搭錯線：錯誤的時間遇上你: 第三十九章：幸福？

查利揚聽到之後，有啲震驚，問：「點解咁突然？」
 
「Um…你都知中五學生幾忙，最近臨近Mock，我想用啲時間去温書。」我求其搵個藉口搪塞。
 
「係咪有人同你講左啲咩？」查利揚凝重咁問。
 
「唔係，純粹係我個人意願，希望查Sir可以尊重我。」我用堅定既眼神望住佢講。
 
「Hailey，我地關係光明正大，係老師同學生。要因為啲流言疏遠，反而更加證明啲人講得啱。我信清者自清，只想你唔好受影響，做返自己。」查利揚冷靜咁講。
 




「唔關其他人事，係我唔想做，我會揾班上面其他人幫你手。」我垂下頭，轉身走。
 
「Hailey，你再考慮下，依家你唔洗揾人，講座前一個星期，你再比答覆比我，頭先既請辭我當冇聽過。」背後傳嚟查种揚既聲音。
 
我停下腳步，然後繼續行返去班房。
 
Katy恰巧去完廁所，經過我同查利揚旁邊。
 
唔知佢聽到我地幾多既對話。
.




「叮噹叮噹叮噹叮噹。」
 
「Hailey 我有啲野想同你講，你方唔方便抽5分鐘比我？」Katy拉一拉我隻手講。
 
「依家放Lunch，你去我班房個邊講。」我講。
 
Katy一如以往坐左係我隔離。
 
同以往唔同，依家氣氛充滿尷尬。
 




「Sorry Hailey，上星期五我唔應該發你脾氣。你同Felix始終係你地兩個人既事，我只係旁觀者，唔應該介入。」
 
「Hailey，一直以嚟，我身邊雖然有好多朋友，但我同你相處係最放鬆，可以講心事。自從我同Kyle拍拖，我就忽略左你，搞到你午息放學成日一個人。有時心情差，甚至會黑你面，但係你都冇因為咁而唔理我或者鬧我，反而好包容同忍耐我。」
 
「我知道無論我發生咩事，你都會肯理解同願意聽我講野。同埋我唔應該投射自己情緒落你身上，唔應該同人比較。」
 
「自從星期五，我一直都避開你。唔係因為我憎你，而係我覺得自己個日真係好樣衰，我就算發脾氣，點都唔應該發落你到。」
 
Katy望住我講：「個日真係Sorry，我真係冇心想hurt你，係我眼中，你永遠都係我最好既朋友。」
 
「Katy，你之前係aia講得啱。我一直都知Felix係鍾意我，只係我唔想去承認，因為我朋友唔多，如果連Felix都做唔成朋友，我驚我就會冇朋友。」
 
「呢個只係我個人睇法，你唔一定要跟我諗法去做。Hailey，你只要問心，按照你自己諗法，想點做就點做，唔好理其他人意見，包括我都一樣。」
 
我苦笑講：「邊有可能唔理其他人點睇….咁你依家同Kyle點？」




 
「佢話以後唔會再同Ex聯絡，仲有同邊個出街都會同我講聲，所以我地繼續一齊緊。」Katy抿嘴笑左一下講。
 
平時睇劇，一般見到男女主角拍拖，睇落佢地好幸福，令觀眾都嚮往愛情。
 
愛情唔只甜，仲有酸、苦、辣等等味道。
 
但望住眼前既Katy，即使兩情相悅，中間需要面對各種問題，並唔係一帆風順。
 
眼前既Katy強顏歡笑，佢真係幸福咩？
 
我同查利揚，係咪永遠都唔會獲得祝福同幸福？