《艾莉菲斯物語》（異世界穿越）: 第五十章、雪原冒險
星光小隊踏入瑪利安納雪原，冷冽嘅寒風迎面而來，但幾人並冇感受到刺骨嘅寒意，因為樂希一踏入雪原，就即刻幫大家施展咗「適應術」，一種能令隊伍成員適應極端環境嘅輔助技能，將雪原嘅嚴寒溫度完全隔絕。
「嘩，樂希你呢招真係好有用，唔使著到好厚咁，都唔會覺得凍！」阿偉感激地拍拍樂希嘅肩膀。
「阿偉你著重裝明明本身就好厚啦，你睇我，套裝都冇布嘅，我都唔覺得凍！」永誠笑著指指自己赤裸嘅上半身同埋短褲補充。
樂希腼腆咁笑咗笑：「本身我都係因為自己怕凍先學埋呢招，估唔到咁快有用。」
雪原如同一片無盡嘅白色海洋，地平線上只有偶爾出現嘅冰柱同埋低矮嘅雪丘。果然如冒險者公會職員所講，雪原上魔物嘅數量唔少，有時甚至會見到唔同種類嘅魔物自己打起上嚟，場面混亂而危險。
曉峰喺馬車上已經盡量熟讀《艾莉菲斯魔物圖鑑》，將雪原嘅魔物特性大概都牢牢記住。佢帶領星光小隊避開咗幾個棘手嘅魔物群，盡量選擇比較安全嘅路徑前進，但雪原嘅危險始終係冇辦法完全避免。
突然間，遠處兩隻似鹿又似馬嘅魔物衝住佢哋而來。佢哋身形修長，四肢靈活，皮毛係純白色，身上有黃色花紋，頭上長住鋒利嘅冰晶角，眼神帶住兇光。
「呢兩隻係雪比奧，中階魔物，主要用衝撞攻擊，仲識用少量冰魔法。」曉峰快速解說。
「終於有機會試下新技能啦！」阿偉興奮地大喊，率先衝出去。
佢全身被重裝盔甲包裹，腳步重而穩，手中巨劍燃起熊熊火焰。他使用咗二轉重裝鬥士嘅新突進技能「火舞擊」，化作一道火焰旋風向雪比奧衝去。
佢嘅直劍發出火光，帶起猛烈嘅旋轉劍壓，一劍揮落，雪比奧發出一聲淒厲嘅嘶叫，連反應都嚟唔切就被瞬間斬成兩半。雪地上留下咗一道被火焰燒焦嘅痕跡。
永誠見狀，亦忍唔住出手，佢用咗狂戰士嘅新技能「捨身猛攻」，身體瞬間爆發出強烈嘅紅光，肌肉鼓脹，力量提升至極限。
佢揮動大劍，連續幾下猛劈，第二隻雪比奧嘅身軀被劈到血肉橫飛，瞬間倒地。
「嘩，好型呀你哋！」樂希忍唔住拍手讚賞。
阿偉得意地攬住樂希：「傻豬，應該主要係讚我啦！」
「明明樂希係話你哋，點解你咁都呷醋？」 永誠扮作不滿咁笑說。
阿偉將樂希攬得更緊：「唓，係人都知，我樂希一定覺得我型過你啦！」
樂希臉一紅，尷尬地低聲道：「係啦……」
幾人都仲未講完笑，遠處又有一隻體型更大嘅魔物以極快速度衝埋嚟。
「中高階魔物，冰暴獅，攻擊力好高，速度亦唔慢！」曉峰即刻提醒。
「到我！」洛希娜拉開弓，使用咗神射手嘅新技能「追蹤箭」，箭矢帶住銀色嘅光芒，精准無比咁追住冰暴獅，直插佢頭部。雪地上揚起一陣雪霧，冰暴獅發出痛苦嘅咆哮，但竟然未倒下。
「交俾我！」曉峰都使用新技能「暗影𣊬擊」，身影化作一道模糊嘅暗影，瞬間出現在冰暴獅嘅背後。佢手中匕首帶住暗紅色光芒，從冰暴獅嘅背部狠狠刺入，冰暴獅發出最後一聲慘叫，倒地不起。
「嘩，曉峰你呢招勁型，無啦啦出現喺佢後面！」阿偉目瞪口呆。
曉峰笑咗笑：「都係多得洛希娜嘅輸出，我先可以收割。」
洛希娜微微一笑，但冇多講啲咩。
佢哋再向前行，又遇到一隻擋路嘅雪精靈。呢隻魔物通體透明，外型如同一個漂浮住嘅水晶雕像，周圍盤旋住細小嘅冰晶。雪精靈舉起雙手，瞬間釋放咗一招「冰風暴」，猛烈嘅冰雪旋風向幾人襲來。
「交俾我！」樂希即刻使用「聖靈吸收」，將敵人嘅魔法能量吸收一空，冰風暴瞬間消失。永誠見機不可失，踏前使用技能「鬼哭神嚎」，大劍揮動間帶起咗一道道暗紅色嘅劍氣，擊中咗雪精靈數次。
阿偉都加入戰鬥，施展「居合斬」，身影如同一道武士般閃過，但好似作用不大。
曉峰使用「識破」，看清對手弱點，然後皺眉道：「雪精靈物理防禦好高，不如交俾樂希。」
永誠同阿偉聽到即刻停手，退開距離：「唔早講！」
樂希拎起聖彩之願，開始施法。佢首先施展咗「星靈光波」，一道閃耀住星光嘅環形光波飛向雪精靈，將佢包圍住，光波爆發出璀璨嘅光芒，對雪精靈造成巨大傷害。
