梅蘭——為了夢幻日子得到保障，用惡夢結帳: 力挽狂瀾
既然今天與梅蘭鬧翻了，凌峰自然沒有拜訪梅蘭家的理由。因此凌峰今天回家特別早。
只不過他回家以後第一時間跑回自己房間裡，把房門鎖上，把自己鎖在房間裏面。
凌峰坐在書桌前，無處宣泄的一口氣憋在胸口，憋得他面容扭曲。
「點解？點解呀？？」
凌峰的拳頭猛地錘在書桌上，發出了「砰！」的一聲巨響。
「佢點會係啲咁嘅人？點會……」
凌峰的手機響了。來電顯示是任志和。
他大概猜到了任志和是來説什麼的。他不想聽，感覺也沒有聽的必要。
梅蘭還選不選，她要不要自己幫忙，這些到已經跟凌峰沒有關係。凌峰已經公開表態不再與梅蘭共同參選。
手機放着不管，不久後便停止響鈴。但只安靜了幾秒，任志和又重新再打過來。
凌峰沒有接。他直接把手機關掉。
而這一關，就關了整個週末。
「所以你咁大口氣話要去搵凌峰，結果你係搵唔到嘅？」沈綽輕蔑地看着任志和。
為了儘快應對梅蘭的問題，沈綽、馬知行、花玥盈、任志和、霍超然和方文約好在星期一一早在沈綽的課室碰頭。
任志和上星期五跟着花玥盈和馬知行走的時候，放了話説他會找凌峰談談。結果原來他連凌峰的影子都找不到。
「咁我都無辦法㗎嘛！打極電話畀佢都無人聽。」任志和也是一籌莫展：「鏟埋上佢屋企都搵佢唔到，唔通我通靈搵佢咩？」
「咁梅蘭呢？邊個負責揾佢？」沈綽問眾人。
「我同花玥盈有搵過佢，但係佢同凌峰一樣，都唔再同我哋溝通。」馬知行回答道：「都上過佢屋企，但係無論我哋喺出面撳咗幾多次門鈴，對住佢屋企道門講咗幾多嘢都好，佢都無反應。」
「咁丁香呢？有無人搵過佢？」
這次，沒有人回答。
「所以即係話過咗一個weekend，結果一啲進展都無？」沈綽氣笑了：「當日個個都話我消極，話我諗住直接同老師講係睇住梅蘭死。你哋班人把口講到自己幾高尚幾偉大咁，結果根本咩都做唔到出嚟！」
「咁你又做過啲咩？」任志和不忿地說。
他不信沈綽就這麼一帆風順，明明最不想幫忙的就是她，如果她沒遇到困難，那倒也説不清是她真的沒遇上困難，還是她故意不幫忙。
「我揾到曾志明，問佢攞到今日成個論壇嘅流程安排，同埋一份標記曬今日各個區域劃分嘅，禮堂連埋後台嘅平面圖。」
沈綽從裙袋裏取出兩張折疊得很整齊的紙張：「資料喺曬度。」
「點解佢會肯理你嘅？佢唔係丁香嗰邊嘅人嚟咩？」霍超然問。
「我自願服務咗佢。」沈綽面不改色地回答。然後她又看向任志和：「如果你有睇我message嘅話我就唔使咁辛苦。佢嘅服務費你畀返我。」
任志和拔出手機查看對話。
「Oh! Shit!」
看到沈綽的訊息，他才發現自己在慌亂之中已讀不回了沈綽。
任志和是曾志明的下屬，他也有權取得今天安排的詳細情況。不過他並不是這次活動的負責人，所知道的不會有領袖生長那麼多。
「Sorry呀！」
「唔緊要。而家大家知道我真係想幫手嘅就得喇。」沈綽道：「我都更加體會到梅蘭佢做呢啲事嘅時候心情大概係點。」
為了某個目的，心不甘情不願地跟沒有興趣的男人發生關係……
對此沈綽雖然不樂意，但也談不上厭惡，畢竟強制服務也不能挑對象。
但對於那個明明比任何人都更加厭惡服務，卻比任何人更拼命主動提供服務的女生，沈綽只覺得她很傻。
若果推翻強制服務令是為了保護自己和所有女孩，那為了推翻強制服務令而主動承受身心傷害，難道不是本末倒置嗎？
不過沈綽沒再對此多説什麼，她默默地把手中兩張紙攤開，鋪在教師桌上。
「既然我哋呢個週末咩都做唔到，咁我哋只可以喺今日儘量見步行步。」沈綽看着任志和説道，眼神帶點不屑。
感受到沈綽視線的任志和縮了一縮。雖然他覺得沈綽只瞪他一個，而不瞪馬知行和花玥盈，自己有點可憐，但他也不好意思説什麼。
