冬甩的約定: 第三章：虛盼

「真係唔使錢？真係唔使付出任何嘢就可以拎到層樓？」
我繼續追問，聲音微微顫抖，似係想從對方口中聽到一個肯定嘅答案，又或者係想證明自己並唔係做夢。

「呢度啲樓唔係一層層咁計嘅，一間間咁計嘅。你見到嗰啲高樓大廈，其實成棟都係屬於地下嘅。咁你一個人住，點可能揀一間幾十層嘅大廈？你應該揀兩三層嘅複式屋。」

對方語氣平靜，但係我聽得出佢話中帶住一絲不耐煩，好似我係個唔識世界規則嘅白痴。即時佢補充：「Cathy都係咁，輕輕鬆鬆就拎咗間屋。」

我聽完之後，心頭一震。真係諗都唔諗到，竟然咁易就可以擁有自己夢寐以求嘅dream house，而且係前所未見嘅款式，就擺喺我眼前。

當然，我揀嗰間同Cathy嘅唔同。我鍾意啲靚靚哋、耀眼啲嘅設計，睇落要令人羨慕，令人想打卡嗰種。屋內裝修我鍾意豪華啲、色彩豐富啲。如果係現實世界，我肯定係個奢侈嘅人，一定肯花好多錢，將屋企扮到閃閃生輝。但係喺呢度，竟然可以全部免費！





從此之後，呢度就係我嘅落腳點——織綾大街57號，近轉角位。呢間屋係兩層複式設計，外牆係閃銀色金屬質感，屋頂有玻璃天窗，夜晚可以睇星星。入面係開放式客廳，牆身係深藍色，配住金色燈飾，好似置身夜空。廚房係開放式，設備一應俱全，連咖啡機都有。

個一刻，我真係覺得呢個世界實在太幸福。

「佢真係天真，以為呢個世界真係有免費午餐。其實佢死咗㗎喇，唔耐就會落地獄。而家只係俾啲甜頭你，畀啲希望你，畀少少你覺得幸福嘅感覺。到時你會慘過而家一百萬倍。」

呢個人喺牆角後面靜靜咁望住我，但我完全冇察覺到佢嘅存在。我已經得意忘形，完全唔覺得有危險。

我實實地享受呢種舒服嘅感覺，就咁過咗個懶洋洋嘅下午。外面陽光好猛，熱到我唔想出門。喺屋企度吹冷氣、躺低，當然好過喺外面焗死。我靜靜地瞓咗，一覺醒嚟已經十二個鐘。醒轉嗰陣仲以為喺發夢，點知我仲係喺呢個世界入面，從來都冇離開過。






「既然走唔甩，咁我真係冇辦法……」

我試過煮呢度嘅食物，亦都試過享受呢度嘅生活。開住電視，但係畫面冇，只得一堆雪花。原來所謂嘅電視台都係呃人，咁喺呢個世界睇雪花係一種樂趣？到咗所謂嘅凌晨十二點，雖然已經好夜，但係街上竟然越嚟越熱鬧。

屋企出面就係大街，旁邊係商場，後面係商店街。呢度嘅生活節奏，就係夜晚先至精彩。我喺門口望住，睇住呢個世界……睇住我點樣慢慢被吞沒。

我開始覺得唔舒服，好似有啲乜嘢唔啱。呢個世界太完美，完美到唔似現實。我開始懷疑，懷疑自己係咪真係仲活緊。我望住天空，雲都唔郁，好似一幅畫。我望住街上嘅人，佢哋笑得好假，好似戴住面具咁。我開始後悔，但我已經走唔甩。