搭錯線：錯誤的時間遇上你: 第五十一章：搶齋啡！
Katy急步走到走廊盡頭，行左幾層樓梯，終於停左。
我見到Katy既膞頭不斷顫動。
平時好開朗既Katy，總係笑意盈盈，問你要唔要Notes，教你做功課，請你食零食，仲有一定會安慰人。
我從來都未見過Katy咁唔開心。
「鳴鳴鳴！Kyle正仆街！」
「你知唔知….佢….佢成日揾佢個EX….」Katy哽咽講。
我係裙袋拎包紙巾出嚟，遞左比佢。
Katy接過紙巾繼續講：
「Kyle話佢地無野，雖然我介意，只係佢成日氹返我，我又覺得自己好敏感。
我知愛情入面要信任對方，關係先會長久。只係每次佢解釋完，我越嚟越懷疑，我控制唔到自己亂諗野。
見到佢同異性朋友一齊，明明係一件好平常既事，我都忍唔住睇實佢ig，又成日叫佢影相比我睇。」
「後來kyle直情唔po story，又唔sd相比我，佢話自己好忙，但係我係其他人ig見到，佢同朋友出去玩緊，仲要大一班女仔。」Katy語氣愈講愈細聲。
「之後就連kyle話練波，我都開始疑神疑鬼….諗緊佢係咪….係咪呃我….」katy聲音再次顫動。
「我真係覺得好攰….」Katy抹住眼淚，跌坐係樓梯上。
我蹲低坐係katy旁邊，默默拍住佢膊頭。
我突然諗，如果係Felix，佢會買野食同講笑話氹我開心；查利揚好擅長講安慰說話；Katy會努力開解我。
而我，又應該點樣做，先安慰到呢個啱啱失戀既朋友？
我一直默不作聲，坐係Katy旁邊，同時用自己既身影盡量遮住Katy，希望經過既人唔會見到佢喊。
好彩係lunch time啲人都出晒去食飯，再唔係留係班房食飯，所以好少人經過樓梯位。
我見Katy慢慢停止哭泣，我就講：
「你喊完係咪好舒服好多？」
「好左啲…」
「啱啱冇咩人經過，我遮住左你，佢地唔會見到你喊。」
「但係我覺得我好樣衰，一定喊到對眼腫晒，實變33眼。」
「隔多陣就唔會腫㗎啦！」
「Hailey，我係咪好傻？」
「唔傻，你點解會咁諗你自己？我眼中既katy不嬲都係充滿笑容，永遠為人帶嚟正能量既人。當朋友有困難既時候，總係第一時間安慰人，仲會諗辦法去幫人。一個樂觀同樂於助人既人，一定值得好多人鍾意。依家既你只係遇唔啱人，將來一定有個更高大靚仔既仔，比kyle優秀百倍…唔係千倍既人出現！」
「Hailey你錯啦。」
「錯咩？」我慌張地問。
「係比kyle優秀億倍既人存在，哈哈！」katy破涕而笑。
「多謝你成個lunch time陪我，你陪我已經好好多。」katy緩緩一笑講。
「咕嚕咕嚕…」
Katy摸住個肚，尷尬笑一笑。
「依家仲有10分鐘，快啲落去小賣部，睇下仲有咩野賣啦！」我企起身講。
「好啦….」Katy都企起身。
我地一齊行樓梯落小賣部。
落到小賣部，Katy已經飛快跑去餐牌睇下仲有咩嗌，而我就去買野飲先。
我見到查利揚係自助售賣機㩒緊野飲。
「查sir你又飲齋啡？」
「係呀，每日都要飲一杯。」
「你唔只一杯，次次見到你上堂都拎住齋啡，就連上次搞選科講座，講緊晏晝5點幾，你都飲齋啡。」我一邊㩒野飲，一邊講。
「小朋友唔會明…」查利揚開左蓋，準備飲既時候，我塞左罐牛奶係佢手上，同時搶左佢未飲既齋啡。
查利揚呆左咁望住我。
「飲少啲齋啡啦，牛奶對胃好呀！」我得戚笑住咁講。
「仲有你有冇聽過飲得多齋啡，會甩頭髮㗎！成年人！」我飲左一口齋啡講。
齋啡冇糖冇奶，好苦！
我成塊臉緊皺到好似一張皺巴巴既紙。
查利揚見我個反應，忍唔住笑左，講：「知道啦，小朋友！你都係飲返可樂或者果汁啦！順便補充返我頭髮好濃密。」
「你啲頭髮遲早會好似snoopy個主人charile brown咁少！仲有我可以飲晒成罐齋啡！睇住嚟！」我同時係自動售賣機㩒左罐可樂，不過係比katy。
「好好好。」查利揚只係繼續笑，然後走左。
我拎住兩罐野飲搵katy，見到佢將飯暴風式倒入口中。
「Hailey你啱啱仲同查sir講咁耐野，lumch time剩返5分鐘！」
「咁大獲！」我趕快將飯同餸倒入口中。
.
由於罐齋啡太苦，我未飲晒，於是我一返到班房，將佢倒落去保暖杯，咁中史堂上就唔會有人發現我係到飲齋啡。
去到中史班房，我聽到Tracy問查sir：「查sir你今日點解唔飲齋啡？平時見你飲開齋啡。」
「因為有人請我飲。」查利揚勾起嘴角，同時望左我一眼講。
我報以微笑。
之後查利揚一邊講書，我一邊飲齋啡。
我扮飲水，所以要面不改容咁飲。
但係唔知點解，我硬係覺得查利揚今堂教得特別開心。
.
「Goodbye class.」
「Goodbye and thank you Mr.Cha.」
我將最後一啖齋啡飲完。
Mission complete!
查利揚只係默默望住我笑，然後離開左班房。
唔通佢知我飲緊唔係水，係齋啡？！