冬甩的約定: 結局：星落
不經不覺嚟到最後一日。
我朝早就起左身。
我獨自坐係梳化上，睇住窗外嘅風暴 ，仲係一片寧靜。
電視上，由早上七點到下午五點都冇節目，只會有雪花聲。
初初以為電視只係一件裝飾品。電話都只可以打通電話，冇其他特別用途 ——
得幾個數字按鈕、接聽鍵，就係咁樣一部舊式電話。娛樂大家好似除咗電視，就係去行街 ——
去嗰個 200 多層嘅商場。只係喺嗰度先有人來往，其他街道都係冷冷清清。我唔想離開，係因為認識咗 Cathy，係因為睇唔透呢個所謂嘅「極樂世界」。種種原因，都令我唔想離開呢個世界。就係咁，日復日咁重複咁過。
其實呢個世界係叫咩名，都己經唔重要了，呢幾日除咗同Cathy開檔，都冇乜去過其他地方探索呢個世界係乜。
................
屋企入面只係開咗一盞小燈，光線溫柔，好似唔敢驚醒呢個夜晚。Cathy 喺屋企度，坐喺床邊，雙手緊緊握住水晶球，好似握住呢個世界最後嘅光。我坐喺佢旁邊，冇講野，只係睇住佢。風從窗外吹入嚟，
吹起佢頭髮，吹起我心入面嘅痛。
Cathy 慢慢咁搖咗搖水晶球，細雪落下，似夢，似回憶。
「你走咗之後，我會繼續擺檔。」
佢講，聲音輕柔，但係堅定。我睇住佢，心入面一揪。
「唔好忘記我。」
我輕聲講。佢睇住我，眼神中係掩唔住嘅溫柔，仲有啲唔捨。佢冇喊，只係笑咗，然後輕輕咁講咗一句：「我唔會。」
「嘻嘻……」
佢補咗一句，好似一陣風，吹過我心。
「你會去邊？」
我問。佢冇即刻答，只係繼續睇住水晶球。
「唔知喎……可能係另一個世界，另一個商店街，
另一個你。」
佢講。我笑咗，但係笑得好苦。
「如果真係有另一個我，你記得要搵我。」
我講。佢點咗點頭，然後將水晶球放喺我手中。
「呢個係我送你嘅禮物。係呢個世界，我留低嘅記憶。」
我哋冇再講多話，只係一齊睇住窗外，睇住星。風好輕，時間好慢，好似呢個夜晚永遠唔會完。佢靠住我，頭靠喺我膊頭，好似一隻星，落低咗嚟。我哋唔驚離別，只係唔捨得。
唔捨得。
到左第二朝。
呢一日終於要嚟。
呢個早上，我醒嚟之後，腦海好似殘留住夢境嘅畫面，
似夢非夢，似真非真，好似有人刻意將啲記憶放喺我腦入面。我夢見一陣極其明亮嘅光，
由天而降，唔係太陽，唔係燈光，係一種唔屬於呢個世界嘅光，純淨、安詳、又帶住一絲威嚴。光中，有一個人出現。
佢身穿一襲潔白嘅長袍，衣角隨風輕揚，好似唔受重力限制。
背後，一對潔白嘅羽翼緩緩張開，每根羽毛都閃爍住柔和嘅光。
頭上，係一個圓形嘅光環，唔刺眼，但係令人唔敢直視。佢浮喺半空，腳冇踏喺地上，好似一早已經超越咗重力，超越咗呢個世界。我睇住佢，
心入面一陣震動。因為——佢唔係陌生人。係之前見過嘅嗰個男人。
係我喺極樂世界入面，曾經遇過嘅人。佢望住我，眼神唔係慈祥，亦都唔係嚴厲，係一種……睇透一切嘅從容。
佢開口講話，聲音唔大，但係響遍我嘅腦海：
「我係光軫。」
「唔係天使，唔係神，但係……
我係時空管理者。」
佢講到呢句，我心入面一震。時空管理者。呢五個字就好似一陣風，吹散咗我腦入面所有迷霧。
光軫靜靜咁望住我，眼神唔係威嚴，唔係冷漠，係一種似係睇住一個曾經迷失、但終於尋到出口嘅人。佢輕輕咁伸出手，指尖泛起一絲微光，好似風中嘅星火，搖曳不定，但係唔會熄滅。佢講話嘅語氣唔急，
每一句都似係慢慢由心入面流出來：
「或者……你當我係一個引路人。而家，我帶你返去現實世界，係呢幾日，你同 Cathy 一齊嘅事，令我都感受到……你哋嘅愛係真誠，係真摯。你感動咗我。係你，令我明白到，原來即使係極樂世界，都仲可以有真感情。你返去現實世界之後，雖然你對呢個世界嘅記憶會慢慢模糊，但係……我會畀你重遇一次，一個全新嘅 Cathy...」
「全新嘅Cathy?」我打斷左光軫。
