搭錯線：錯誤的時間遇上你: 第四十二章：喜歡

「Hailey，你睇下 menu 想食咩？」Felix 將 menu 輕輕推過嚟，神情自然輕鬆。
 
我望住 menu，睇左一陣就揀好左。
 
「Felix，我揀好啦，要韓式拌飯，你睇下想食咩。」我將 menu 比返佢。
 
「我都諗好，我想食紫菜包飯同辣炒年糕。」Felix同我講完，就笑住向前面個店員講：「唔該～我想要紫菜包飯、辣炒年糕，同埋拌飯，唔要辣醬～」
 
店員記低就走開。
 




我望住佢，勉強笑咁講：「你記得我唔食辣，幾細心呀。到時都要記得個女仔啲喜好，呢啲係加分位嚟㗎～」
 
我冇望佢，繼續講：「係呢……你同個女仔點識？」
 
Felix輕咳咗下，眼神閃避。
 
「我屋企……好窮㗎。嫲嫲一手養大我。有一日我返學冇拉拉鏈，銀包跌咗。佢…佢好似天使咁幫我執返，入面有書簿費……就係嗰下開始，我留意佢。」
 
佢語氣有啲靦腆，眼神卻落咗地。
 




「咁你地之後仲有冇見面？」
 
「有呀……見過好多次。」佢點點頭。
 
店員捧住食物擺落枱。
 
我用匙羹慢慢攪住碗飯：「咁睇嚟你表白應該都會成功啦，唔洗擔心。」
 
「Hailey，我幫你攪飯啦～你先食辣炒年糕啦！」Felix舉起匙羹。
 




「我又唔係你鍾意嗰個女仔，唔洗幫我啦，你自己食啦。」我按實碗，感覺有啲唔自在。
 
空氣頓時靜咗落嚟。
 
就喺呢時，手機一震——係Katy。
 
「我問咗查Sir，佢話我可以一齊做booth helper！」
「你同查Sir講返啦，佢叫我通知你，等緊你答覆～」
「有我喺唔洗驚老師家長啲閒言閒語啦！」
「仲有你就嚟生日，期待我份禮物啦！🩷」
 
我望住螢幕，嘴角微微翹起，覆返：
 
「多謝你呀！」
「你唔講我都唔記得下星期係我生日。我估你會送件衫比我？」




 
跟住，我開咗同查利揚既對話框。
 
「查Sir，Katy話做helper，我都想一齊同佢做～」
「呢個答覆應該唔算遲啦？」
 
查Sir好快在線，輸入中…
 
「我哋做好本分，就唔需要理會其他人目光或說話。」
「有咩事我會處理，你放心同Katy合作。」
 
我盯住住手機，眼角唔覺意笑咗出嚟。
 
「Hailey，你睇緊啲咩咁開心？」Felix側頭問。
 




「冇野呀，查Sir講野…好笑囉～」我閃避咁講，冇望佢。
 
「你哋連星期六都聯絡，睇嚟真係好 close。」佢語氣半玩笑，但帶少少低落。
 
我避開佢目光，低頭繼續食飯：「邊有呀……」
.
食完飯，我同Felix行咗落旺中。
 
旺中係我哋中學生最熟悉嘅地圖：衫鋪、飾物鋪、美食鋪，一排排地排住，閃閃亮亮。
 
Felix行到一間飾物鋪門口，指住櫥窗入面一條銀色手鏈：「佢就嚟生日，你覺得呢條手鏈啱唔啱佢？」
 
我偏頭望咗一眼，條鏈上面有個細細個蝴蝶結，閃得好亮。
 
「Err…佢平時有冇帶飾物？仲有佢叫咩名呀？」




 
「Um……Heidi。」佢遲疑咁講：「佢平時冇咩戴飾物，所以先想買返條特別啲嘅。定係…買公仔？佢上次收到公仔好似都好開心。」
 
Felix一邊講，一邊用手指拂過玻璃。
 
我停咗兩秒，笑咁講：「唔緊要，我幫你揀啦。不過其實……我之前以為你鍾意我，仲煩緊點同你講清楚……你對人實在太好啦。」
 
我望住佢：「拍拖嘅時候淨係對一個人好就得㗎啦。唔係個個都識分㗎。」
 
我語氣溫柔，冇怪佢，只係輕輕講完，然後轉身望另一邊飾物。
 
「不過Heidi幾時生日？」我補問。
 
「3月13…14號？」Felix突然遲疑咁講。
 




我身體一震——
我生日係3月13號，咁啱Heidi係14號？
 
「Heidi咩樣呀？我幫你襯返顏色方便啲～」我語氣保持自然，但心跳好似亂咗兩拍。
 
「佢有一把順滑既黑髮，眼圓圓、鼻扁扁咁，笑起上嚟好靚。睇書嗰陣個樣好文青，食雞蛋仔個樣又勁 cute——」
 
我望住佢對眼，語氣極輕但清晰：
「Heidi就係Hailey。Felix，你係咪鍾意我？」