搭錯線：錯誤的時間遇上你: 第三十七章：星星

星期一，我同Katy係走廊撞到，我原本想叫住Katy，但佢同Irene有講有笑，所以我打消左呢個念頭。
 
星期二，中史堂我同Katy雖然坐埋一齊，但完全冇交流。
 
因為Katy拉開左張枱，同我有一格階磚既距離，我費事揾佢講野，一陣比查利揚捉，好似上次咁樣衰就唔好啦。
 
放學之後，我仲要去幫手整board同書籤。
 
俗語有云：傷心失意既時候，就應該寄情係工作上。
 




「Hailey，依家5點9，你執埋啲手尾可以走先。」查利揚同我講。
 
「個board仲有啲手尾要整，反正我釘埋啲紙上去就得，唔會遲好多。」
 
「好，我仲有功課要改，你慢慢整，唔洗急。」
.
「咔擦咔擦！」
 
終於搞掂左個board！我望向鐘，啱啱好6點。
 




我用眼尾掃過老師枱，見到查利揚全神貫注改緊簿。
我唔想打擾佢，反正依家時間尚早，我就拎起秀麗筆寫住書籤先。
 
.
終於寫晒50張！剩低既工序返屋企搞埋佢就得！
 
我條腰向後一拉，發出「喀啦，喀啦」既聲音。
 
我年紀輕輕，咁快就有呢啲關節聲？
 




唔知查利揚聽唔聽到呢？
 
見到佢仲好專心改緊簿，安心晒。
 
等等先，眼前既鐘顯示依家9點。
 
睇嚟工作真係可以不知時日過。
 
「查sir，原來依家9點，我夠鐘要返屋企食飯。」我急忙同查利揚講。
 
「原來依家咁晏。」查利揚收拾枱面既功課，同埋一罐咖啡。
 
「查sir你咁夜仲飲咖啡，你唔擔心今晚瞓唔著覺咩？」我擔心咁講。
 
查利揚愣一愣，輕輕咁講：




「成年人既世界，咩時候都要需要咖啡，小朋友唔洗擔心！」
 
「咁我走先！書籤仲差綁繩結就搞掂，我星期五交比你」我拎住書包講。
 
「等等先，依家9點咁夜…..我送你去地鐵站，反正我都順路。你落嚟教員室等我！」查利揚拎住啲功課講。
 
我跟隨查利揚既步伐落到教員室。
 
「你係出面等等我。」查利揚講。
 
我隱約見到查利揚個位，張枱好乾淨，擺設整齊，張枱有幅相，太遠睇唔清楚。
 
我唯有將個頭再伸入啲去門口，啱啱好查利揚出嚟。
 
「小妹妹，係到睇緊咩？」查利揚笑住講。




 
「見你入去咁耐，咪望下囉！我都係第一次睇到教員室入面！」我開朗咁講。
 
「唔好睇教員室，好多機密野！行啦！」查利揚講完，我地就一齊行。
 
「我都未試過咁遲先離開學校。」我講。
 
「做老師，早出晚歸。」查利揚嘆左口氣講。
 
「做老師好辛苦咩？」我追問。
 
「小朋友唔會明，每份工都有好同壞，睇你點睇。」查利揚淡淡望住天空講。
 
我跟隨查利揚既目光，望向天空。
 




「查sir你見唔見到，有好幾粒既細星星。」我好興奮咁講。
 
「又真係喎，你唔講我都未必有留意到。」查利揚繼續望向天空講
 
「查sir，你記唔記得我地第一次見面，就係咁chill」我突然講。
 
「個陣既你好細個，依家都係，你係hazel個妹，我當然會留意同記得。」查利揚不假思索咁回應。
 
「哦….都係既，哈哈….」我勉強笑住應。
 
原來過左一年，我係佢眼中，仲係小妹妹。
 
後來我地都冇再講過野，靜靜咁行去地鐵站。
 
「查sir你搭咩線？我係往黃埔同何文田方向。」




 
「我係你相反，我往油塘，要過海。你返到屋企記得wts我。拜拜。」查利揚揮手講。
 
之後，我就同佢分開係對面月台等車。
 
我回頭一望，我地四目交投。
 
人來人往既環境，我地默默望住對方。
 
查利揚指去我後面，示意列車已經到達。
 
我轉過身上車，仍然見到佢望向我。
 
雖然我知你當我係妹妹，但總有一日我會成長，到時成為一個好似你咁可靠既大人，你就唔洗再成日照顧我。
 
我想，呢段關係可以平衡啲。