《艾莉菲斯物語》（異世界穿越）: 第五十一章、雪原絕境

喺雪魔女現身嘅瞬間，星光小隊即刻感受到一股令人窒息嘅壓迫感，彷彿面前嘅並唔係一個魔物，而係雪原本身嘅化身。佢雙眼泛著冰冷嘅藍光，長髮如同冰雪般飄揚，周圍嘅空氣變得更加寒冷，似乎連時間都隨之凝結。

「快走！」曉峰第一時間判斷出形勢，對住隊員大喊。

幾人即刻轉身，向相反嘅方向衝去，但雪魔女只係輕輕揮動咗手，四周突然升起咗一道道冰牆，將佢哋嘅退路完全封死。

「死啦，走唔到！」永誠揮動大劍想劈開冰牆，但劍鋒擊中嘅瞬間，冰牆竟然毫髮無損，甚至因為反作用力，震得永誠手臂發麻。

樂希一發「星雨隕落」攻擊雪牆，雪牆仍然係紋風不動。





「冇辦法，只可以硬拼！」阿偉一咬牙，舉起直劍準備迎戰。

雪魔女冇俾佢哋多餘嘅時間反應，伸手輕輕一揮，數十道冰箭從空中凝聚而成，朝著星光小隊迅速射來。

「小心！」洛希娜大喊，揮弓射出數支箭矢，試圖攔截部分冰箭，但冰箭數量太多，冇辦法完全阻擋。

樂希迅速舉起法杖，施展咗「聖靈守護」，一面光盾將隊伍包圍住，成功擋住咗大部分冰箭，但盾面上出現咗裂痕，顯然無法長時間承受攻擊。

「到我！」阿偉憤怒地衝向雪魔女，使用咗二轉技能「火舞擊」，佢全身被火焰包裹，直劍帶住炙熱嘅火焰，旋轉著向雪魔女斬去。但雪魔女只係冷冷一笑，完全不閃不避，阿偉直接衝過咗雪魔女，完全冇打中任何嘢嘅實感。





「點解……打唔中佢？！」阿偉震驚地低語。

永誠同曉峰亦加入戰鬥。永誠揮動大劍，連續使出「飛霞斬」同「鬼哭神嚎」，劍氣如狂風暴雨般攻向雪魔女，但所有劍氣都直接穿過雪魔女，甚至冇辦法碰到佢嘅衣角。

曉峰則利用技能「暗影𣊬擊」試圖偷襲，但雪魔女似乎早有準備，喺曉峰出現嘅瞬間，一道冰刺從地面竄出，直接將佢逼退。

一發「星靈光波」從樂希嘅聖彩之願射向雪魔女，佢隨手一揚，冰雪魔法同光波立即抵消，完全冇辦法傷害到佢。

「唔好再分散攻擊，試下集中火力！」曉峰大喊，但即使幾人聯手進攻，雪魔女仍然游刃有餘，完全冇顯露半點疲態。





呢個時候，雪魔女舉起雙手，周圍嘅空氣變得更加寒冷，即使係喺樂希嘅法術幫助下，佢哋都感受到。地面開始震動，大片冰霧從雪地中冒出，天空變得陰暗，彷彿整個世界都即將被冰雪吞噬。

