搭錯線：錯誤的時間遇上你: 第六章：失手

放學我同Katy去老麥食下午茶。
 
我同查利揚識既經過，以致頭先發生既事，一五一十咁同katy講晒。
 
「笑死，Hailey你同查Sir 好搞笑。我覺得查sir個人都算nice，起碼冇話你或者黑你面先。」Katy食住麥旋風講。
 
「我唔鍾意佢係咁叫我科長科長，明明佢都識我，我都有名。我啱啱開左群，你睇下收唔收到notice。」然後我食啖雙層芝士孖堡。
 
「收到。不過我覺得查sir個人純粹公私分明，所以先叫你科長，同埋佢主要新嚟，有返啲距離比其他人望落觀感好啲。同埋都佢記得有見過你，半年可以發生好多事，證明佢對你都有印象。」Katy繼續食雪糕。
 




「講得啱，我純粹唔鍾意佢扮唔識我，感覺冇禮貌。不過今次的確係我錯，send左個屌你sticker，我係咪要喺whatsapp同佢道歉？」
 
「直頭要啦！」Katy食緊雪糕講。
 
「我應該點講好？」我開住手機screen講。
 
「唔講啦，啲雪糕就嚟溶！」Katy大啖啖吸入雪糕。
 
呢個Katy淨係識得食。
.




食完老麥，我同Katy分開返屋企。
 
Katy住九龍灣，而我住黃大仙，所以佢行返屋企，我就搭地鐵。
 
搭車途中，我係到諗點樣同查利揚say sorry，畢竟佢依家係老師，我係學生，尊卑有別。
 
加上嚟緊兩年都比佢教，點都要打好返關係。
 
於是我whatsapp打左呢段文字：
 




「查sir，今日的確係我冇禮貌，身為學生，老師係長輩，我應該時時刻刻尊敬老師。日後我會遵守學生應有既本分，以及努力做好科長一職。」
 
然後再send 個sorry sticker比查利揚。
 
我send完5分鐘後，收到notice。
 
「唔緊要，聽日記得專心上堂，有唔識隨時搵我。」
 
「妹妹，校內我地係師生關係，校外都算係一場朋友，日後我地輕鬆啲相處啦！」
 
收到查利揚既message，我即刻放心晒。感覺好似佢所講，佢個人都算隨和。
.
「Good morning class.」
 
「Good morning Mr. Cha」




 
「今日我地要講鴉片戰爭發生既經過。」
 
我琴日都冇點仔細睇佢既厚筆記。
 
佢筆記唔似教科書，point form一堆密密麻麻既字。筆記淨係簡單講出重點，對我嚟講佢係認真準備教材，畢竟中史咁多內容，要整理一定要好多時間。
 
如果考試照佢筆記咁溫，內容唔夠仔細，我都係返去背書算。
 
我默默打開教科書，只不過我有我睇，佢有佢講。
 
後來既堂我連佢既筆記都冇打開，睇教科書highlight重點，用佢上堂時間去溫書。
 
咁既情況持續到去mid term。
 




考試範圍由鴉片戰爭去到清末，教科書成100幾頁。
 
除左呢科，我仲有5科要讀，真係放唔到咁多間去溫中史。
 
結果今次mid term成績，係我意料之外。
 
「今次中史第一名係Katy，第二名係Amy，第三名係Tracy。」查利揚公布名次。
 
Katy不嬲都係第二名，點解佢會變左第一？我點解連第二同第三名都冇？
 
咁我幾多分？我第幾名？
 
原來，天才都會有失手既時候。
 
我諗返起家姐同我講過，我既讀書方法太費時，遲早會滑鐵盧




 
只係我冇諗過第一個學期既Mid term就失手。