搭錯線：錯誤的時間遇上你: 第四十三章：結束

Felix苦澀一笑，講：
「Hailey，我知你鍾意查sir。」
 
我愣住，睜大眼睛望住Felix。
 
「我覺得我地需要搵一個位置好好傾下，就去top樓下food court。」Felix講完，我地就一齊行過去。
 
旁邊人聲鼎沸，我地卻保持沉默，同環境格格不入。
 
去到food court，felix坐左係我對面。




 
「你…點解會知我鍾意查sir？」我降低聲量，同時周圍望下附近有冇熟悉既臉孔。
 
Felix 一臉認真望住我講：「籌備選科講座個日，我見到查 Sir 幫你包紮，我係未見過你笑得咁燦爛既樣，睇落好幸福。」
 
「你以為第一次見面係球場，其實我地係開學個陣，九龍灣地鐵站先係第一次見面，我係因為你幫我執銀包，而開始留意你。我知你應該係師姐，所以我一直搵機會，睇下撞唔撞到你。
 
直到有次我地籃球隊練波，我見返你。嗰一刻我就知道，一定要搵機會同你講野。個陣既我都專心唔到打波，淨係掛住望你，而你一直望住筆記，直到我見到有波飛去你個邊，我怕你會受傷，就跑去接波。
 
擋左波之後，我可以借呢個機會認識你，原來你叫Hailey，係中五級師姐。我就係到諗，仲有冇機會可以接近你。呢個時候，kyle咁啱同我講，話有一個暖昧緊既女仔，佢比左張相我睇，就係katy，旁邊既朋友就係你，我就知道可以借kyle去認識你。




 
Christmas Party 個陣同你交換到 IG，表面睇落普通朋友會做既事，實際上我開心左成日，我終於可以更加深入了解你。即刻張張相矇左，我都唔緊要，因為呢張係我地第一張影既相，反正之後都會有機會影相。
 
後來返學，你主動同我打招呼，我地好自然成為朋友。我開始認識你，發現你平時好少笑，於是我用盡方法引你笑，因為我最鍾意你笑容，你笑起上嚟好好睇。所以aia嘉年華個次，我先想贏大獎，咁就有大公仔可以送比你，我想見到你既笑容。
 
直到我見到查 Sir幫你包紮，我先知原來你係可以長期掛住笑容既人。個陣既我冇勇氣行入班房，只係門口望住你地兩個，我覺得自己好似局外人，完全唔敢入嚟。我唔甘心做旁觀者，亦都唔想你淨係望查sir，嗰日放學，我係想同你表白，等你知道有人鍾意你，獲得你既關注。可惜個日 Katy 打電話過嚟，打斷左我既表白，同時令我更加確定你係鍾意查 Sir。
 
後來我同班兄弟講左呢件事，佢地都叫我照直表達自己既心意，唯獨Kyle 就提議叫我將銀包女順理成章，扮有鍾意人，睇下你咩反應。我聽完kyle講既野，覺得佢幾有道理，佢拍拖經驗都多，於是我決定講大話。
 
紙係包唔住火，我都唔擅長講大話，咁快就比你識穿。




 
我努力既話，一定唔會差過查 Sir，我都可以成為可以比你依靠既人。今日我唔再遲到，事前搵定餐廳，唔點知解仲係好多甩漏，仲要你帶返路，令我覺得自己仲係小朋友，咁樣既我更加吸引唔到你注意。
 
食飯個陣，我見到你笑得好甜，我希望唔係查sir，於是我問你點解咁開心，而你個答案係因為查sir。
 
我知你一定會拒絕我，我又唔係好似 Kyle咁聰明，轉數咁快，所以比你發現左我講大話。」
 
「Felix，我真係好多謝你。你係一個好樂天同善良既男仔，同你做朋友我真係好開心，只係你都知我鍾意查sir，所以我….冇辦法接受你既心意，sorry。」
 
「我一早知係呢個結果，依家講完我成個人都鬆晒！」
 
「Felix，其實之前我一直都feel到你對我特別好，只可惜我享受你對我既好，我又唔想冇左你呢個朋友，所以一直都扮唔知，直到同katy鬧交 我先知原來咁樣做會hurt到你，我就想搵方法同你講清楚。
 
當你話有鍾意既人，老實講我有開心同唔開心，開心係我唔洗拒絕人，唔開心係以後冇人對我咁好，少左一個朋友，但我咁諗其實好自私，我應該要祝福你先啱，所以當你話幫女仔揀禮物，作為一個好朋友，我都要幫你先啱。
 




Felix，我真心好多謝你一直以嚟都咁照顧我，係我唔開心個陣請我食雞蛋仔，又係aia嘉年華特登贏公仔比我，當我遲到你明明可以準時返去，但為左我調頭返嚟，陪我遲到，留堂班又同我玩，甚至我一個人係圖書館都走留堂過嚟陪我。
 
你值得更好既女仔，只可惜呢個人唔係我。」
 
「Hailey，既然我地做唔到男女朋友，咁係咪仲係好朋友？」
 
「我地當然係朋友….只係我鍾意查sir既事，你可唔可以幫我保守秘密？」
 
「Aia你都幫我保守秘密，我地依家一人有對方既秘密，我地可唔可以勾手指尾，當係保密儀式？」
 
我伸出小指，望住Felix個樣，佢亦都默默伸出佢嗰隻，兩隻小指輕輕勾住。
 
一下、兩下、三下。
 
童年式的儀式感，喺喧鬧嘅 food court 入面，我地就好似隔絕咗世界。




 
Felix深呼吸後，牽強笑住講：「我地係好朋友，應承對方既事要守諾言。」
 
「Felix...我….」
 
「我地出嚟都一段時間，嫲嫲話今晚整左白切雞，叫我早啲返去食飯，我走先啦！」Felix眼眶充滿淚光，卻展開最燦爛既笑容揮手，然後大喊：「我既初戀再見啦！」
 
「如果你早過查sir出現，唔知結果會唔會有唔同？」我低聲望住Felix既背影講。
 
呢句話聽落好殘忍，但愛情講求timing，並唔講理性同邏輯，唔係話邊個付出多啲，就一定會愛上對方。
 
每當我心情低落，心入面好似落雨，而Felix會冒住雨買遮比我，佢唔會介意淋濕，只會介意自己冇帶遮。
 
但係我想Felix同我一齊企係到等雨停，咁大家都唔會淋濕。
 




Felix每次都選擇淋濕自己，但我希望佢可以遇到一個有帶遮既人，可以同佢一齊擔遮。
 
因為Felix ，我更加清楚自己既心意。
 
譬如困喺電梯入面，比起陪伴，我更渴望漆黑中有一絲光芒，令我唔會感到害怕，而係安全。
 
而查利揚就係光芒既存在，由我mid term失手，佢凌晨安慰我，又成日教我中史；當我冇熄手機，電話響既時候，佢幫我講大話，令我唔洗比訓導主任捉；當我想辭去helper既時候，佢只係等我答覆，有咩閒言閒語都唔需要理會，因為佢係我背後堅硬既後盾。
 
如果話Felix陪我困電梯，講笑話陪我度過長時間，咁查利揚就會拉我出嚟，離開漆黑既電梯。
 
睇嚟我已經深陷名為「查利揚」既船上，不知不覺間已經到海中心。