「Cathy會出現起現實世界,佢唔會知道你係邊個，佢唔會記得起呢個世界你同佢一齊過，經歷過嘅嘢，不能開心唔開心，甚至你本人，你可以同佢撞返重新認識Cathy，但至於你哋係點樣再次認識，就要睇你自己嘅造化。」
光軫講完，就消失左了。
佢係喺玩弄我嗎？定係……佢係一個值得信任嘅人？
我唔知，我只係知道，我真正醒嚟之後就會返轉去現實世界。但我知道，Cathy 冇離開我。佢仍然可以喺我嘅生命入面出現，可以再同我重遇……
可能係人海茫茫當中，可能係一次無意之間嘅巧遇，又或者……只係輕輕擦過我肩膀嘅那一瞬。
我只係一個默默無名嘅少年……就係我同現實之間，突然出咗現一道光。
一道強光，瞬間爆發，閃耀過我嘅眼睛。始終都要……回歸現實世界。
一覺醒嚟，我慢慢咁睜開眼睛，望住天花板上閃爍嘅強光，腦袋仍然有啲迷迷糊糊……
醒番才知道自己係喺醫院，冇太多嘅移動，因為我仲未有嗰隻力量起身。睇到自己喺醫院躺緊，身邊有一個人。
「阿爸？？」我啲聲線沙曬，似係夢中醒嚟。
「你醒咗喇，阿仔，你訓咗有兩個禮拜喇。」
阿爸扶我起身，佢隻手微微顫抖，眼神中帶住一絲驚喜，又似係唔敢相信我真係醒咗。
「你唔係去咗避債咩？點解會喺度㗎？」
我問，語氣中帶住點質疑。畢竟，呢個男人曾經係連屋企都唔願返。
「我嘅野已經搞掂咗喇，醫院打嚟俾我，先知你暈咗。點呀，係唔係仲有啲赤赤痛？」阿爸講起話嚟，語氣都唔似從前咁浮躁，反而多咗一份穩重。
「暫時都無咩野既...」我慢慢咁伸一伸懶腰，試下起身，雖然腳軟，但係至少可以坐起身。
呢一刻，我真係冇咩大問題。唔耐，醫生知道我醒嚟，便前嚟檢查一番。
醫生睇到我有啲唔尋常嘅事，發覺到我嘅病奇妙咁自然好番。
「真係好犀利，呢位後生仔，咁快就可以好番哂。如果無咩事，聽日就可以出院喇...」
醫生托一托佢嘅眼鏡，跟隨嘅護士亦都隨醫生離開病床。我身邊嗰張床都有病人，佢哋唔自然咁聽到，聽到我嘅病情亦都顯然覺得神奇。冇諗到醒嚟第二日就可以出院，冇諗到一點後遺症都冇。
之後嘅老爸如常工作，冇人再跟住佢追債，冇人覺得佢係壞人，佢真係變咗。呢兩星期可以令一個人改變，絕對唔係容易嘅事。不過佢冇再去賭博，已經係奇蹟咗。
「阿仔可以醒番，真係不幸中之大幸，真係要多謝佢死鬼老母嘅庇佑...」
我回到家，見到老爸跪喺地上拜住老媽嘅神主牌。佢見到我，示意同我一齊去沙發坐低，將昏迷期間嘅事娓娓道來。講到戒賭、講到借錢、講到點樣一間間公司借錢還債，過程似係講一套電影劇本。
「阿仔，你醒番之後，諗住點？有咩大搞作...」
老爸問咗一個問題，一時間我都話唔出聲。
「我都唔知呀...」我低頭，望住自己雙手。從前我係一個毫無目標嘅人，但係自從去咗嗰個世界，見過 Cathy，我心裡有咗點光。
「阿仔，你都唔細，雖然話讀完書出嚟就想休息幾年，但你青年時間好寶貴，要好好珍惜呀，蘇州過後無艇搭呀..」老爸講。
「都唔知你講乜，我暫時都未有志向..」
我講完之後，返回自己床。一個好賭嘅老爸，變好咗之後就有資格可以話我？我提高我嘅被子，慢慢訓教。
「如果想搵野搞，老爸我可以資助你...」佢繼續講，因為屋企細，佢嘅說話正常音量我都聽得好清楚。
不過老爸還完債，點解仲有錢？我冇諗太多，繼續關閉自己一整天，直到第二日醒嚟。天光後嘅風景好美，從我家窗口望住，旭日初升轉太陽。起身嗰陣朝氣勃勃，只見到桌子放咗一封家書，定係一張支票，銀碼係十萬。
我拎起支票，睇咗又睇，心入面有啲混亂。雖然。一二十萬唔係大錢，但係以老爸嘅情況，點解會有呢筆錢？家書提及呢二十萬蚊用嚟比我打本做生意，而且更唔好問錢從邊度嚟，只要用心做好每一件事，老爸都可以撐我。
我試住打電話俾佢，原來佢好厲害，已經搵到新工作。頓時會心微笑，感受到老爸真係徹徹底底改變咗。而我呢？
