搭錯線：錯誤的時間遇上你: 第五十三章：Katy的競爭對手

當我諗緊去邊到買生日禮物既時候，Alice已經拎住英文閱讀走嚟搵我。
 
「Hailey，我想問呢句英文點解？啲生字超深，完全睇唔明呢篇閱讀講咩～」Alice托腮問我。
 
我湊埋去睇佢支筆指住嗰句：
 
“The initiative, though well-intentioned, has inadvertently widened the socio-economic gap among students.”
 
我皺眉望住句子。
 




Initiative… 即係行動、倡議…
Well-intentioned… 好心出發…
Inadvertently… 意外地？
Widened the socio-economic gap… 拉闊咗社會階層嘅差距？
 
我腦入面啲齒輪開始運作。
 
「咁…我估大概意思係，呢個行動本來出發點係好既，想幫學生，」我慢慢講，「但結果反而拉闊咗有錢學生同冇錢學生之間既差距…可能因為資源唔平均咁？」
 
Alice眼睛一亮：「嘩你好勁呀！我啱啱睇咗三次都解唔到！」




 
我有啲尷尬咁笑笑口：「我都係背左啲vocab先解到咋，未必啱晒，你都放學返屋企可以check啦～」
 
Alice只係望住我笑住講：「Hailey，不如你考慮下做老師，你真係好有耐性，講解得又清楚！」
 
我怔咗一怔，心入面有啲暖。
 
「係咩……我都係憑感覺解釋啫！」我擺擺手講。
 
「依家睇得明呢句，但係我都係唔知呢題點做。」Alice無奈咁講。




 
「叮噹叮噹叮噹叮噹…」
 
「咁快放學！咁不如我地依家去問老師啦！」Alice講。
 
「Katy會過嚟搵我，咦～」我地相視而笑。
 
我地坐係個位等Katy過嚟，Katy同Irene傾左幾句之後，就入嚟班房。
 
「Alice你仲係到，等人放學？」katy問。
 
「我同Hailey都等緊你！」
 
「等我？？」
 




「Katy你睇下呢段字，然後再睇下第4題點做？」
 
Katy快速睇完段字，之後再睇題目。
 
「呢題我都唔太肯定C定B。」katy苦惱咁講。
 
「定係我地依家問老師？等等先！」Katy飛快截住一個人，然後帶佢入嚟班房。
 
佢咪就全級第一既 James?！
 
「James你識唔識第4題？你睇下第3段highlight左個段字。」Katy 問James。
 
「答案咪B。」James好快講出答案。
 
「點解係B？我唔太sure係B定C。」katy問。




 
「個句有 well-intentioned 同 widened the gap，邏輯相反，即係答案係 B。」James聲音平淡，好似朗讀練習咁。
 
「咁點解唔係A唔係D？」Alice問。
 
「因為呢兩個答案講緊作者態度，並唔係題目所問既野。err…你認真啲睇下題目既字眼，入面有講到。」James講。
 
「咁點解唔係C？入面都有講socio-economic gap。」katy問。
 
「B有well-intentioned同widened the gap，所以係B。」James再重覆多次。
 
「你答alice就咁認真，我就重覆講，搞錯呀！」katy睥住James講。
 
「我已經用多左3分5秒去回答你既問題，你有咩唔明就問miss，我就要屋企操pp。katy你呢題都解唔開，今次你又係我之下。仲有記得買蜂蜜牛油味薯片，你英文TEST低我0.5分！」James笑住咁講就走左。
 




「死人James，你之後唔好問我數呀！」katy 跺跺腳講。
 
「哇屌，條友咁撚串既！」當James走左之後，Alice 即刻講。
 
「佢今次應你算認真，我就比佢串開。」katy搖搖頭講。
 
「佢咁撚樣既態度都叫好，唔撚係掛！講左等於冇講，我屌！」Alice叉住腰，一臉忿忿不平。
 
「Alice，你細聲少少啦，一陣訓導經過你準備記缺點！」katy無奈咁講。
 
Alice望向我講：「平時我唔會講咁多粗口，純粹啱啱嗰個男仔令我嬲囉！」
 
「Hailey你識耐左Alice 就知佢真面目！」katy奸笑咁講。
 
我忍唔住笑咗出嚟。其實第一次近距離接觸Alice，原來佢比想像中直率，唔係表面見到咁「完美女神」，反而多咗幾分人情味。




 
「算啦，與其嬲James，不如我地依家問miss仲好啦，我陣間仲要買心意卡。」我急忙收拾桌上既書講。
 
「心意卡？」Katy挑起眉問。
 
「我聽人講，查sir就嚟生日，所以就諗住佢生日當日，送張生日卡比佢，入面會有齊晒我地中史班學生既簽名同祝福。」我靦腆咁講。
 
「哦～原來係咁！但生日卡呢啲野賣得咁貴，廿蚊一張都嫌肉赤啦！」Alice擺擺手，「不過我係修VA㗎，等我幫你畫啦，當回禮送返比我最鍾意既Hailey老師！」
 
佢單眼對我眨咗一下，笑容俏皮得嚟帶啲壞。
 
如果我係男仔，一定拜係Alice既石榴裙下。
 
「你咁靚女，有冇諗過做演員或者歌手？」我冇諗清楚就講咗出嚟。
 
「呢啲野將來先算啦！你張卡有冇話想點design？」
 
「總之都係以生日為主題？你主要畫好封面就得，真係唔該晒你！」我向Alice道謝。
 
「咕嚕咕嚕…」聲音從我肚子傳出。
 
「Hailey你頭先又話唔餓，唔同我出去食飯？」Katy問。
 
除左心意卡，我仲想買領帶比查利揚，但我既零用錢唔夠，唯有慳返飯錢。
 
「最近減肥，唔洗理我啦！」我解釋。
 
「Hailey，如果你餓真係食返啲野，我之前因為咁樣減肥，結果上PE堂跑跑下步暈左。」Alice輕拍我膊頭講。
 
「我會㗎啦，哈哈。」我尷尬笑住講。
 
就算餓暈，只要買到禮物比查利揚，可以再見到好似選科講座個笑容，我就已經心滿意足。