搭錯線：錯誤的時間遇上你: 第四章：錯配關係的開始

返到屋企，過多幾個鐘，終於等到家姐放工。


家姐入屋除鞋既時候，我已經急不及待去問：


「家姐，你知唔知你個kam中同過左嚟教書？」


「查理佢有同我講調校，詳情我都冇問佢。睇






你咁心急既樣，佢調左過嚟九官咩？」


「唔只調左過嚟九官，仲要佢教高中中史，嚟緊2年我都要對住老屎忽。」


家姐聽到笑不攏嘴講：






「哇，你地都幾有緣，咁多間官校咁都撞到，仲要中史咁冷門都撞到喎！」


「家姐，你咪係到講風涼說話！」我忍唔住拍左佢膞頭一下。


「喂！咪郁手呀你！我都係講事實。查理幾好呀，感覺佢教書都係認真細心既人。」家姐笑住擺擺手。






「係咪因為佢係你中同，你先咁幫住佢，依家唔理理個妹感受！」


「你唔好咁激動，我都係同你分析事實既利與弊。事實對你都有好處，換左個新老師，你中史一定好有得著。想當年你家姐，我係中史堂成日瞓覺，跟住啲論文唔識寫，都係佢教我，我先識寫。」


「我覺得你似懶多啲，想揾人抄功課。」我吐吐舌頭。


「喂～我認真同你講，聰明人讀中史係融會匯通，唔係死背書入面既論點，係用自己文字寫論文出嚟。係我眼中，查理真係有料，你諗下你家姐我係第一屆DSE考生，冇任何PP情況下，好難估考評局出咩，佢仲要拎到5**喎！」


「中史唔死背點得，背熟再將書入面內容再答返。中間過程係花時間，但出嚟效果係好。」






「Hailey，你只係讀左一年中史。清朝既鴉片戰爭之後，特別民初既軍閥混戰，就會好唔同。照你咁温法，時間好長，成效都唔高」


「你中史dse又唔係特別高分，Miss Chan話我有potential 拎5以上。」


「唉，我都係好心提你，你唔信我就算。」家姐攤攤手。


-

今日係中史第一堂。


「Hailey！」Katy同我揮手。






「Katy 你做咩坐第一排？坐後啲啦！」


「Hailey你平時唔係鍾意坐第一排咩？況且坐第一排，老師容易記得我地，將來問野都方便啲。」


坐第一排咪距離查利揚最近，我唔要咁近距離比老屎忽叫答問題。


「下，但係……」我話口未完，查利揚已經人左班房。


「同學隨便坐就得，我上堂好隨意。」






查利揚望住揀緊位既我講。


因為上中史堂既學生唔多，嚟既人都已經揾位坐好。


我唯有坐係班房第一排正中既位置。


「自我介紹先，我係新嚟既中史科老師查利揚。」


查利揚係黑板用粉筆寫低佢個名。






利係勝利個「利」，揚係飛揚個「揚」。


查利揚。原來佢個名係咁寫。


查利揚接住講：「你地叫我做查老師，或者查Sir都得。如無意外剩低兩年都會由我教你地，所以大家多多指教。大家有唔明，可以whatsapp私下dm我。只要我未瞓，都會覆大家。」


「另外我想問下邊個係科長？」


我舉手講：「之前Miss Chan係到個陣我係科長。」


「同學你叫咩名？」


「我叫盧正希，Hailey。」


「Hailey，我陣間落堂會比我個電話號碼比你，你幫手加其餘同學入whatsapp group。」


我點點頭。


過程中無論係眼神定言語，我地都好似初次見面。


「咁我地開始上第一堂。我事先講，我教書唔用教科書，會用我自己整既筆記。


之後佢係袋拎左一疊厚厚既筆記，交比我派。


唔知未來兩年，中史堂會係點度過。


查利揚成為我既中史老師，佢會係點樣既老師？


個陣既我望住筆記諗左好多野，個一堂都冇點專心聽。


而我並未知道，後來我會越嚟越依賴呢位中史老師，習慣左搵佢教我答題，習慣佢既秒回，更習慣佢既存在。