都唔可以就咁放棄自己。既然一樣有 Cathy 同時都喺呢個世界，我更加要將我嘅幸福搵返嚟。
於是，我決定申請飲食牌照。去到食環署，係一間細細哋嘅辦公室，櫃位後面係一個戴眼鏡、面無表情嘅職員。我遞咗申請表畀佢，佢睇咗一陣，抬頭睇我。
「你係搞車仔檔？」
「係呀，賣冬甩泡麵同冬甩燒。」佢眉頭一皺，似係唔信。
「你有冇衛生訓練證書？」
「有。」
「有冇煮食經驗？」
「有。」佢睇咗我一陣，好似係睇一個怪人咁，最後話：「好，等我處理。」
我離開嗰陣，心入面有啲激動，亦都有啲緊張。呢一刻，我真係踏上咗新嘅人生階段。返到屋企，我決定將嗰段記憶寫落嚟。我坐低，打開電腦，開始打字。
「第一章....」我將嗰段昏迷期間經歷嘅事，全部寫咗落去。Cathy、光軫、夢中嘅美食車、仲有我點樣醒返轉頭。寫到最後一頁，我睇住螢幕，眼淚差啲跌落嚟。我將呢本小說命名為——《冬甩嘅約定》。
夢中嘅世界，喺現實延續。
之後。
我決定照夢中另一個世界模仿，喺現實世界搞一個冬甩泡麵，炒冬甩。我要用兩道食物嚟重遇佢，用我僅有嘅二十萬大元，搭建專用美食車。喺屋企一整日將設計圖弄得似模似樣。
如果可以將設計圖完整咁合成一輛美食車，簡直係太猛咗。最有幸嘅係老爸幫手當木工，將車都完整呈現出嚟。
老爸果然係木匠專家，可我就係冇呢方面嘅才能。然後將車仔油上色彩，跟夢中嗰架車大致上相似。我係憑印象記起嘅，所以總有啲瑕疵，不過總算係把車完成咗。最後放好設備，因為冬甩燒嘅煮食器材我冇有，亦都特別難搵，唔係一般嘅就可以，喺呢個問題花咗好長時間先解決到，當然最後都解決咗。
最後放好設備，因為冬甩燒嘅煮食器材我冇有，亦都特別難搵，唔係一般嘅就可以。喺呢個問題花咗好長時間先解決到。當然最後都解決咗。
冬甩，呢隻食物你會當係小食，甜點都可以。現實世界唔足為奇，但係要加入其他食材去融合，大大嘅冇諗到好奇怪咁。
事實上冬甩泡麵同冬甩燒對路人嚟講好新奇，完全冇人諗過會有人賣，係因為會中伏定係因為我擺檔嘅位置冇乜人經過。
呢日我喺接近海邊嘅梯口擺檔，微風正輕輕吹起，仲好唔熱，感到有啲涼快，係上班日，冇人嚟海邊，好正常。
點解要揀喺海邊，唔揀其他地方？因為海邊我覺得好浪漫，有寫意感覺。喺呢度擺檔令我嘅感覺倍添，食落去都係甜喺窩心。
冇人會嚟，我只係喺呢度等住第一位客人光顧。如係咁，幾個鐘都冇個人，我只好收拾車仔返屋企去。我深信會有人嚟光顧我嘅冬甩，我唔屈服嘅精神連老爸都問我：
「我真係好好奇，到底冬甩泡麵同冬甩燒係點諗出嚟，諗法好創新，我食落就真係比較焯頭。雖然我都唔知點解會冇人幫襯，都係嗰句，唔好放棄，堅持到最後你一定得嘅。」
我點可能同老爸講荒謬嘅長篇大論？極樂世界根本唔可能存在，老爸更加唔會相信。不過有咗老爸嘅鼓勵，聽日有咗新開始，再接再厲。
「用冬甩煮嘅新野？」第一眼望落去。
「Cathy？」我叫住。
「點解你會識得我㗎？」
我一眼認出嚟咗。冇諗到第一位客人係 Cathy，心情真係冇辦法用字句形容，實在太激動。
「你應該係唔記得咗我啦，唔緊要啦，我請你食冬甩泡麵，仲有冬甩燒。」
我開始煮泡麵，佢全程都係睇住我，冇離開視線範圍。
「真係好期待呀，用冬甩煮嘅新嘢，因為我好鍾意食冬甩㗎，嘻嘻...」
佢嘅笑容我冇辦法忘記，藏喺我心入面。唔變嘅味道都呈現喺佢眼前。冬甩泡麵同冬甩燒，我哋開始認識大家。雖然佢係我第一位客人，之後陸陸續續都有唔同路人，甚至遊客都有幫襯，連現視都有跟我訪問。一陣間真係大賣咗。年青人有嗰種創意同想像力，邊個諗得到係因為另一個世界先至有...我跟 Cathy 交換咗電話號碼，開始聯絡起嚟。
不過之後嘅我哋，又係另一個故事喇......
（冬甩的約定 全文完）