《艾莉菲斯物語》（異世界穿越）: 第五十二章、敞開心扉
今日稍早時間，聖殿醫療室內，晨光透過高聳嘅玻璃窗灑落喺室內，光線柔和而神聖，空氣中瀰漫住一絲淡淡嘅草藥香氣。病床上，一個身形瘦小嘅少年緩緩睜開咗佢紫色如夜空嘅雙眼。
阿夢，呢位年僅十歲嘅天才死靈法師，終於從昏迷中甦醒過嚟。佢眼神略帶迷茫，隨即恢復咗一貫嘅冷靜，喺環顧四周嘅同時，意識到自己身處嘅地方並唔係普通地方。
佢見到一個熟悉嘅身影——一位白髮長鬚、穿著聖職者長袍嘅老人正坐喺床邊，手中捧著一本厚重嘅書卷，正專心閱讀。佢嘅面容慈祥而溫和，正係聖職系公會嘅會長，七聖賢之一，職業為神喻者嘅甘霖。
甘霖察覺到阿夢嘅動靜，立刻抬起頭，臉上露出咗欣喜嘅笑容：「夢仔，你終於醒啦！」
阿夢望住佢，愣咗一愣，隨即語氣略帶沙啞咁開口：「甘霖……大人……呢度係？」
「呢度係聖殿嘅醫療室。」甘霖微笑著放下手中嘅《加爾安娜斯聖典》，語氣中有住濃濃嘅關切。
阿夢微微皺眉，似乎對自己身處嘅地方感到疑惑，佢冷靜地回應：「聖殿？但我係死靈法師，唔可以入嚟架喎……」
甘霖哈哈一笑，語氣中帶著幾分因阿夢醒返嘅愉快：「加爾安娜斯女神已經默許咗啦，因為係佢嘅指示，佢要求聖彩之願救返你。」
阿夢眼中閃過一絲驚訝：「聖彩之願？我記得……嗰把傳說級法杖應該喺樂希手中。」
甘霖突然收起平日和藹嘅笑容，目光變得認真而深邃，直視住阿夢：「係呀，聖彩之願嘅確喺樂希嗰度。不過，夢仔……」
阿夢抬頭望住甘霖，遲疑問：「嗯？」
「呢度得我同你，唔使再扮冷漠啦，你咁樣，會好辛苦。」甘霖語氣溫柔而堅定。
阿夢聽到呢句，瞳孔微微一震，似乎被說破咗心事，但面上仍然保持著冷靜嘅表情，佢垂低頭，冇回應。
甘霖見狀，語氣更加柔和：「夢仔，老夫總覺得，你自己經歷咗好多，承受咗好多痛苦。不如，講出嚟俾老夫聽，俾老夫幫你分擔，好嗎？」
阿夢緊緊咬住嘴唇，雙手微微握拳，似乎喺內心掙扎。甘霖見狀，冇再多講，只係輕輕靠近，伸出雙手攬住阿夢，將佢細小又瘦弱嘅身軀抱入懷中。
「夢仔，冇事嘅，你仲有老夫……」甘霖低聲道，語氣就如同一位慈愛嘅爺爺。
阿夢初時下意識想推開，但當佢感受到甘霖懷抱中嘅溫暖同包容時，佢肩膀微微一震，終於放軟咗身子，雙手緩緩回抱住甘霖。
「甘霖大人……」阿夢嘅聲音顫抖，眼中逐漸泛起水光。終於，佢再冇辦法壓抑住埋藏已久嘅情緒，放聲嚎哭起嚟。
「嗚……嗚嗚……」阿夢嘅哭聲由細變大，甚至帶著幾分撕心裂肺嘅感覺，似乎佢壓抑咗好耐嘅痛苦同孤獨喺呢一刻全部爆發出嚟。
甘霖一邊輕輕拍住阿夢嘅背，一邊用溫柔嘅聲音安慰：「夢仔，放心喊啦，老夫喺度，會一直陪住你……」
阿夢抱住甘霖，哭得滿臉通紅，眼淚不停咁滑落。佢細小嘅身軀因為情緒激動而不停顫抖，但喺甘霖嘅懷抱中，佢終於感受到久違嘅安全感同溫暖。
「我……我真係好……好攰……」阿夢啜泣著，低聲道。
「老夫知道，一路以嚟辛苦你啦，夢仔。」甘霖輕輕嘆氣，眼神中充滿咗心疼，「雖然唔知發生咩事，但總覺得你一直都係一個人承受住所有嘢。」
阿夢冇再講咩，只係緊緊抱住甘霖，將所有嘅委屈、痛苦同壓力都喺呢一刻盡情釋放出嚟……
醫療室內，氣氛變得更加溫暖而親切。
甘霖抱住阿夢，任由佢發洩壓抑已久嘅情緒，同時輕輕拍住佢嘅背，直到阿夢嘅哭聲逐漸平靜，淚水亦漸漸止住。
過咗一陣，甘霖低頭望向已經稍為冷靜嘅阿夢，發現佢嘅淚水已經浸濕咗自己嘅法袍，但甘霖絲毫冇半點在意，仍然滿臉慈愛。
「夢仔，你仲記唔記得發生咗咩事？」甘霖輕聲問，語氣溫柔，帶著一絲關切。
阿夢抬起頭，用手背擦乾眼角殘留嘅淚水，然後語氣平靜咁答：「嗯……我記得。我喺封印洞穴打敗咗守衛，攞到師父……加莉安娜師父創嘅禁忌法術卷軸。我學咗嗰個法術之後就發現，中咗佢加喺卷軸入面嘅詛咒。」
甘霖聽到呢度，眉頭微微一皺，冇打斷阿夢，繼續聽佢講落去。