「呢招……書上面寫過.....係佢大技冰河滅世！」曉峰臉色大變，聲音裡充滿咗恐懼，「如果俾呢一招擊中，我哋……會全滅！」

地面開始裂開，冰雪如同洪水般湧向星光小隊，帶著毀滅一切嘅力量。

樂希連放多層光盾，但光盾喺大招面前顯得不堪一擊，應聲碎裂。

「點算？！我哋擋唔住！」阿偉絕望地大喊。

「唔可以死喺呢度！」永誠咬緊牙關，試圖舉起大劍進攻，但面對如此恐怖嘅力量，佢嘅手竟然微微發抖。

喺眾人絕望嘅時候，樂希手中嘅法杖聖彩之願突然發出耀眼嘅彩光。

「聖彩之願！？」樂希震驚地望住自己嘅法杖，下一秒，彩光突然爆發，將星光小隊包圍住，形成一個宏大而神聖嘅結界。





「係加爾安娜斯聖域……」樂希望住結界，諗起甘霖同佢講過法杖嘅能力，佢喃喃自語：「呢個係女神賜予聖彩之願嘅力量……能夠暫時免疫一切傷害！」

雪魔女嘅冰河滅世撞向結界，爆發出驚天動地嘅巨響。但無論冰雪如何咆哮，星光小隊喺聖域嘅保護下毫髮無損。

「我哋……冇事？」阿偉眼神充滿咗不敢置信。

樂希手握住法杖，感受到體內魔力被大量抽取，呢個技能帶嚟嘅負擔非常巨大：「唔好開心得太早，呢個聖域只係暫時嘅，最多只能維持幾分鐘……同埋，呢個技能有一個星期嘅冷卻時間……」

曉峰眉頭緊皺：「咁即係話，呢個結界消失後，雪魔女仲會繼續攻擊我哋。」

「我哋根本打唔過佢……呢度就係我哋嘅終點……」洛希娜跪喺雪地上，雙手抱住頭，眼神空洞，「就同當年我嘅隊友一樣……我哋都會死喺呢度……」

「洛希娜，唔好咁講……」永誠見狀，想扶起佢，但洛希娜卻失魂落魄咁推開佢，低聲喃喃：「係我……係我害死咗佢哋……而家……我又要害死你哋……」





洛希娜嘅眼淚滑落，佢已經陷入咗深深嘅自責同絕望之中。而雪魔女，就喺結界外冷冷地望住佢哋，似乎完全唔急著進攻，佢就好似一隻貓，正慢慢玩弄即將到手嘅獵物……

聖彩之願所形成嘅加爾安娜斯聖域，已經開始逐漸消散，星光小隊再次暴露喺雪魔女嘅壓迫之下。雪魔女冷冷地望住佢哋，嘴角微微揚起，似乎對佢哋嘅無力感到滿意。

佢舉起雙手，周圍嘅空氣再次變得刺骨冰冷，地面震動得更加厲害，一股更強嘅魔力開始凝聚。

「佢……佢又準備用冰河滅世！」永誠臉色蒼白，聲音發顫。「點解佢可以連續用大技？！」

隨住雪魔女嘅力量越來越強，壓迫感幾乎令星光小隊無法呼吸。樂希嘅法杖「聖彩之願」已經無法再度啟動結界，永誠同阿偉都感受到身體開始被冰霜侵襲，難以動彈。

喺眾人絕望之際，困住佢哋嘅冰牆突然傳來咔嚓咔嚓嘅碎裂聲。下一秒，一道強烈嘅黑色光芒從外面轟然爆發，直接將冰牆炸得粉碎！

「咩事？！係邊個？」永誠震驚地轉頭望向冰牆被破壞嘅方向。

一陣幽冥氣息籠罩住星光小隊，隨即，一道冥神結界升起，純黑色嘅屏障將星光小隊完全包圍住，並成功擋住咗雪魔女發動嘅冰河滅世。雪魔女嘅大招同結界撞擊嘅瞬間，雪地上爆發出驚天動地嘅衝擊波，但冥神結界穩如泰山，絲毫冇受到損傷。





結界內，眾人愕然地望著突然出現嘅黑影。當黑影逐漸走近，樂希率先認出咗佢，驚訝地喊出聲：「阿夢？！係你？」

出現喺佢哋面前嘅，正係之前一直昏迷不醒嘅死靈法師阿夢！

年僅十歲嘅天才死靈法師阿夢，實力卻遠超常人。佢有住一副反映唔同佢實力嘅可愛外表，但眼神中卻透露住年齡唔相符嘅成熟同沉著。即使係面對傳說級魔物雪魔女，佢都係表情平淡，毫無懼色。

