搭錯線：錯誤的時間遇上你: 第三十八章：保護

我一返到屋企，就WhatsApp查利揚，而查利揚覆左個Goodnight emoji 比我。
 
我同佢好似啲情侶拍拖，嘻嘻！
 
「你一定好開心啦，felix成日講笑話比你聽，查sir幫你包傷口，佢對你真係特別唔同，如果我係你就好…」
 
我個腦突然浮現呢句說話。
 
我睇睇WhatsApp，我同Katy既對話已經開始沉落底。
 




我聽日返到學校，一定要揾Katy講清楚！
.
星期三，當我小息諗住去隔離班揾Katy，班長卻叫停我，話班主任Miss Tsang揾我，要去教員室一轉。
 
我冇欠交功課，又冇做違規事情….唔係捉我偷用手機呀嘛？全級大把人都用，淨係捉我一個？
 
我抱住戰戰兢兢既心情去到教員室，對住咪講：「唔該我想揾Miss Tsang。」
 
Miss Tsang從教員室出嚟，佢行左去後樓梯個邊，比較少人經過既位置。
 




「Hailey，唔怕我開門見山咁講，我知道你同查Sir關係好好，但係佢係老師，你係學生。琴日查Sir同你放學，訓導主任見到，今日佢叫查Sir去訓話，我知你地係冇野，只不過我覺得你地有需要避忌。」
 
「我同查Sir冇野，只係我琴日整Board整到八點，佢見時間晏，所以先同我去地鐵站，查Sir都搭地鐵，無理由避忌到要分開行？」
 
「Hailey，睇嚟你唔明我頭先講咩，我意思係佢係男老師，你係女學生，本身呢種關係就係要避忌二人獨處。」
 
「Miss Tsang，女老師同男學生一齊，咁點解訓導老師唔覺得有問題？同性老師同學生，都可以有問題㗎，兩個人既性取向都可以同性。」
 
Miss Tsang嘆左口氣，扶一扶額頭講：
「Hailey，就算你頭先講既野冇錯，但社會目光下，男老師同女學生就係有問題。一個老師如果有唔好既傳聞，影響專業形象，對佢嚟講會係好大既打擊，簡單啲嚟講，教師界就會冇佢既立足之地。呢個唔係已經唔係對與錯既問題，而係社會刻板形象，你同我都唔會改變到。」




 
我聽完Miss Tsang一番說話，一時作唔出反應。
 
Miss Tsang繼續講：
「主要訓導主任都有揾過我，我同意佢睇法，你地兩個都要注意下，唔好比旁人落下詬病，你諗下附近街坊經過，見到男老師同女學生行埋一齊，唔單止影響校風，仲會覺得男老師唔檢點，你要知道查Sir會係比人鬧得最勁。Hailey，我講到咁，你應該明啦。」
 
「Miss Tsang，我明啦，我仲有功課未做完，返上班房先。」我急忙講完呢句，就跑走左。
 
只要查利揚越對我親切，佢受既傷害就會越大。
 
我唔可以因為我既感情，而影響到佢既職業。
 
淚水逐漸在眼眶打滾，我抽抽鼻子，跑去最近既廁所。
 
「砰！」我鎖左自己係廁格。




 
「鳴鳴鳴…」
 
我諗起新聞，周不時報導師生戀，都係放大男老師嚟講，因為佢地心智年齡比較成熟，有責任控制自己感情。相反女學生往往被塑造受害形象，心智未成熟，好多時候比老師騙去感情。
 
事實上，新聞報導係咪代表事實全部？
 
「你要知道查Sir會係比人鬧得最勁。」Miss Tsang呢句說話狠狠打醒我。
 
我諗我知道我要點做。
 
我要保護查利揚，佢一定要繼續做老師。就算佢永遠都唔知我既心意都好。
 
我抺過眼角既淚珠，依家我唔可以喊，查利揚處境一定比我更加困擾。
 




不過我係廁所喊左幾耐？
 
我望望手機時間，依家係11點，小息距離依家過左15分鐘。
 
換言之，我遲左15分鐘都未返到課室。
 
仲要咁啱上中史堂，連續兩堂。
 
我從廁格出嚟，鏡中反射既我頭髮凌亂，眼腫鼻紅，係人都知我啱啱喊完。
 
我拖住疲倦既身軀，離開廁所，行樓梯上班房。
 
我打開中史課室既門，中史班10幾對雙眼望住我，陪隨同學既竊竊私語，我垂低頭行埋位。
 
「Hailey你點解咁遲嚟，係咪唔舒服？」查利揚擔心咁問。




 
「我頭先肚痛，先搞到遲左上嚟，依家冇事。」我迴避查利揚既目光。
 
旁邊既Katy默默望住我，我轉過頭，並打開筆記。
 
.
「我地依家抖5分鐘，返嚟做PP。」查利揚講。
 
我離開座位，行上老師枱個邊，講：
「查Sir，我有啲重要野想同你講，可唔可以出班房講。」
 
查利揚點點頭，我地就係課室出面條走廊。
 
我深呼吸，講：「查Sir，我覺得我唔可以再幫你搞選科講座個攤位。」
 




眼前既查利揚從平靜的眼神，突然浮現一絲錯愕。