搭錯線：錯誤的時間遇上你: 第五章：「屌你」

「叮噹叮噹叮噹叮噹。」
 
「好，今日講到呢到，各位同學再見。」
 
「Goodbye and thank you Mr Cha.」
 
「科長！」查理揚叫我。
 
「我地出班房先講。」
 




我跟住查利揚出去班房門外。
 
「科長，呢度係我電話號碼，你開一開手機save低佢先。」
 
「好。」
 
科長科長，你依家唔識我咩。
 
雖然新嚟既老師，唔記得學生名好正常，但係我地有見過面。
 




諗到呢度，我少少唔開心，下意識木無表情咁輸入電話號碼。
 
「頭先我見你心不在焉，係咪我講野太悶？」查利揚突然提問。
 
「唔係，你教書幾好呀。」我微笑講出官方答案。
 
「咁我頭先講左啲咩？」
 
「第一次鴉片戰爭背景。」
 




「背景我講左啲咩。」
 
「Errr....英國同中國。」
 
「身為科長，要專心上堂喎！你依家係whatsapp send message比我先。」
 
又科長。我求其㩒左個常用sticker比查利揚。
 
「我收到你個message。不過你唔好咁send message比其他老師，佢地會覺得你冇禮貌，比人觀感唔太好，我個人冇咩所謂，唔代表其他老師都係。」
 
佢點解話我冇禮貌？冇禮貌個位係佢，科長前科長後。正常你識嗰個人，你應該叫佢個中文名或者英文名。
 
同埋佢性格都叫隨和？老屎忽就有佢份？
 
我忍唔住反駁：「我只係send左個sticker，冇正式係whatsapp同你打招呼，唔算冇禮貌既行為。況且查sir，頭先我堂上有講過，我叫盧正希Hailey，你可以叫我Hailey，你本身知我個名，唔洗成日叫科長。特別我係科長，成日揾既話更加叫返我個名會好啲。」




 
「Hazel個妹Hailey，直話直說呢點好似你家姐。不過呢度係學校，我係老師你係學生，叫返科長係因為你身份係科長，下次叫返你
 
Hailey，尊重返你既意願，同埋你睇下你send 過嚟個sticker 先。」
 
我不情願打開whatsapp對話。
 
入面sticker係一隻白色兔仔，舉牌寫住「屌你！」
 
羞恥感頓時湧上臉上，令兩邊臉頰紅通通。
 
「唔緊要啦傻妹，你whatsapp揾到我就得，你放學用手機記得加其他人入group。」
 
我點點頭，頭也不回急步去廁所。
 




我好樣衰，好撚柒呀。
 
依家醒起鄭家穎個張「呀」圖。


如果呢度係屋企，我一定會呀一聲。

可惜呢度係學校，我只可以用水沖臉。

查利揚講得啱，呢張sticker 如果send左比其他老師，應該仲尷尬，特別訓導組個班。
 
我要慶幸，係Send左呢個sticker 比佢。