「本身我以為如果大家週末有啲進展，無論係梅蘭，丁香定係凌峰肯合作都好，都可能唔需要我大費周章換呢兩張嘢返嚟⋯⋯」
「得啦，佢哋知衰架喇。傾吓陣間點部署先啦。」方文再次充當和事佬的角色。
沈綽收回情緒，沉着地分析起兩張紙上面的資訊。
她先指着流程表：「根據Run Down，個論壇喺早會之後嘅第一堂就會開始。梅蘭同丁香會喺早會嘅時候就去到禮堂後台準備。」
「首先佢哋各自會準備一段片段或者簡報，介紹自己同埋政綱。每人5分鐘。跟住就係問答環節。不過呢啲唔重要。我哋淨係需要知道，喺早會嘅時候我哋就要揾到人。」
然後沈綽再指向平面圖。
平面圖標示着他們每一個人都熟悉得很的學校禮堂。一整個長方形的空間，在最左方另外間開了一個小長方形，中間標記着「Stage」一字。舞台兩旁的空間畫出了一些小範圍，標記了擺放道具和雜物的其他空間。
沈綽指着舞台左右兩塊標示了1和2的方塊：「梅蘭係二號候選人，所以左邊呢個寫住2字嘅範圍就係佢嘅準備區。而另一邊寫住1號嘅範圍，就係丁香嘅準備區。」
「我哋揾到佢哋之後要諗辦法令佢哋停手。老實講，我覺得如果可以令到丁香無辦法出席論壇，會係最好嘅做法。但係實際上點樣執行，我無咩好嘅idea。」
眾人安靜地聽着。顯然，他們也沒有什麼好主意。
「假設我哋無辦法阻止佢哋，我哋仲有一個地方可以留意嘅。」沈綽又指了指禮堂入口一側，用虛線畫出來的另一處長方形空間：「禮堂入口上一層係控制室，燈光音響嗰啲嘢都係喺呢度控制。如果真係阻止唔到佢哋，就去呢度熄燈熄咪，阻止成個論壇進行。」
説到控制室，眾人皆皺起了眉。
這個房間也算是閒人免進的重地，裏面的設備多半是由學校演藝學會的同學負責。雖然演藝學會的成員總歸是同學，比起一堆老師和職員要好說話一點，但被他們投訴胡亂闖入也是肯定會受罰的。
沈綽看到眾人神色有異，雙手抱胸説道：「呢個係最後嘅手段，迫不得已都唔會用。但係你哋講到大義凜然，想要阻止梅蘭做傻事，唔係連呢啲少少嘅風險同後果都唔願意承擔吓話？」
「唔係。」花玥盈答道：「如果有需要就等我去啦。嗰啲Panel同電視台嘅差唔多，我應該識用。」
但沈綽卻搖了搖頭：「唔好。陣間你要同我去搵梅蘭。去控制室嘅任務交畀馬知行。」
「我哋對梅蘭計劃嘅理解，大多都只係靠估，所以我哋唔知道梅蘭會唔會有後手。我哋兩個女仔一齊落禮堂搵佢，有咩事應對起來都方便啲。」
沈綽說着「應對」，實際上想着的卻是「制服」。若果真要動手，兩個女生負責下手會比男生方便。當然，能用和平的方式解決問題才是最好不過，但在局勢不明朗的時候自然應該作最壞打算。
「任志和、霍超然你哋兩個負責去搵凌峰。以佢同梅蘭嘅關係，佢出面嘅話，勸服梅蘭嘅機會會大啲。」
「剩低丁香，方文你幫個忙。」沈綽最後看向方文。
被點名的方文，眼裏閃過一絲驚訝。
「做咩呀？你唔係同佢識咗好耐㗎咩？」沈綽捕捉到方文的那一絲驚訝，問道。
「無嘢。只係估唔到我同佢明明咁耐無來往，你居然仲會記得我同佢仲有呢層關係。」
「都係一年多啲啫。同你哋同過班嘅人應該都記得嘅。」沈綽説：「不過就係因為呢層關係，你先係最適合負責揾佢嘅人。」
「你想我做啲乜嘢？」方文問。
沈綽的回答卻很簡潔：「到時候你會知。執生啦。」
她收回在方文身上的視線，轉而向全部人説：「其實我都唔多清楚陣間要點做。我始終認為呢件事我哋無能力好好處理。無論係令佢哋短時間內肯改變諗法，定係令佢哋上唔到台，或者令個論壇搞唔成……呢度無一件事係容易嘅。」
她語重心長地説着，讓每一個人都感受到她的認真：「可能你哋會覺得我一路喺度講晦氣説話，但我只係想誠實地講我嘅分析出嚟。就係呢件事唔會咁順利。大家最好有個心理準備。」
「我哋明嘅。」馬知行嘆了一口氣：「見步行步啦。」