搭錯線：錯誤的時間遇上你: 第四十九章：祝你夢想成真
第二日返到學校，明明3堂時間只係2個鐘左右，唔知點解我硬係覺得時間過得好慢。
「叮噹叮噹…」小息鐘響起，同老師敬禮後，我就衝落去1樓教員室。
「唔該我想搵查利揚老師。」我對咪講完之後，隔左一陣，查利揚從教員室門口行出嚟，手上仲拎住一疊紙。
「感覺呢啲你應該有需要用到。」查利揚將個疊紙放係我手上。
我望疊紙最上面寫住HKDSE English PAPER。
我微微一愣，講：「查Sir，點解你會有呢啲筆記？同埋你點知我有需要？」
「你家姐琴日同我講你mock英文成績，問我有冇地方可以幫到你，於是我就問相熟既老師朋友去拎左呢啲筆記。放心暫時唔洗還，你可以慢慢睇都得。」
「咁好啦，唔該查sir。」我展開笑顏講。
查利揚照舊微微一笑，就入返教員室。
我拎住一疊筆記返班房，同時見到Katy同緊Alice 傾緊偈。
「Hailey你返嚟啦？哇！你手上點解有咁大疊英文notes，我仲拎住我啲補習notes比你，就放左係枱上面。」
我放低一疊筆記，掀開Katy既notes嚟睇。
呢份係copy notes，入面主要有vocab同5星星範文。
「Katy多謝你呀！」我同katy講。
「洗乜講，我地咁fd，無理由有好野唔益你！Alice，知你今次都麻麻地，我仲有多一份比埋你啦！」katy將手上既copy notes比埋Alice。
「哇屌！唔該Katy!」Alice 甜笑貶眼咁講。
「哇Alice 你唔好用電眼望住我，你搵返你個主席男朋友！」Katy 半推開講笑咁講。
「頂！小息就嚟完，掛住同你傾偈添，我走先啦！」Alice 就跑走左。
「你整體成績都好高分，再努力啲咪變狀元？」我同Katy講。
「邊到會呀！仲有James，佢成日同我鬥高分，中一個陣佢食左我既最後一塊薯片，我咪叫佢賠薯片，自此之後我懷疑佢懷恨在心，成日都話要輸左要送薯片。佢今次mock都考得好過我，我輸左就要賠薯片囉！佢仲話兩大神科實收硬佢，我都要諗下揀咩科lu~」katy托腮講。
事關katy同james不嬲有個約定，只要邊個今次比對方低分，對方就要買薯片。
有時會係katy買， 有時亦都會係james買。
「我地都仲有時間可以諗揀咩科既，我諗住做老師！」我同katy講。
「係咪因為查sir？」katy哄去我耳邊講。
「佢個日選科講座所講既一番說話，令我想做一個好似佢咁既老師，況且我頭先拎啲notes都係佢比我既。」我細聲咁講。
「咁睇嚟查sir真係對你特別唔同！」katy用氣音講完，就係到奸笑。
我低頭笑咗一笑，冇答佢，但心跳加速左。
「不過你知唔知Felix比人捉左去校長室？」
「點解會咁？」
「Kyle同我講話felix成績太差，叫得入校長室你都知咩事啦～」
只要學生被叫入校長室，代表學校已經放棄呢個學生，表面上有兩個選擇：留級同轉校，但往往學校更想學生轉校，所以先叫學校入房「傾偈」。
雖然依家冇再同felix聯絡，但冇諗過以後未必再係學校可以見到佢。
一諗到呢啲，心入面有啲唔舒服，始終都同Felix識左一段時間。
「Katy，作為一場朋友，你覺得我應唔應該問下Felix好？」我咬咬唇，細聲問katy。
「你想問就問囉，最緊要問完唔好後悔，唔好下下都忍住，到最後自己唔開心。」Katy歪歪嘴講。
「咁我知點做啦！」我笑住講。
.
放學之後，我打開wts，碌左一陣，先搵到Felix。
原來我地好耐冇講過野。
我係對話框輸入中。
「Felix，我聽Katy講，你去左校長室，你依家點樣？」
直接講校長室唔好。
我刪刪改改個信息之後，就將最終版本sd左出去。
「我聽Katy講，最近你好似……發生咗啲事？你依家點呀？」
隔左一陣Felix終於上線。
「校長室冷氣好涼，我想每次打完波都入去，不過之後冇機會啦！」
我睇到呢句，心中涼左一截。
「你意思係你會轉校？」
「還掂呢到啲老師一早都唔理我，我又唔鍾意讀書。我想去新學校專心打籃球。」
「我記得我地食茶記個陣，你講過想做籃球選手。」
我接住落去繼續打。
「我真心希望你可以追夢成功。」
「咁你呢，你搵到你既夢想未？」
「我嘅夢想係做老師，只可惜今次 mock 成績一出，發現自己英文好唔掂。」
「Hailey，你成績一直都好好，唔使咁擔心啦。只係一個 mock，下次再考好啲就得㗎喇！」
我睇住螢幕，忍唔住輕輕一笑。
今次明明係我安慰佢先，但Felix每次都安慰返我。
「咁我都祝福你可以做到籃球選手！」
「承你貴言！」
呢次係我地wts最後一次既對話，我地係學校亦都冇再見過。
我冇諗過再見返Felix既時候，我地會係學校相遇。
只係我地身份唔同晒──佢係籃球隊教練，而我係中史科老師。
我一直記得佢當日既祝福，只係冇諗過，命運會咁安排我地再見。