搭錯線：錯誤的時間遇上你: 第四十一章：約會

星期五夜晚，我突然收到 Felix 嘅 message。
 
「Hailey，你星期六下午得唔得閒？😆」
 
我望住個畫面，愣咗幾秒。
 
——咩事突然問我得唔得閒？唔係又想問啲奇怪問題掛？
 
「朝早補完習，1點之後都ok～」
 




幾秒後，Felix send咗第二句。
 
「因為我鍾意個女仔就嚟生日，所以我想你幫我揀生日禮物比佢」
 
我手指停喺電話畫面上，心入面突然靜咗一秒。
 
——鍾意…嘅女仔？
 
我眼睛定咗喺嗰幾個字，心入面突然有啲說唔出嘅空。
 




我冇妒忌，因為我知道，我鍾意嘅人唔係 Felix。
 
但我都唔知，點解會有種奇怪嘅抽離感，
 
好似你中獎好開心，當你諗住離開個位，上台拎獎既時候，你見到有人行出嚟上台。你疑惑一望，原本係睇錯number ，上台拎獎既人的確唔係你本人。
 
「你係邊到補習，我過嚟搵你？」
 
「太子。」
 




「你到時有冇咩想食？」
 
「韓式。」
 
「咁到時1點15分係太子地鐵站B出口等😼」
 
「👌」
 
我攤係張床，望住天花板。
 
Felix 一直對我好，陪我講笑，幫我整攤位，送公仔……
 
我冇當佢係男朋友，但可能我潛意識覺得——
 
係我唔開心、唔講嘢、查利揚又唔係到既時候，通常佢就會出現係我隔離。




 
我習慣左佢既存在，佢對我既好彷彿呼吸一樣自然。
 
只係對方對你釋出善意，其實都唔係必然。
 
「你一直都知Felix 鍾意你，你就接受佢既好！」Katy講既說話歷歷在目。
 
我一直以為自己只係唔忍心拒絕佢，原來我只係貪心——
我唔想佢離開，所謂想繼續做朋友，從來冇諗過要行埋一齊。
 
我討厭呢個猶豫不決既自己。
 
.
「我地今日講到呢到，各位同學再見。」
 




我睇睇手機時間，原來今日overrun左15分鐘。
 
行去地鐵站都要15分鐘既距離。
 
我只好wts felix同佢講我會遲到，不過我諗佢都唔會早到，以上次aia嘉年華既經驗嚟講。
 
我緩緩咁行去地鐵站。
 
我行到去地鐵站既時候，遠處已經見到高眺既背影。
 
今日既Felix，明顯悉心打扮過。前額劉海自然咁偏向右邊，髮尾微微翹起，整體髮型蓬鬆有層次。
 
佢著住一件oversized米白色衛衣，襯卡其色寬褲同白波鞋，頸上仲戴住條銀色鏈，望落去乾淨清爽，仲帶點打扮過既拘謹感。
 
「Hailey？」




Felix隔住幾步叫我，眼神閃過一絲小心翼翼。
 
我走近一啲，忍唔住笑咗出嚟：「今日既你同平時差好遠喎，啱啱仲差啲認唔出你，哈哈！」
 
我低頭睇睇自己，衛衣配牛仔褲，完全係頹look——對比起佢，好似冇乜誠意咁。
 
Felix稍為吸一口氣，然後盯住我問：「今日…我咁樣打扮，得唔得？我係想模擬下當日幫佢慶祝生日，你覺得會唔會太浮誇？」
 
佢吞咗啖口水，語氣明明好輕鬆，但我感覺到佢有啲緊張。
 
「我覺得幾啱你呀，白色好襯你，望落去舒服又精神。你到時約佢出嚟，應該加分唔少。」我笑住答。
 
「你係咪等咗我好耐？我原本以為你會遲到，所以慢慢行過嚟添。」我問Felix。
 
「冇呀，我啱啱先到咋。」Felix笑一笑，表示無所謂。




 
「係咁，我地出發啦！」
Felix一邊望住手機，一邊轉向地鐵站出口，「我搵咗間韓式餐廳，就喺B出口出咗去之後轉個彎，你跟我行就得。」
 
我點點頭，靜靜咁跟住佢。
 
「向左行。」Felix專注望住google map，行前行左幾步。
 
Felix突然轉身，撞到我個頭。
 
「Sorry….我冇心撞到你，向右行先啱！」
 
「你跟我行啦！」我已經行左係felix前面。
 
佢冇再講嘢，只係低頭望住地圖，眼神靜靜地，像係落咗一層輕霧。
 
我唔知佢係咪真係睇緊方向，定還是…唔想我見到佢此刻既失落。