搭錯線：錯誤的時間遇上你: 第四十八章：Mock 成績出爐
選科講座完結後，學校氣氛突然變得唔同晒，主要係統測來臨，每個學生都好認真温書。
老師話統測成績會用嚟預測我哋 DSE 既表現。成績好，可能會被寄望；成績差，可能會被預設放棄。
收到成績表既我，卻呆在係座位上。
中文5
英文2
數學3
通識5
中史5/5*
地理4
英文2？
DSE制度下，無論其他科考得幾好，中史有星都好，只要主科考衰，英文唔過3，就升唔到U，一定要由Asso 或者HD讀起。
如果我跛腳讀唔到U，身邊既人知道我讀Asso同Hd咪會睇唔起我？
阿爸阿媽對我有期望，希望最起碼讀到八大搵食科，最好揀到既大學係三大。
我呢個成績莫講話係神科，就連大學既門檻都入唔到。
我將成績表摺起，自然見唔到英文係2。
只係睇唔到成績，真係代表佢唔存在咩？
.
中史堂，查利揚未到課室。
「Hailey，你成績表點樣？」Katy問我。
「一般般啦….」
「不如咁呀，我地交換睇？」Katy追問。
我將摺左既成績表比Katy，換嚟係光滑無比既成績表。
上面成績表分數係：
中文4
英文5
數學5*
通識5
中史5
化學5*/5**
生物5/5*
全部都係5咁滯，最重要係英文有5。
Katy一直以嚟都係名列前茅既學生，讀得3科既學生，會入精英班，學校素來重視佢地，亦都會放更多資源係佢地身上。
Katy睇完我成績表，就講：「Hailey，你整體都考得唔錯呀，英文方面有我幫你，唔洗驚喎！學校predict又唔代表準既！」
我冇出聲，只係僕係張枱到。
呢個時候，我聽到查利揚既腳步聲，佢行入班房，同我地講今日唔洗敬禮，因為佢趕住教書。
我當然冇理佢之後講咩，反正我就係唔想面對英文拎2呢個事實。
.
「喂～起身啦！」我感覺到肩膀比人拍緊。
我惺忪咁張開眼，眼前係 Katy。
「Hailey，你瞓足成兩堂啊，鐘都打完，依家放學啦！」她邊講邊收拾自己啲嘢，語氣帶住一貫嘅催促。
我望一望課室，真係得返我哋兩個。
「唔好意思，要你叫我咁耐……」
Katy撇撇嘴：「頭先查Sir都有問我你係咪唔舒服，佢話你平時好勤力，今堂竟然冇郁過。」
我心口一緊：「你同佢講咗啲咩呀？」
講左我英文拎 2 咁樣衰既事？
「我叫佢自己問你。」Katy聳聳膊，「你點都係要自己消化下嘛。」
呢個回答令我有啲意外。
Katy又補多句：「你有唔識嘅英文咪問我囉，我唔保證識晒，但識嘅一定幫你！」
講完，佢遞返摺咗嘅成績表比我。
「我係咪未比返張成績表你？」
「你瞓嗰陣擺喺張枱，我一早拎起咗啦，驚俾人當垃圾清走，我仲要拎比阿媽簽名。放學啦走啦～」
.
放學返到屋企，見到阿媽煮緊飯。
我唔夠膽同佢講，今日派左mock成績表。
只可惜mock成績表要交比家長簽名，聽日就要交，所以我冇得唔講。
無幾耐，餸香味傳入我既鼻腔。
我望去飯枱，一頓晚餐就完成。眼前晚餐豐富，我卻拎唔起筷子。
「Hailey做咩仲唔食飯？飲啖湯先啦！今日我煲左核桃瘦肉湯，補腦呀！啱晒你！」阿媽舀左碗湯比我。
眼前既湯入面，核桃仲多過湯。
我默默食住合核，並冇出聲。
「今日你阿爸OT，Hazel又唔係屋企食飯，你食多啲啦！我仲煮左你最鍾意食既咕嚕肉。」
「好呀。」我默默夾左一舊咕嚕肉嚟食。
然後食左幾啖飯，飲左啲湯，我就冇胃口再食。
於是我等待阿媽食完飯，諗住同佢講今次mock成績。
以佢性格，比左錢我去補習都唔見成效，一定會係咁話我唔努力溫書。
「阿媽，今日學校派左mock，要你簽名。」
我小心翼翼將成績表拎比佢睇。
「Hazel以前都唔係話好叻，但最少dse唔會拎 2 啦，仲入到八大。」阿媽既反應果然不出我所料，直接鬧我。
「你都 Form 5啦，仲有唔夠一年就考dse，英文一拎2，就算中史比你考到5星星都冇用。 」阿媽講完，我只係默不作聲。
「你之前係咪忙住搞嗰個咩選科講座，先少左時間溫書？好心你讀好書先做其他野。」阿媽係成績表上簽名，再比返比我。
我唔介意阿媽鬧我，反正平時都聽慣，但佢話選科講座個陣，令我有啲嬲，因為兩件事係冇關係，即使我唔去選科講座，今日成績表都唔會改變。
「我有分配好時間，加上你都話仲有一年時間，只要我一年內英文拎到3就得啦！」
「好，你講既。」阿媽冷冷咁講完就走左。
我強忍淚水，眼前成績表既數字變左一篇模糊。
「嗡嗡…」桌上手機正在震動。
手機顯示，查sir傳嚟新信息：「聽日小息搵我，有重要野要比你。」
我click入去whatsapp覆：「中史科有咩重要野？」
查利揚只係打左一句說話：「呢樣野要親手交比你，記得小息落嚟教員室。」
我抹一抹眼角啲淚水，嘴角唔自覺咁勾起一點笑意。
查利揚搞咩呀，咁神秘……但，好似冇咁難捱。