搭錯線：錯誤的時間遇上你: 第五十四章：冷漠而陌生的你

於是我餓左成個星期，留返500蚊既零用錢，再加埋我本身既積蓄，以及新既零用錢500，我終於有錢可以去買領帶。
 
之前我上網睇過幾間名牌，好幾間冇2000蚊都走唔甩，好彩比我係gucci搵到1200蚊既領帶。
 
1000蚊對學生嚟講真係好貴，不過睇落得體，再貴啲都值得既。
 
呢個星期內，除左儲錢，Alice 幾日內都畫好左張卡比我，佢將查sir同成班中史班同學用卡通q版畫左出嚟，頂方仲寫住Happy birthday。
 
然後我再主動搵佢地簽名，順便寫下生日祝福。
 




雖然平時我比較靜，少搵人講野，但係都係第一次搵10個人講野，仲要係request。
 
對於一個內向人嚟講，每次都要鼓起好大勇氣，先可以同到每一個人講野。
 
一個星期過去，今日係9月30號，星期一。
 
第一堂係中史堂，當查sir行入嚟班房既時候，我即刻將卡遞比佢。
 
查Sir有啲驚訝，好快好開懷咁笑左，問：「你地點知我生日，張卡邊個畫㗎，好靚喎！」
 




「Hailey同我地講今日係查sir你生日，上星期佢拎住張卡搵我地寫生日祝福上去。」Amy講。
 
「好呀，你地真係有心，Hailey你畫得好靚喎！」查sir帶住欣賞既目光同我講。
 
「其實唔係…」
 
「查sir生日快樂呀！你快啲睇下我地寫左啲咩啦！」Kelvin好興奮咁講。
 
查利揚滿心歡喜打開張卡嚟睇。
 




見到查利揚咁開心，我無謂阻佢睇卡，同佢講張卡唔係我畫。
 
「真係好多謝你地！」查利揚好感激咁講，仲特別望向我一眼。
 
睇嚟陣間份禮物會令查利揚仲驚訝！
.
「呵噹叮噹叮噹」到左小息時間。
 
我離開班房之際，見到katy衝入嚟班房，並搶去Alice手上既薯片。
 
「喂Katy，我仲未開呢包燒烤味薯片，你比返我！」Alice驚慌咁講。
 
「拿！呢到10蚊，當我同你買左呢包薯片，有咩陣間講，係咁先！」katy急忙跑走。
 
雖然我好想問katy發生咩事，但我已經拎住包裝精美既盒，準備去教員室。




 
.
「唔該我想搵查利揚老師。」我對住教員室咪講。
 
查Sir從教員室出嚟，我將手上既盒遞左比佢，並講：「查sir，祝你生日快樂！」
 
查利揚一臉愕然，低頭望咗一眼盒面個Logo，眉頭皺起，然後板著臉孔。
 
點解佢同頭先收到生日卡個樣咁唔同？
 
「盧正希，頭先上中史堂，我都想問你，你到底點知我生日。」查利揚一臉冷漠咁講。
 
查利揚好少叫我全名，對比起平時總係温柔既佢，依家既佢冷漠到好陌生。
 
「我都係聽人講…學校啲同學講⋯」我支支吾吾講。




 
「生日呢啲咁私人既野我唔知你點樣知道，仲有你呢份禮物我唔會收，你自己收返。」查利揚轉身就想返入教員室。
 
「點解？」我望住佢既背影講。
 
「首先，老師係絕對唔會收學生咁貴重既禮物，其次官校教師身為公務員，不得收超過學生同家長價值500蚊或以上既禮物，否則有受賄既嫌疑。我諗你唔太清楚我地之間既關係，我係老師，你係學生。」
 
聽到最後一句，我心中一沉，因為查利揚同我劃清界線。
 
「但係份禮物你都收左佢…」我仍然勉強牽起笑容。
 
「我唔會再重覆我所講既野。你退左佢，拎啲錢買野食仲好啦！」查利揚拋低呢句話就走左。
 
我緩緩移開腳步，心中逐漸感到憤怒，繼而不解。
 




我特登連飯都唔食，就係為左買呢條名牌領帶，我覺得我既犧牲好似不值一提。
 
點解卡收得，領帶又唔得？
 
正常禮物，唔係越貴重就越鍾意咩？
 
我只係想佢開心，點解佢仲要嬲返我轉頭？
 
我一邊思考，一邊係班房樓層既走廊行緊，仲見到Katy同James係到嘈架。
 
「詹日信，我忍夠你！」Katy一腳踢去James腳踝，然後怒氣衝衝就走左。
 
James抱住腳踝，跌坐在地上，睇落好痛，旁邊仲有包薯片。
 
「James，你冇事呀嘛？」我擔心咁問。




 
「無事！鍾海淇只係比我講中左，所以先嬲爆爆走左啫！」James望住Katy背影一臉不屑。「係呢，你手上盒野正野嚟喎，咩嚟㗎？」James有點好奇望住個盒講。
 
我望住盒上Gucci既Logo，嘆左口氣講：「你都話正野，可惜我個…朋友話作為生日禮物嫌貴，好嬲話唔收，仲叫我退貨。」
 
「如果以我作為朋友嚟講，我都唔會收。」James突然正經咁講。
 
「你都話正野，點解唔收呢？」
 
「就係因為正野，下次回禮咪要買返咁貴！我冇咁多錢去回應呢份沉重既心意！喂，Hailey我走先！」James急忙抱住包薯片，跑走左。
 
我回頭一望，係Katy。
 
對比起頭先既憤怒，依家既Katy望落係難過。
 
到底Katy同James之間發生咩事？