搭錯線：錯誤的時間遇上你: 第五十二章：校花新鄰座

「開學咁耐，係時候要調位啦！你地跟住熒光幕上既座位表嚟坐啦！」Miss Tsang同我地講。
 
我既新位係門口位第3排，而我係坐窗口位。
 
我隔離位係Alice。
 
Alice 係我地既校花，同過好多男神級拍拖，包括社長、head perfect，而現任係前學生會主席。
 
Katy同Alice都幾fd，佢講過Alice個人好易相處。
 




「Hello Hailey！我係Alice。我成日聽Katy提起你，新學年多多指教！」Alice笑住咁同我打招呼。
 
「我都係……多多指教」我微笑咁回應佢。
 
近望Alice，真係典型美人胚子。
 
佢擁有水汪汪既大眼睛，高挺既鼻子，櫻桃小嘴，配上高眺既身高，比例簡直係完美。
 
「Hailey，你做左數學老師前幾日出既數A未？」
 




通常問得呢啲問題，都似係想抄功課，主要今日就要交功課。
 
「我做左啦。」我拎緊本簿出嚟，打算借比佢抄。
 
「我想講level 2個5題，我都唔識做，你可唔可以教下我？」
 
「咁我幫你睇下先，頭3題既probability 用C計，第4題用P計，最尾C同P都要一齊用。」
 
「一去到文字題，我就唔太識，不過唔該晒你，我再試下自己計先！」Alice即刻打開本簿，努力咁計數。
 




「你有唔識可以繼續問我！」
 
「好呀！你真係好好人！」
 
而我都打開數學書，繼續做練習。
 
Alice 望左我幾眼，就講：「你同Katy一樣咁勤力，成績又好，怪唔知咁fd啦！」
 
「邊係呢，katy你都知佢排名不嬲頭3，我冇佢咁勁。」
 
「勁過我既人就係勁，你都好勁囉！頭先聽完你講解，我呢5題都好快解完！」
 
「幫到你就得啦！」
 
就係咁樣，Alice有時有唔識既功課就會問我，而我都樂意解答佢既問題。




.
返到屋企，我其實仲諗緊今日新同學嗰件事。Alice同我講得幾投契，可能今年真係有機會識到個新朋友。
 
畢竟我本身唔多朋友，加上中間又發生左好多事，Felix都已經轉左校。
 
只係我唔可以再諗咁多野，每日都同dse倒數緊返到屋企我就要爭取時間溫書。
 
「喂，查理你幾時得閒，就到你生日，等我請你食生日飯！」
 
當我好專心溫書既時候，卻聽到熟悉既名字。
 
家姐同查利揚打緊電話！
 
我馬上停低手上既筆，然後行出廳斟水，為左可以近啲聽到佢地既對話內容。
 




家姐戴左耳機，聽唔到查利揚講咩添！
 
「你放工幾點得閒呀？」家姐問。
 
「哇，老師真係好忙，又要開會又要搞學會。」
 
「查理你話28號？唔得呀！Yumi係群講左，話呢排星期六都要返工，鋪頭唔夠人。」
 
跟住佢地傾左陣，最後我聽到佢地話約到10月尾。
 
「明明你9月30號生日，結果同上幾年一樣，遲成個月先慶祝到，時間地點群再講啦！」
 
查利揚係9月30號生日！
 
今日係9月24號，距離30號仲有一個星期時間！




 
我腦海突然靈機一觸，諗到送咩比查利揚！