搭錯線：錯誤的時間遇上你: 第十一章：意外的守護者

查利揚突然靠近我，細聲咁講左句：「Hailey，你部手機比我。」
 
我戰戰兢兢咁比左部手機比查利揚。
 
原來我唔係衰係訓導，係衰係….
 
「喂，你係咪盧正希媽咪？我係查Sir，教正希中史㗎，佢今次考到中史全級第 一，真像好叻女，我想問中三選科講座，可以揾佢講讀書心得。」
 
等等先？查利揚係到講咩？
 




查利揚講呢番說話既同時，訓導主任同校隊經過小賣部，上樓梯離開。
 
「明白明白.......」查利揚一邊講，眼睛卻向住訓導主任方向，見到佢地已經上左樓梯，影都冇見。
 
「Hailey，比返部手機比你。」查利揚將手機比返我。
 
我睇到佢cut 左katy線，費事我部手機再響。
 
「你點解....」我盯住查利揚，說話卻卡係喉嚨。
 




你點解唔罰我，仲幫我講大話？
 
「下次記得入學校熄手機，我買飯先啦！仲有食埋啲菜，小朋友要均衡飲食呀！食飯唔好温書！」講完呢句，查利揚指指我枱上面既筆記，就行左去買飯。
 
「咩小朋友...我依家係中五學生，出年都十八歲，拎得成人身份證...」我細聲嘟嚷。
 
明明只係幾步之隔，佢闊膊的背影卻令人好安心同可靠。
 
等等先，依家幾點？
 




我望到小賣部個鐘，1點10分。
 
我拿拿臨將未食完既飯dum落垃圾桶，我唔鍾意食菜，Dum晒佢，眼不見為淨。
 
然後去廁所睇katy message。
 
「Hailey，我依家係球場，近住後樓梯個邊，你快啲嚟啦！」
 
「做咩call咁多次都冇反應？」
 
「就嚟開波，我唔理你先！睇字即到2樓！」
 
睇到呢到，我拿拿臨由小賣部跑去球場。
 
原來咁多人係到睇波。




 
突然諗緊呢5年，我都未試過睇人打波。
 
第一睇唔明籃球玩咩，第二我對入面既人冇興趣。
 
遠處我見到短髮心心眼既katy，於是我行過去搵佢。
 
「唔該，唔該」幾經辛苦，我終於湧入人群中。
 
「Katy！」
 
「Katy？」
 
搞咩，佢完全冇反應。
 




Katy全神貫注咁睇住籃球男孩，可以用「陶醉」二字形容。
 
我唯有瘋狂，以及連續式拍佢膊頭。
 
「你終於到左啦。啱啦，專心睇波！」katy眼睛繼續向住前方。
 
我嘗試專注睇佢地打籃球。無幾耐，我就拎起手上既筆記温書。
 
「喂！喂！喂！」我感覺有人叫緊我。
 
眼前有個籃球迎面而嚟，我要準備「食波餅」。
 
突然有個高大身影既男生，飛快接住左籃球。
 
佢有頭清爽既淺金既頭髮，深邃既雙眼，高挺既鼻子，小巧的嘴巴，修長的臉蛋，目測有180以上，近190？




 
「師姐，你冇事呀嘛？洗唔洗去醫療室。」
 
「唔洗啦，真係唔該晒你。」
 
我望一望球場，原來依家我係焦點。
 
佢地都停左練波，望晒去我個邊。
 
「Felix 英雄救美，嗚嗚嗚….」
 
全場起哄，令我臉頰好似蘋果一樣紅。
 
「喂，你地咪嘈。夠鐘換衫，午息就嚟完。」Felix抓抓頭講。
 




我見到Felix背影，佢耳仔少少通紅，睇嚟唔只我一個尷尬。
 
「好囉，我地換衫先，你地慢慢傾！」珍寶珠男孩講左呢句。
 
「Kyle你條友仔！」Felix睥住Kyle。
 
然後籃球隊既人都走去換衫。
 
當我諗住搵katy既時候，發現katy同緊kyle講野。
 
我轉身想走既時候，有人拉拉我隻手。
 
「Errr… 話曬啱啱我都幫左你，em….你可唔可以同我講你叫咩名？」Felix靦腆咁講。
 
「我叫Hailey 。你係咪叫Felix ?」佢竟然問我叫咩名，我有啲愣然。
 
「咦，你知我叫咩名，今日識到你我好開心，你下次會唔會睇我地打波，我地逢午息就係呢到練波。」Felix好興奮咁講。
 
「啱啱你啲朋友叫你Felix，所以我先知。今日我都係陪朋友嚟，佢嚟我就應該係到。」
 
「哦，係呀…」Felix睇落有啲失望。
 
「叮噹叮噹叮噹叮噹」
 
「唔緊要，我地遲啲學校見到面就打招呼啦！」Felix再次展開笑顏咁講。
 
「好呀，拜拜。」我地互相揮手。