搭錯線：錯誤的時間遇上你: 第四十六章：夢想

「你都講得啱既。」我搶先一步打斷左佢，繼續講：「我地差8年，你都做左老師幾年，而我依家仲讀緊書，都未畢業。」
 
我勉強笑一笑，收緊手中紙箱，垂下視線，冇再望佢，轉身邁步向活動室方向行去。
 
「Hailey，點解得你一個？冇見到查Sir咩？」Katy見我返嚟就問。
 
「見到，只係我想快啲搞好個攤位，費事得你一個人睇檔咁辛苦。」我將書籤放返枱面，口氣盡量平靜。
 
查利揚其後亦到達活動室，從我哋相遇至今，雙方都冇再講過半句。
 




Katy望下我，又望下查利揚，感覺到氣氛微妙，忍住冇出聲，靜靜同我準備展板。
 
我見到對面生物、化學、物理攤位好多家長拎住leaflet，問老師嚟緊課程讀咩，人群擠滿；會計同經濟攤位，家長都會停低睇Board，或者都會問下野；文科呢邊簡直係門可羅雀，家長只係走過而唔會停低。
 
我望住枱上字跡秀麗既書籤，全部都係我努力抄寫出嚟，但一張努力抄寫既書籤，都不及理科一個簡單易明board，講升學出路。
 
旁邊窗戶吹下寒風，令我心中更涼了一截。
 
我從口中吹一口暖氣，然後搓搓手心。
 




「Kyle, 你嚟左啦！Hi Felix！」Katy輕快咁講。
 
「Hello Hailey.」Felix 揮揮手咁講。
 
「Hi Felix.」我微笑咁講。
 
「Katy你睇我拎比啲咩比你？」kyle係褲袋中拎出珍寶珠。
 
「Wow 卡卡you are so sweet!! 係士多啤梨味既珍寶珠！」講完之後，katy立刻開左珍寶珠嚟食。





「Katy，呢度有咩野玩？」kyle問。
 
「我依家問你問題，你再係board揀正確答案，啱左就有小禮物！」Katy笑得燦爛講。
 
「好呀，你開始問！」Kyle好有自信咁講。
 
「好！是非題：唐朝時，絲綢之路主要是用來運送軍隊的。是定否？」katy問。
 
「否！」
 
「Kyle答啱，歡迎你拎張書籤！」katy講完，我就遞左書籤比kyle。
 
「Felix你玩唔玩？」katy問。
 
Felix眼尾掃過我，嘴角揚起，然後同Katy講：「玩！點解唔玩？比題簡單啲！」




 
「焚書坑儒出現係咩朝代？A. 漢朝 B. 秦朝 C. 清朝」
 
「秦朝。」
 
「恭喜你，答案正確！」katy講完，我遞書籤比felix。
 
「唔該。」Felix微笑講，但冇望過我一眼。
 
我同Felix冇可能再返去以前既關係。
 
「你地玩完Game，中史科其實都唔係咁無聊既科目，只要你當中史係玩遊戲咁學習，一定可以學得好。」我語氣盡量保持輕鬆咁講。
 
「Katy，我叫多啲人過嚟！」kyle講完就同felix跑走左。
 




Felix同Kyle走遠，我望住枱面一疊書籤，啱啱果幕笑聲似乎突然遠去……
 
然後，一位嬸嬸停喺攤位前，皺眉問我：「我想問中史科讀完有咩出路？」
 
「中史學生將來可以投身教育、新聞傳媒、文化研究、行政管理，甚至政府工、公關、寫作創作。」
 
「咁你讀完中史，將來想做咩？」嬸嬸轉向問我。
 
我心頭一震，不自覺望向查利揚——佢依然面無表情，但我唔知，佢係咪明白我講果句，其實唔止講緊自己既志願，仲係想同佢講⋯⋯我想變成好似你咁嘅人。
 
然後，我堅定咁望住對方講：「我想成為一個，唔止教識學生，更加可以幫佢地搵到方向既老師。」
 
「所以中史既出路都係老師…」嬸嬸若有所思咁講，然後就同身邊個仔講：「你都係諗真啲先好揀中史！」
 
「我知自己擅長讀文科，寫字叻過計數，依家係我揀科唔係你揀科！」男同學噴到嬸嬸一臉屁就走左，剩返嬸嬸停留在原地。




 
「呢個仔真係唔聽話…」嬸嬸皺住眉頭講。
 
「太太，其實我覺得你同阿仔可以坐低，平心靜氣講大家既意見，大家都可以了解對方諗法，進行有效溝通。」查利揚用温和既語氣提出建議。
 
「佢聽我講野先得㗎！我都係想佢將來出路好啲，小朋友就係唔識諗！」嬸嬸翹手講。
 
「啱啱阿仔都講話，佢擅長讀文科多過理科，你可能要多啲聽下阿仔既意見。」
 
「你係中史老師，梗係想多人讀你個科，我唔想我個仔將來淨係老師呢條路！」嬸嬸開始有啲激動。
 
「讀中史唔係淨係可以做老師，係可以行多元化既路，我學生頭先都有講到，可以從事政府工、出版等等。」查利揚聲量略為大聲。
 
平時我眼中既查利揚，係一個溫文爾雅、文質彬彬既人，對人講野絕對係有耐性同溫柔。
 




點解佢今日好似有啲唔同？
 
我同Katy對望，我地同樣露出疑惑既表情。
 
「我都費事同你講，咪又係搵唔到食既工！都唔知個衰仔去左邊！」嬸嬸眼望四周，急步離開。
 
查利揚望向窗外，睇落滿懷心事。
 
「喂，我搵左班人過嚟玩問答！」kyle跑住過嚟講。
 
「Kyle你永遠最好！」katy甜笑住講。
 
我望向kyle帶嚟既朋友，唯獨唔見Felix。
 
睇嚟我地覺得同大家同一個空間，都會覺得唔自在。
 
「好啦，是非題…」
 
Katy問完問題之後，我就派書籤。
 
「Kyle帶到成10幾個人過嚟，真係有料到！」我同Katy講，同時我拉高衣領，膊頭縮埋一舊。
 
「梗係啦！佢係我男朋友！」Katy自豪講完，就係枱上面搵野。
 
「你搵咩？」
 
「我想搵水，啱啱食到完水個口好酸。」Katy皺住眉咁講。
 
「我諗你支水應該漏左係禮堂後台，我幫你去拎埋？因為順便我要去埋廁所。」
 
「咁麻煩你啦！」Katy開心咁講。
.
冬天既辛酸，莫過於係去完廁所洗手個一剎那，冷冰冰既水流過冷冷既雙手，令原本凍既手更凍。
 
我只好雙手插入衫袋，在布料內輕輕摩擦取暖，然後慢慢走向廁所旁邊的禮堂。
 
行入禮堂後台，果然Katy支水係漏左係到。
 
我拎住水出嚟，準備轉身行樓梯既時候。
 
「Hailey!」
 
我回頭一望，係查利揚，佢手上拎住一包長方形既袋。