搭錯線：錯誤的時間遇上你: 第四十七章：你的笑容

「查sir你點解唔係攤位到？」我疑惑地問。
 
「頭先Miss Cho有事搵我，我地去左教員室傾。順便拎埋暖包，今日凍左。」查利揚打開包裝袋講。
 
明明呢啲都唔關我事，點解佢要同我講呢啲？
 
我更加諗唔明，點解結果無啦啦拎暖包？
 
「哦….」我點頭應道。
 




刺骨既寒風撲向我既臉上，令我不禁顫抖。
 
「呢啲暖包係日本買，可以癡係外套，」查利揚打開包裝袋，一邊講，一邊睇住我肩膊微微抖緊，「見你凍到震晒…你想要幾多個？」
 
佢語氣聽落淡淡地，但我感覺到佢係留意緊我每個小細節。
 
「Um…咁我要2個。」
 
查利揚將2個暖包，輕輕放到我雙手手心上。
 




冰冷的手感覺陣陣暖意，好舒服。
 
我立刻除下外套，將暖包癡係外套上，然後再著返外套。
 
暖晒，嘻嘻！
 
查利揚見到我笑得咁滿足，眼神不自覺柔和咗，嘴角揚起一抹淺笑。
 
「咁我地依家落返去活動室！」我踏著輕快既腳步離開。
 




「Hailey，其實頭先如果播完片，我冇準時到，咁你點算？」查利揚突然問我。
 
「我冇諗過你會唔嚟，我睇住你為左準備今次選科講座，用左幾多時間就知！」我毫不猶豫咁答，然後繼續講：
「個次你咪去圖書館搵參考書，我剪緊紙個陣，你就睇左本參考書睇左好耐。仲有你擔心講座悶親班師弟妹，仲特登搵片吸引佢地睇。
查Sir你一直都係有責任心同準時既人，咁認真準備唔會唔到，所以我相信你一定會出現。」
 
查利揚愣咗一下，眉頭微動，像係冇諗過我會記得得咁清楚。
 
一陣靜默之後，佢嘴角緩緩揚起，露出一個淡淡但溫柔既笑容。
 
我心跳好似漏咗一拍——我從未見過查Sir笑得咁真誠、咁放鬆。
 
我嘴角不自覺微微上揚，語氣輕快地講：「查Sir，Katy應該等緊我地，佢一個人係樓下應該忙爆。」
 
我舉起手中水樽，補充一句：「呢樽水都係拎比佢，佢應該口酸到爆炸。」




 
查利揚同我對望，眼神裡多咗一份溫柔，我地一齊笑咗出嚟——
 
笑容喺彼此臉上蔓延，好似短短幾秒，就拋開咗寒風。
 
嗰一刻，我唔知查Sir係咪同我諗緊同一樣嘢——但我知道，我哋喺呢刻，有少少近咗。
 
之後我同查利揚一齊返去活動室，Katy見到我地，就講：「你地咁啱一齊返嚟既？頭先悶死我啦，又冇人過嚟！」
 
「頭先係一樓咁啱撞到Hailey，咪一齊落嚟。」查利揚回答。
 
「我地仲有一個鐘，或者陣間多人呢！」我安慰Katy。
 
望住枱上仲有剩返好多既書籤，我心中一涼，感覺少少失落。
 




查利揚見到有學生經過我地個邊，講：「同學，有冇興趣玩有遊戲，玩完仲有禮物派。」
 
學生隨即過嚟玩問答比賽，箱內書籤數量陸續變少。
.
5點鐘，選科講座正式結束。
 
我同Katy推走活動展版就返嚟活動室，繼續收拾活動物資。
 
「你地執埋枱上既工具就走啦！」查利揚講。
 
「查Sir，仲有枱同櫈，我同Katy一齊搬埋啦！」我講完，就叫埋Katy搬。
 
「咁你地兩個小心啲，搬唔到叫我搬！」查利揚開懷咁講。
 
好多時候，查利揚都係叫其他人走，自己留低收尾，上次我放學留低準備選科講座，個陣已經係咁樣。




 
由今日開始，我希望唔再淨係接受查Sir嘅照顧，而係可以分擔你肩膊上的壓力。
 
落雨既時候，你為我撐傘；風大既時候，你為我擋風。
 
今次，等我撐起把傘，企係你身邊。
 
我未必幫到你擋晒所有風雨——但只要你偶爾回頭一望，就會發現，我一直都喺度。