「本身我身為死靈法師，可以免疫絕大多數嘅詛咒，所以初初我根本冇理佢。但嗰個詛咒……實在太強，我發現自己嘅身體以極快嘅速度衰弱，魔力都被抽乾。我甚至解析唔到嗰個詛咒係乜嘢……」
佢稍稍停頓咗一下，眼神變得有啲落寞：「冇辦法之下，我又搵唔到師父，佢失蹤咗咁耐……我只係諗起甘霖大人你，所以就死撐住行到聖殿門口。最後，我記得見到你同樂希……然後就失去咗意識。」
甘霖輕輕點頭，眼神中流露出一絲憐惜：「嗯，老夫見到你嗰陣，真係嚇咗一跳。當時老夫即刻搵咗莫耶幫手，佢幫你檢查過，話你中咗加莉安娜嘅禁忌詛咒——『崩壞術』。」
「崩壞術？」阿夢瞇起眼，有啲驚訝。
甘霖凝重地解釋：「崩壞術係加莉安娜創嘅禁忌詛咒之一，屬於最高階嘅詛咒，會慢慢摧毀目標嘅身體同魔力。當時，我哋真係苦無對策，本身以為……救返你嘅機會唔大。」
「……」阿夢垂低頭，冇講嘢。
甘霖語氣一轉，露出欣慰嘅笑容：「但好彩，樂希喺你陷入昏迷期間，感動咗加爾安娜斯女神。女神透過樂希手上嘅聖彩之願，親自幫你解除咗詛咒。你渡過咗危險時期，但就一直昏迷不醒，直到而家。」
阿夢聽到呢度，先注意到自己身上著住普通嘅睡衣，仲感受到自己全身乾淨清新，隱隱散發住一陣清香，呢一切令佢微微一愣。
「我……訓咗好耐？都係甘霖大人你……照顧我？」阿夢害羞咁問。
甘霖笑咗笑：「係呀，今朝老夫先幫你沖完涼。你成個人乾淨哂，你嘅法袍同其他衣物老夫早就拎哂去洗，依家已經乾哂啦。」
阿夢一聽，臉即刻變得通紅：「啊……哦……」
甘霖見狀，哈哈大笑：「唔使怕醜啦！你訓咗咁耐，如果唔沖下，真係會發臭㗎。而且，老夫已經幫你沖過幾次啦。」
阿夢臉漲得更紅，低聲道：「多謝甘霖大人……」
甘霖溫和地拍咗拍佢嘅頭：「唔好咁講，老夫點會睇住你唔理呢？不過……話說回來，你啱啱提到學咗嘅法術，到底係咩法術？」
阿夢聞言，表情突然變得有啲猶豫，佢細細聲答：「……湮滅術……」
「湮滅術？加莉安娜創嘅最強法術……將一切化為湮滅……夢仔，老夫知你唔係壞人，但你學呢個法術做咩？」甘霖聞言，瞳孔微微一縮，神情變得凝重。
阿夢低頭沉默片刻，然後抬起頭，語氣堅定：「呢個……我真係暫時唔可以講住，但我可以保證，等到時機成熟，我一定會同你講清楚。」
甘霖凝視住阿夢幾秒，然後輕輕點頭：「好，老夫相信你。」
阿夢露出感激嘅目光，之後突然問：「甘霖大人，樂希呢？我想親自多謝佢……」
「樂希同佢啲隊友已經去咗瑪利安納雪原，佢親口同老夫講過。」甘霖回應道。
「瑪利安納雪原？」阿夢聽到呢個地名，眉頭即刻皺起，面色變得凝重，「甘霖大人，點樣先可以最快去到嗰度？」
「做咩咁急要去搵佢哋？」甘霖見到阿夢突然變得咁認真，好奇問。
「我有唔好嘅預感……」
甘霖聽到呢句，冇再多問，佢叫阿夢等等，走咗出去。返嚟嘅時候佢已經拎哂阿夢嘅法袍、魔杖等等，叫阿夢換返。
佢等阿夢換好衫之後，就帶阿夢離開醫療室，穿過聖殿內部，嚟到一間隱秘嘅房間。房間中央有一座散發住微弱光芒嘅圓形傳送門。
「呢個係聖殿嘅緊急逃生傳送門，可以直達王都聖水城嘅庇護所。你從王都到雪原，只係一步之遙。」甘霖解釋道。
阿夢望住傳送門，轉身向甘霖深深鞠咗一躬：「多謝甘霖大人你一直以嚟嘅照顧。」
「老夫會為你哋祈禱，夢仔，記住自己嘅初心，無論遇到咩事，都唔好被黑暗吞噬。願加爾安娜斯女神與你同在。」甘霖微笑著點頭。
阿夢冇再多講，佢企直身體，突然主動抱住甘霖，細細聲講：「多謝你……甘霖大人。願加爾安娜斯女神都與你同在。」
「嗯，去啦，夢仔，樂希佢哋需要你。」甘霖拍住佢嘅背，輕聲回應。
阿夢放開甘霖，轉身踏入傳送門，光芒一閃，佢嘅身影消失喺房間內。
甘霖望住傳送門微微一笑，嘆咗口氣：「呢個細路，真係背負咗太多嘢……加爾安娜絲女神，願你繼續保守佢。」
接住發生嘅事，就係早前所講，阿夢及時出現，消滅雪魔女，救出樂希佢哋。