搭錯線：錯誤的時間遇上你: 第三章：命中注定的緣分

「家姐呀，你個中學同學係咪kam撚嚟㗎！」返到屋企，我忍唔住向家姐抱怨查利揚。


「我識左查理10年，佢個人雖然睇嚟kam，其實相處落都幾有趣，仲好細心，我當左佢係我好姊妹！」


好姊妹，的確係，男人嚟講佢算長氣。


「下次出街，你同我講聲，有佢冇我！寧願做你同你男朋友電燈膽，都唔好再比我見到佢！」






「哈哈哈，呢啲係咪叫同類排斥？你地啲中史人，仲以為你地可以做知音人。下次我叫返yumi過嚟陪你囉！」


「叫返yumi過嚟就差唔多，起碼女仔仲可以傾下化妝護膚野，唔似得個老屎忽！佢教緊邊間中學，個到啲學生慘啦！」


「佢係大西北官校教緊書，你放心啦！」






「官校？點都唔會調過嚟九龍灣啦！」


呢度講返聲，官校制度係老師會調校，無論老師係邊間學校任教，上面話調就調，每年總有人事變動，好少老師會係同一間學校任教10年，最多耐既老師做到退休，但呢啲例子只係得一兩個。


「通常電視劇漫畫咁講完，就真係會成真。」我家姐笑住講。






「呢度係現實，唔係電視劇同漫畫。如果咁都中，我可以做預言家，將來我會做中史老師都得啦。」


呢個故事教訓我地唔好亂講野，即係烏鴉口。


因為九月開學，我見到查利揚著住西裝，出現係出學禮上。


-

九月一號，係普遍香港學生最驚同憎既日子。


半年過去，我成為中五學生。






「唉，好唔想返學，好彩仲有Miss Chan既中史堂。」


小息時間，梗係去隔離班搵老best katy吹水，佢同我一樣都係修中史，另外佢讀生物同化學。


「聽講Miss Chan比人調校，首席愛徒你慘慘豬，要傷心好耐啦！」Katy同我講。


「Miss Chan要走？點解我唔知㗎？」我即刻大嗌。


Miss Chan係教我中史既老師，身為中史全級第一既我，當然佢好睇重我。






咁大件事，點解事前一啲消息都冇？


「我都係琴日先知，原來Miss Chan升職，去左筲箕灣個間做副校。」Katy食住珍寶珠講。


「官校就係咁，就算我地就嚟考DSE，老師都唔會跟足3年，隔離B班，都轉左通識老師。」


「佢地老師都調校咩？今年咁多老師走？」我真心疑惑咁問。


Katy笑一笑，繼續講：「佢去左教Form 3 bio，所以有新嚟老師教通識。」






「下！官校真係好騎呢！就算老師係原校，都唔會教足3年。」


「叮噹叮噹叮噹叮噹。」


「陣間開學禮有新老師，我地睇下新中史老師咩人。」講完呢句，Katy拿拿臨咬埋珍寶珠返班房。


一班男女魚貫地行入禮堂。


「大家好。歡迎大家返到九官大家庭……」






又係一年一度廢話時間，呢個時間當然唔可以用手機睇書度過，聽到瞓著又會比人叫醒，所以一般學生當然遊魂，包括我。


「好啦，依家我地介紹嚟觀官既新老師。首先金光緒老師，負責教中文，同時係3A班班主任……」


望住台上多面新面孔，當我嘗試估下新中史老師係邊個既時候，我對眼停留左一副熟悉臉孔。


戴住圓框眼鏡，身穿一套黑色筆直西裝，手放係旁邊，等待校長介紹。


下一秒，我同佢對望左。


我冇認錯人，就係半年前幫我求籤，家姐個中學朋友──查利揚。


「由於陳老師去左筲箕灣官立中學擔任副校長，所以我地嚟左新既中史老師──查利揚老師，佢負責教中史。」


我心中晴天霹靂，點解我新既中史老師，會係一個kam人？


我為半年前所講過既說話後悔，今次係我錯……


查利揚聽住校長既介紹，微笑咁點點頭。


然後我地再次對望。


呢個消息實在太驚嚇，驚嚇程度好似你個陣有exam or present，就嚟遲到，趕去搭巴士，當你跑去巴士站個陣，架車啱啱開走左，個一刻既你，流既汗並唔係跑步既汗，而係絕望既汗水。


我一時之間反應唔切，就避開左佢既眼神。


嚟緊兩年，我最鍾意既中史堂，一個cycle 起碼都要見足佢成5日。


而個陣既我未知，未來既我係會咁期待上既佢中史堂。