搭錯線：錯誤的時間遇上你: 第十二章：苦

「老闆娘，唔該我要芒果小丸子，同埋椰汁西米露，多西米唔該。」katy同糖水鋪嬸嬸講。
 
「好既靚女，麻煩你等等。」嬸嬸聽完去。
 
「Hailey你今日真係搞笑，點解可以啱啱好就食波餅？」我見到Katy嘴角不斷向上揚。
 
「都係因為陪你睇波，我不嬲對睇波都冇興趣。仲有Katy你唔洗忍笑啦，我知你依家忍笑緊。」
 
「哈哈哈哈哈.....Hailey 出醜係出醜，不過有人英雄救美，我係旁邊都嚇親左，你真係要多謝金毛小弟弟。」
 




「嚇親？仲有金毛小弟弟叫Felix。」我向Katy補充。
 
「因為籃球嚟個一剎那，電光火石之間係佢飛奔過嚟救你。如果冇左佢，你腦震盪都似！你要好好多謝人地！」Katy奸笑講。
 
「我已經多謝左佢。係呢，你同珍寶珠新進展點呀？」
 
「我將個廿蚊去左買珍寶珠，然後分左一半比佢，你知珍寶珠根本唔洗咁多錢。」
 
「咁你知佢叫咩名未？」
 




「Kyle。我仲同佢講，睇佢打波覺得好有趣，未來既午息，Hailey會陪我㗎可？」Katy用一對閃閃發光既雙眼望住我。
 
「好好好。」如果對象唔係Katy，我絕對唔會應承。
 
「小姐，呢到係你地兩碗糖水。」
 
「唔該。」我同katy 一齊講。
 
「係喎，點解今日我打左兩次電話比你，你都冇聽，第二次仲要CUT我線，仲之後咁遲先到？」Katy食住椰汁西米露問。
 




聽到呢到，我原本想食第一口既芒果小丸子，都停低左。
 
「你仲好講，就係因為你打比我，第一次響個陣見到查Sir，我都走唔切。」
 
「下，咁你有冇比查Sir聽到手機震？」Katy停低食野，緊張咁問。
 
「第二次你打過嚟，訓導係後面經過，好彩查Sir扮打電話比我阿媽，先冇事咋。」我嘆左口氣講。
 
「查Sir對你咁好既，不但冇捉你校內用手機，而且仲幫你呃訓導。如果我下次手機響，佢咁好人，會唔會都唔捉我？」
 
查利揚對我好？如果當時嗰個人唔係我，佢會唔會都採取一樣既行動？
 
「可能會呢，哈哈……佢凌晨都會覆學生既好老師。」我擠出一個笑容，但笑得有啲勉強。
 
「呢個真。查Sir話我地幾時問功課都得，我試過1點揾佢，佢真係online覆我。」




 
我舀起一匙芒果，放入口中。
 
「好凍，同埋點解今日啲芒果咁苦。」我皺眉咁抱怨。
 
Katy輕手舀咗一口芒果放入嘴度。
 
「唔苦喎，仲好甜添，仲有芒果小丸子梗係凍啦。你唔食，我食埋你個份㗎啦！」katy揮動匙羹講。
 
「你唔驚肥咪食！」然後我舀返佢啲西米食。
 
「喂！你仲要舀咁多西米！」katy即刻舀返我啲芒果同大量小丸子。
 
成碗芒果小丸子，基本上比katy食左一半。
 




芒果明明係甜，點解我會覺得苦？
 
如果查利揚對其他人同我一樣都咁好，咁代表佢係好老師，對大家一視同仁，咁唔係好事咩？
 
點解，我希望佢會對我，會同其他人有唔同？