接住，佢又用「精靈風暴」，無數星光同風刃交織成一個華麗嘅風暴，困住雪精靈並持續削弱佢嘅生命力。最終，雪精靈被光波同風暴撕裂，消散喺雪地中。
「嘩，樂希你啲技能又靚又高攻！」永誠由衷讚歎。
曉峰亦補充：「馬莉娜娜話過，星靈使嘅技能好難掌握，冇諗到你用得咁好！」
樂希害羞地低頭：「應該係好彩啫……」
阿偉一把攬住樂希，大聲道：「當然唔係，我傻豬最叻！」
樂希難為情地推開佢：「阿偉……唔好成日無啦啦攬住我啦，咁多人望住！」
幾人喺歡笑中收拾咗戰場，繼續向雪原深處進發。
喺洛希娜嘅帶領下，星光小隊一路穿過積雪覆蓋嘅山嶺，最終嚟到一個藏身於雪山中嘅小洞穴。呢個洞穴極為細小，幾乎一眼就可以睇哂內部。洞穴內部空空如也，但牆壁上有幾條冰凌垂下，地面積滿咗厚厚嘅雪，彷彿已經多年冇人踏足。
洛希娜望住呢個洞穴，神情變得凝重：「我記得……就係呢度附近，當年我哋水光小隊被雪魔女襲擊……」
佢嘅語氣透著一絲傷感，眼神似乎回到咗嗰個血腥嘅日子。永誠輕輕拍咗拍佢嘅肩膀，似乎想安慰佢，但未等洛希娜繼續回憶，突然之間，兩隻高大嘅魔物喺轉角處跳出，朝佢哋嘅方向撲過嚟！
兩隻魔物全身披著銀灰色嘅皮毛，兩腳直立行走，身形似狼又似人。佢哋前方胸口至腹部有一層硬甲狀嘅皮膚，作為保護，利爪閃爍著冰冷嘅光芒，雙目充滿咗兇殘嘅野性。
曉峰即刻冷靜分析：「呢兩隻就係雪原狼人，弱點係背部！」
洛希娜眼明手快，迅速拉開弓，瞄準後使用「誘敵箭」。誘敵箭帶著一絲奇異嘅光芒，半空中劃出一道弧線，射向狼人身邊嘅雪地，發出清脆嘅爆裂聲。兩隻狼人即刻轉移注意力，將目光集中喺洛希娜身上，向佢撲去。
「到我哋啦！」阿偉大喊，揮動直劍衝向其中一隻狼人。佢使用咗新技能「重傷斬」，直劍帶住凌厲嘅劍氣，朝狼人橫斬而去，劍氣劃開空氣，直接重創狼人嘅左肩，血花四濺。狼人痛苦地嚎叫，身形踉蹌。
與此同時，永誠亦出手，揮動大劍使出咗狂戰士嘅新技能「飛霞斬」。佢嘅大劍帶住一道紅光，閃電般飛斬向另一隻狼人，大劍劃破狼人胸口，留下一道深深嘅傷口。兩隻狼人同時受創，血流如注，搖搖欲墜。
阿偉同永誠交換咗一個眼神，默契十足地同時跳開，將空間留俾樂希進行輸出。
「樂希，交俾你！」阿偉大喊。
樂希點點頭，舉起聖彩之願開始吟唱。天空突然變得昏暗，無數閃耀住銀藍色光芒嘅星光從天而降，化作一場壯麗嘅「星雨隕落」。每一滴星光嘅爆炸都帶著強烈嘅衝擊，將兩隻狼人徹底撕碎。
「勁！」永誠大喊，對樂希嘅技能感到十分欣賞。
曉峰走上前，用匕首小心翼翼從殘骸中將兩隻狼人嘅犬齒取下，放進任務袋中：「任務完成。」
完成任務後，星光小隊繼續向洛希娜記憶中水光小隊最後戰鬥嘅地點前進。喺一片雪地上，佢哋清空咗周圍嘅幾隻普通魔物，用準備好嘅工具開始挖掘，試圖搵出當年水光小隊隊員嘅遺體。
「小心啲，唔好用技能攻擊雪地，驚會破壞遺體。」永誠提醒大家，語氣中帶住幾分緊張同不安。
積雪好厚，挖掘工作進行得非常緩慢。幾人都投入咗全部注意力，小心翼翼地翻開雪層，期望可以喺雪地嘅深處搵到洛希娜故友嘅痕跡。
經過咗一段時間嘅努力，幾人都開始感到疲憊，決定暫時休息一陣。但，就喺佢哋準備停下嘅瞬間，異變突生——
突然間，周圍嘅天氣急劇變化，本來靜謐嘅雪原上，風雪變得狂暴不堪，大片嘅雪花隨住狂風捲起，令視線變得模糊不清。空氣中充滿咗一種詭異嘅魔力波動，令人感到壓迫同不安。
「發生咩事？！」阿偉緊握住直劍，警惕地環顧四周。
樂希睜大雙眼，低聲道：「呢股魔力……好強大......」
濃霧中，一道模糊嘅女性身影逐漸變得清晰。佢身穿銀白色嘅長袍，長髮如同冰雪般披散，雙眼閃爍著冰冷嘅光芒，周圍環繞住冰晶同寒氣，彷彿大自然嘅化身。
洛希娜見到呢個身影，面色瞬間蒼白，聲音顫抖：「係……係佢……雪魔女……」
呢個名字如同一道警報喺星光小隊嘅腦海中響起，佢哋即刻擺好防禦姿態，準備迎接呢場突如其來嘅危機。而洛希娜，則陷入咗深深嘅恐懼之中，彷彿回到咗嗰個令人心碎嘅過去……