搭錯線：錯誤的時間遇上你: 第五十章：最後一粒珍寶珠

我打開查利揚比我既筆記，發現入面全部都係針對英文拎 2 嘅人而設。
 
大量基礎 Grammar 練習、清晰易明嘅句式結構講解，仲有啲係「必背句子模版」，簡直為我度身訂做。
 
「叮叮叮……」門鐘響起，7 點呢個時間，家姐啱啱好返到屋企。
 
「家姐，原來你同查利揚講左我英文成績？佢比左勁多好有用既 notes 比我呀！」我滿心歡喜咁講。
 
「吓？你講緊咩呀，我一句都聽唔明喎？」家姐皺晒眉，一臉困惑咁望住我。
 




「阿媽冇同你講我學校 predict 我英文好差咩？」
 
「冇喎？學校話你英文唔掂？我真係唔知呀。你唔記得咩，琴日我成日都係出面，同 BB 食飯，又要傾婚禮既事。」家姐一邊換鞋一邊答。
 
半年前，家姐男朋友向佢成功求婚，佢地決定唔擺酒，只係簡單搞個婚禮。
 
我頓時愣住：「但係……查利揚話係你講比佢知……」
 
「你可能聽錯啦？又或者……佢係聽其他人講既呢？再講，查理咁熟我，見你有需要幫手都正常啦，佢唔幫手我反而覺得唔對路！」家姐輕鬆咁笑住講。
 




我一臉茫然，一時唔知點反應。
 
唔通係 Katy？但個日佢明明話叫查利揚自己問返我，應該唔係佢。
 
到底查利揚……係點知道我英文考得咁差？
 
呢個疑問一直困住我，但我知道我冇時間再深究。
 
因為距離 DSE 既時間，已經所剩無幾。
 




我要好好珍惜查利揚、 Katy同Felix 呢份關心，將佢地既心意變成動力。
 
最重要係，我阿媽——
我要向佢證明，我英文唔只得 3，我一年內，一定拎到 4，甚至5！
 
啲日子真係過得好快。
 
由收到Mock成績個一刻開始，我每日都迫自己唔好諗太多，只專心面對每一份筆記、每一個錯題。
 
六月熱得令人煩躁，我照舊放學後，每日往返圖書館同補習社；
 
七月八月人地話係放暑假，學生都出去玩既時候，我就係日復一日溫到懷疑人生——但無論有幾攰，我都冇停過。
 
我同自己講，無論要捱幾多晚，我都要係真正既DSE入面，拎返我應有既分數。
 




等我回過神，已經係中六開學既九月。
 
我已經係中六學生，離DSE只剩一個倒數時鐘──六個月。
.
「Hailey，你又係到溫英文呀？依家Lunch time啦！」Katy咬住粒珍寶珠，笑盈盈咁出現係班房門口。
 
我拎住一疊英文筆記行出門口，無奈一笑。
 
「喂～你係同我食飯，定同英文食飯呀！」Katy夾住我手上啲notes，扁下嘴，語氣似笑非笑。
 
「我諗住邊食飯邊睇筆記囉。」我眼乾到痕，揉咗揉眼。
 
「你都要比個腦抖下，你對眼黑眼圈都出晒嚟，唔講唔知以為你係ocean park走出嚟既熊貓！你咁落去我驚你壓力爆煲！」
 
「你點解仲可以咁輕鬆㗎！仲有6個月咋！」我望住佢，語氣難掩焦慮。




 
「溫書同休息要平衡嘛，咁先至有效果。」Katy語調溫和咗啲，眼神微妙地避開咗我視線，「不過，我都冇咩資格話你……」
 
我正想問佢點解咁講，眼角就見到一個熟悉身影。
 
Kyle站係走廊邊，直直咁望住Katy，表情好複雜。
 
「你覺得我地係咪要傾下？」佢走前一步，聲音低低地講：「我知你想專心考DSE，但未至於分手啩？仲要Block晒我IG、WhatsApp同電話？」
 
Kyle一把拉住Katy嘅手腕。
 
「你放手先再講啦！」Katy皺起眉頭，語氣變得強硬。
 
「我唔放，放咗你就會走！」Kyle咬緊牙關，語速急促。
 




「你整痛我啦！」Katy突然叫咗一聲，聲線尖銳。
 
Kyle即刻鬆開手，面露慌張：「Sorry，我唔係有心…我…」
 
「你想等我？」Katy冷笑一聲，目光變冷，繼續講：「我就係抽時間同你拍拖，本身少左時間温書我真係唔介意。令我最嬲係你竟然拎我比你既筆記，比你個EX睇！你之前應承過我，唔會再揾佢！明眼人都知佢想同你復合啦！」
 
Kyle張開嘴，講唔出說話。
 
「你一直同佢聯絡又唔同我講，甚至琴日同佢單獨出街，我唔睇IG STORY我都唔知你去左邊！」Katy語氣顫抖，雙手緊握。
 
Kyle雙眼泛紅，聲音變弱：「Sorry 係我錯，我唔會再有下次！Katy唔好嬲啦，皺眉就唔靚！我買左好多珍寶珠比你。」佢邊講邊係褲袋度搵糖，手指顫抖。
 
「我粒珍寶珠食完，唔甜啦，食珍寶珠既過程，就好似我地依家既關係，甜蜜過後，剩低既只係爭吵同厭惡。」Katy停頓一陣，繼續講：「你每次同我道歉，送珍寶珠比我，我每次都心軟，收左珍寶珠之後，然後情況不斷重覆……我真係好攰。」
 
Katy一字一頓講：「我地分手啦。」




 
講完Katy拖住我走，佢冇回頭，行得好快。
 
然而我見到地上有一粒開封全新既珍寶珠，跌落地上。
 
自此之後，我再冇見過Katy食珍寶珠——連糖紙聲，都似變得陌生既聲音。