梅蘭——為了夢幻日子得到保障，用惡夢結帳: 去留

「佢真係咁講？叫你做好安全措施？」沈綽聽著花玥盈的彙報，眼珠子都快要掉下來。
「欸……係啊。」花玥盈想了一整晚都還未想透梅蘭的意思。不過當她見沈綽反應這麼大，自己也莫名緊張起來。
沈綽也意識到自己的反應太大，只好深呼吸一下，讓自己冷靜下來一點。
「我覺得佢咁講，好大可能真係中咗愛滋。」沈綽搖頭嘆息：「佢再選落去都係垂死掙扎，當呢件事一曝光，佢可以話肯定會落選。」
「而我更加擔心嘅係，佢知道自己嘅情況都仲繼續同人拉票，明顯係傳播緊病毒。佢提醒我哋要做安全措施，就即係話佢知道自己係傳播緊病毒，唔想我哋都中招。」
「吓？」聽到這裏，花玥盈也終於理解到事情的嚴重性：「佢不停同人拉票，咁咪好容易傳播曬畀全部同佢做過嘅男同學囉？」
「冇錯。」沈綽補充道：「而且佢明顯係有心噉樣做嘅。」
梅蘭這個人到底在想什麼？沈綽完全無法理解。但若果她要自暴自棄，自尋短見的話，沈綽不打算給她陪葬。
「呢一點被人知道咗之後，恐怕唔係落選咁簡單。我哋最好儘快同佢劃清界線，到時候真係東窗事發，可能連我哋都會遭殃。」
「但係，點解佢要咁樣做？將病毒傳播出去對佢有咩好處？」花玥盈又問：「佢唔會係諗住搏人哋唔知掛？」


身為傳媒的她有個習慣：若果未拿得出一套完整的説法，就不能貿然報道。而且梅蘭與他們電視台的幾分薄情，也讓她對劃清界線這種説法有所保留。
對於花玥盈的問題，沈綽這次也沒有答案。她唯一可以肯定的是：梅蘭並非在賭別人不知道，相反地，她可能故意想讓人知道。
「如果佢想搏人哋唔知，佢就唔會叫你做安全措施。至少佢係有心畀你知嘅。」沈綽分析道：「而且你係做傳媒嘅。你知道咗，同公開咗呢件事有咩分別？佢甚至無叫你唔好同人講，即係話佢無諗過要遮住。」
花玥盈還想追問，卻聽沈綽反問：「你唔係仲諗住支持梅蘭吓話？」
花玥盈沉默不語，沈綽就知道不妙。
「佢而家係播緊毒啊！件事曝光咗之後，就算法律上證明唔到佢係咪有心播毒，告佢唔入，佢都一定會成為眾矢之的嘅。無論係政治上定係道德上，佢都無值得支持嘅地方。」
「但係萬一佢真係有苦衷呢？」花玥盈還是未能放棄：「既然佢叫得我哋保護自己，咁即係話佢唔係亂咁嚟，佢咁做係有原因嘅……」
「無論佢有咩苦衷都好，而家佢做緊嘅嘢都係禁忌嚟。就好似殺人咁，唔理你殺人係為咗替天行道定係為民除害，你都無可能將殺人呢件事合理化。錯就係錯。」
道理花玥盈當然都懂。但她還是沉默不語。明明她跟梅蘭也算不上什麼生死之交，但她就是無法下定決心。她仍然認為，這當中有着什麼隱情。
沈綽輕嘆一聲，也不願意再白費脣舌。她對花玥盈説：「一係你再諗辦法瞭解下先啦。你係做傳媒嘅，呢方面你更加在行。但我唔覺得你知道咗佢想做咩，我哋就可以唔使同佢割席。」


拋下這樣的一句話之後，沈綽便擱下花玥盈，離開了課室。
沈綽需要馬上聯絡霍超然和林天星。紅社必須儘快做好準備，不論是放出風聲還是正式發表聲明，都必須從速進行。
現在還不清楚丁香一方有沒有掌握梅蘭患病這個巨大的黑材料，但沈綽覺得，潘展樂墮樓到已經過了超過一週，心理輔導之類的應變措施，那羣老師想得到的都已經做了。若果現在丁香一方仍然無人懷疑，也實在説不過去。
下星期一就是選舉論壇，若果丁香一方要打擊梅蘭，便不會放過在論壇上公開質疑梅蘭健康的機會。就算最後梅蘭沒事，她的形象都會受到影響。更不用説在自證清白之前，梅蘭會失去多少拉票的機會。
而知道內幕的沈綽他們要打退堂鼓的話，剩下的時間不多了。