雪原，迎接呢場未知嘅冒險……