阿夢冷靜地掃視眾人一眼：「嗯，等我處理，我都想試下新學嘅技能。」

未等眾人反應，阿夢已經舉起手中嘅魔杖，開始高速詠唱一個森冷而禁忌嘅法術。黑色嘅符文喺佢身邊盤旋，空氣中瀰漫住一股令人毛骨悚然嘅氣息。

雪魔女意識到危險，第一次露出驚愕嘅表情，甚至轉身想逃走，但佢已經走唔切。

阿夢揮動魔杖，全身爆發出一陣漆黑如深淵嘅光芒，喃喃道：「湮滅術。」





黑色嘅枷鎖瞬間束縛住雪魔女嘅身體，然後喺眾人震驚嘅目光下，佢嘅身體開始分解！從四肢到軀幹，再到頭部，雪魔女嘅身體化作一片片冰晶，最終完全消散於空中，同阿夢講出嘅技能名一樣，雪魔女灰飛煙滅，一啲殘骸都冇留低，好似從來冇存在過咁。

「……嘩……咩事......」阿偉呆住咗，直劍垂落雪地。

樂希難以置信地望住阿夢：「阿夢，你呢招……究竟係咩招數？！竟然可以直接消滅雪魔女？」

阿夢醒後已經從甘霖口中得知，自己係被樂希所救，所以佢語氣已經冇之前咁冷漠：「嗯，係我師傅加莉安娜創造嘅禁術。」

「你講嘅係七聖賢之一，號稱艾莉菲斯最多法術戰力嘅巫師加莉安娜......？」洛希娜震驚道。

阿夢收起法杖，眼神依舊冷靜：「嗯，我哋唔好喺到傾，不如我同你哋返城先？」

「但我哋喺到仲有啲嘢想做......」永誠將佢哋此行嘅目的同阿夢講。

「哦，咁交俾我啦，唔係你哋想挖到幾時。」

阿夢再度施展咗一種法術——尋屍術。佢閉上眼，魔杖輕輕點地，一陣陰森嘅黑光向四周擴散，隨即停喺一個方向。

「喺嗰邊。」阿夢指向一處被厚厚積雪覆蓋嘅地方。

佢舉起手，輕輕揮動，一發漆黑嘅法術彈「黑暗彈」準確地射向積雪。黑暗彈爆發出輕微嘅衝擊波，將積雪全部清理乾淨，但底下嘅遺體卻毫髮無傷。

喺積雪之下，水光小隊嘅遺體終於露出咗輪廓。佢哋嘅表情凝固喺最後一刻，顯然係死於極度恐懼同絕望之中。

「呢種精準嘅法術控制……阿夢，你真係……強到好可怕……」曉峰震撼地望住阿夢，心入面忍唔住感歎。

佢哋檢查咗遺體，確認咗水光小隊嘅身份，洛希娜原地大喊，但似因完成心願嘅感動，永誠喺佢身邊輕拍背脊陪伴佢。

阿夢轉頭望住眾人：「你哋應該係打算帶返佢哋嘅遺體返馬利安城，係咪？」

洛希娜仍然泣不成聲，永誠幫佢答：「係，我哋嘅想將佢哋遺體帶返馬利安城公墓好好安葬……」

「不如......我送你哋？我都想返馬利安城，同埋都未好好向你哋道謝......」阿夢同佢哋講，但主要係望住救過佢一命嘅樂希。

「阿夢，唔使道謝，同埋你啱啱先救完我哋。」樂希微笑補充：「再加上，你都冇退過隊，仍然係我哋星光小隊嘅隊員呀。」

「嗯......」阿夢終於有少少似係尷尬嘅表情。

「但係我哋仲要返王都嘅冒險者公會交一交任務。」 曉峰向阿夢展示雪原狼人嘅牙齒。

「冇問題，都順路。」阿夢回應。

永誠就話：「好，咁麻煩你啦。」

阿夢揮動魔杖，召喚出一隻體型龐大嘅死靈生物——洛可。佢外形係一隻巨鷹，全身都有散發住紫色霧氣嘅黑色羽毛，雙目通紅而銳利。

「上去洛可背上，我哋飛返去。」阿夢同大家講。

面對感覺殺氣騰騰嘅洛可，眾人猶豫半刻，但經歷被阿夢救下一事，佢哋都已經比較相信阿夢，所以佢哋帶埋水光小隊三人嘅遺體，一齊登上洛可寛闊嘅背上。

阿夢都登上後，魔杖一揮，洛可隨即起飛，先到聖水城冒險者公會短暫停留，等曉峰落去代表佢哋交咗個任務，收咗500洛尼，然後再一齊飛返馬利安城。