冬甩的約定: 第四章：謊節

就似係一個祭典咁，咁熱鬧。大馬路上面有表演團隊，幾個大人抬住一個坐喺籐椅上嘅細路，籐椅底部係用兩支竹竿撐住，四個人就咁抬住一個人，而呢個細路仲執住一副妖怪面具。

冇人睇得出佢真面目。佢雙手都執住鼓，一支係玩具搖搖鼓。整隊表演都好開心，因為兩邊嘅人都興高采烈，歡呼，而且大馬路入面嘅表演團隊仲有好多隊，長到睇唔到盡頭。

我探頭出窗外問：「今日係咩日子呀？點解會有祭典儀式？」

我試住問身邊一個路人，希望搵到答案。

「今日係冬甩節，凌晨十二點會有表演，因為呢度係商業街之一，附近又有好多商場，每次搞祭典都會喺呢度。自製完之後個個都會食冬甩……」





聽完我都唔明，點解祭典完一定要食冬甩？呢度嘅人都咁鍾意食冬甩？冬甩係咁神聖嘅食物？

「你係咪覺得好離譜呢？你應該係過來人，慢慢你就會習慣呢度嘅嘢喇。」

我好奇問：「咁即係話你知道呢度係咩世界？」

「點解你咁問？」對方唔明我意思。

「因為我都係啱啱先嚟呢度，我唔知係咪死咗，跌落呢個極樂世界。呢度一切好似好真實，又似係好飄渺，若即若離咁……所以我真係想知發生咗啲咩事。」





「後生仔，住落去你就明喇。我講咗畀你聽你都係知啲唔知啲，或者你更加唔會明白，所以我唔會再嘥口水同你解釋咁多。」

我係咁都唔想留低呢個世界一秒。我覺得我一定要返現實。

「你嚟得呢個世界就已經避唔到，你要接受現實啦，後生仔。」

講完，佢又繼續開心咁參與呢場盛宴。雖然我對呢個祭典冇咩好感，但係祭典完之後真係有好多免費冬甩任食，食到你唔想食。呢種事喺現實根本無可能。

我慢慢行出街，想睇清楚呢個世界嘅節慶氣氛。夜晚嘅空氣帶住甜味，係冬甩嘅焦糖香，仲有燈飾沿住街道兩旁掛住，好似夢境咁。街頭有好多表演團體，有啲係跳傳統舞，有啲係玩音樂，仲有啲係扮鬼扮馬，逗小朋友笑。我行緊行緊，突然聽到有人叫我。





「Cathy？」

我喺屋前大馬路度，剛好冇咩人，我一睇就見佢喺對面。佢今晚著得好靚，我即刻有種戀愛感覺，於是直頭穿過人群過去。但係……表演團隊一直行緊，我點樣先過到對面。

「傻瓜，祭典就快完喇，你一陣先過嚟都未遲啦。」

Cathy竟然叫我等，仲叫我唔好郁。我冇出聲，

但係對呢場表演真係冇興趣。直到表演完結，我先至穿過馬路，同Cathy會合。

「呢度真係好熱呀……」我連係幾月都唔知，只知而家好焗。雖然唔係好滿意呢次相遇，但係大家屋企都唔遠，大概三條街咁。

「咁夜仲唔瞓覺，仲特登走出嚟……」我話。

「呢度咁嘈，瞓唔到啦。況且係一年一度，係一件好值得開心嘅事，點解要瞓覺呀？」





「你都講得啱……咁祭典完之後點算？」

「祭典完之後就會開始食冬甩，各個商場地下都有間舖頭，嗰度會有免費冬甩派。今次主辦機構整咗好多，而且仲誇張，任食唔嬲。」

佢講到咁，嘴角都流口水，睇嚟真係鍾意食冬甩。

「我都係啱啱聽到外面有好嘈嘅聲音，先至走出嚟睇下……」我話。

「你都係住附近？」佢突然驚訝咁問。

「係呀，我都係住你附近啦，就係呢間屋。」我指住我間屋。

「呢間屋你用咗幾多錢買㗎？應該唔平喎……」「下？呢間屋使錢喎？我喺你離開屋企之後經過一間地產公司，佢就介紹咗呢間屋企我，仲話係免費。我當時都嚇咗一跳。」





「有咩可能係免費呀？你唔好講得咁離譜啦……」

講到呢度，我先至知呢個世界原來都有錢呢樣野。係咪地產公司嘅陰謀？定係Cathy喺講大話？但係佢點解要呃我？我心知極樂世界冇免費午餐。

「雖然係有少少滑稽，我都知你唔會信啦。但係佢話呢個世界冇錢，我當時都信咗。」

「梗係唔信啦。不過照你咁講，嗰間地產公司喺邊度？附近幾時開咗間新嘅地產公司呀？」

佢拍一拍自己衣袖，話都唔理，走去後面商店拎咗好多冬甩。我見到咁，都順手拿咗幾個，但係睇到好多唔同味道，真係眼界大開。睇嚟呢個祭典係認真搞。

「我今晚會食到飽。聽日你嚟搵我，帶我去嗰間地產公司睇下，你覺得好唔好？」佢一手拎住好多冬甩，好貪心咁。

「咁你想幾點？」

「十一點啦。」





「朝早十一點咁早呀？你真係起得身？」

「夜晚十一點啦！朝早十點到六點呢段時間，我都係瞓覺。」

講完，佢就急急腳跑咗返屋企。我亦都要返左入去，試下呢個冬甩味道如何……