搭錯線：錯誤的時間遇上你: 第五十六章：如果你係童話故事既男主角

燈飾閃爍，婚禮現場佈置得柔和溫馨，入場的每位賓客臉上都帶著喜氣。
 
身為新娘家屬，我坐在門口的禮金接待位，負責收禮金同記低來賓既名字。
 
「多謝晒，請入去呀～」我對住每個來賓都微笑住講。
 
一隻修長白淨的手放下一封紅色信封。
 
我用眼尾掃過，眼前既人冇戴眼鏡，五官仲有幾分似查利揚，望落五官清秀。而且呢個人身上飄住淡淡木香，我都忍唔住係咁聞佢係到既空氣。
 




婚禮上見到靚仔，我嘴角不禁向上揚。
 
「麻煩先生係隔離簽名，同埋請問你名係咩呢？」我抬頭認真望一望靚仔，眼前呢個人唔係貌似查利揚，直情係查利揚。
 
佢著住一件襯到膚色既淺藍條紋襯衫，簡單得嚟，有種落咗office再出嚟食飯既自然感覺。佢同平時企喺黑板前教中史嘅樣子，好唔同——少咗嚴肅，多咗幾分難以接近嘅沉穩。
 
我微微張開口，想問佢點解會係度，下一秒諗起，佢係家姐個中學朋友，點會唔嚟？
 
我唔係唔知佢會嚟，而係呢排忙住讀書，加上有時幫家姐搞婚禮既事，一時之間醒唔起。
 




最重要係自從佢生日拒絕收我個份禮物之後，除左問功課同科長職務之外，我真係冇再同查利揚講野。
 
我只係唔想對冇結果既事投入咁多心機，我付出咁多，最後換黎既，唔單止係冇回報，仲要比佢當面劃清界線，當我越軌。
 
「你唔認得我？」查利揚視線停留係我手上片刻，然後笑一笑。
 
你對住我仲可以咁輕鬆笑，我真係做唔到。
 
只係今日係家姐結婚既大喜日子，我唔想破壞氣氛。
 




「你冇戴眼鏡，一時認唔到你啫，查sir。」我帶住微笑，係貴賓名單上剔左佢個名。
 
「查理！」查利揚身後，出現左yumi同John。
 
佢地都係家姐既中學同學。
 
「妹妹，呢2封係我同yumi既禮金。」John 講。
 
「唔該晒你地！」我笑笑口咁講。
 
「查理唔戴眼鏡果然最靚仔，你有冇諗過做激光？」yumi急忙咁問。
 
「今日重要日子先戴con，平時都係戴眼鏡最舒服。」查利揚回答。
 
「咁又係呀，要同靚靚新娘子Hazel影相，睇你頭都gel埋就知！」yumi興奮咁講。




 
「查理，我們一起追過既女孩──Charlotte，就係入面，聽講佢係外國返嚟冇耐，依家做緊檢控官。話時話，你地係咪仲有聯絡？」John講。
 
「John，你咁冇記性㗎！Charlotte 同Charlie 係由細識到大，點會冇聯絡？佢同你冇聯絡就差唔多！」Yumi挪喻John講。
 
「唔理你！我同查理搵Charlotte，係咁先！」John拉住查利揚入左去，Yumi隨後走埋。
 
Charlotte？我們一起追過既女孩？
 
唔通呢個青梅竹馬，係查利揚冇開花結果既初戀？
 
佢地有冇開花結果，關我咩事？
 
「唔該…」眼前既賓客放下信封。
 




「唔該晒，麻煩講你地既名。」
 
盧正希，專心收錢同寫名，唔好諗呢兩樣以外既野！
.
「各位嘉賓，大家好～」主持人聲線溫柔響起，「今日係Hazel同Wilson 生命中非常重要的一日，多謝大家百忙之中出席，見證佢哋踏上人生新階段。」
 
全場靜咗一靜，螢幕上慢慢浮現出一張張相──
 
由小學時期帶牙箍的Hazel，到中學穿校服拎畢業證書，成班人揸住畢業帽向上拋既班相，包括John同Yumi，而我眼睛停留係中間——查利揚同Charlotte，佢地企係對方旁邊，笑得好開心，睇嚟佢地關係真係好親密。
 
我眼角瞄到查利揚，佢視線望住螢幕，表情平靜得幾乎無波動。
 
畫面轉去Wilson同Hazel去日本既合照、係海邊散步，最後係Wilson偷偷舉牌求婚，Hazel眼濕濕笑住點頭嗰一幕，然後親吻對方。
 
「呢段旅程，佢哋一齊經歷咗無數既笑與淚，一齊追夢，一齊成長。接住落嚟，請大家將掌聲留比——今日最靚既新娘，Hazel 盧素恩小姐，與佢最愛的Wilson麥梓翰先生！」




 
燈光再度聚焦係紅地毯上。
 
音樂起，係熟口熟面既《Perfect》鋼琴版。
 
Hazel着住一襲白色魚尾婚紗，拖住爸爸隨住音樂緩緩步入場中央。Wilson站在盡頭，眼中滿是笑意。
 
「嘩……」我忍唔住細細出聲。
 
音樂漸漸收細，主持人微笑開口：「接住落嚟，就係最感動人心既一刻——新人誓詞同交換戒指。」
 
Wilson 望住 Hazel，聲音有啲顫，但每個字都清晰：「Hazel，遇見你之前，我以為幸福係一件遙不可及既事，但你用笑容同溫柔，將我生活既每一個平凡日子都變得特別。
 
我承諾，無論將來遇到順境定逆境，健康定疾病，我都會拖住你既手，一齊面對。
 




今日，我願意將我既一生交俾你，因為我知道，呢個決定，係我一生中最正確既事。」
 
Hazel 唇角微彎，眼睛泛光：「Wilson，謝謝你係我生命中出現，令我成為一個更好既人。
 
我地一齊經歷過笑聲、眼淚，甚至爭執同沉默，但每一次都係因為愛，令我哋走得更近。
 
從今日開始，直到我生命嘅最後一日，我都會愛你、尊重你、支持你，因為你係我最愛、最親密嘅伴侶。」
 
戒指套上彼此的手指，兩人笑住擁抱，全場再次爆出掌聲。
 
現場響起一片掌聲，Wilson媽媽拭淚，我亦忍唔住幻想——如果站係台上既係我同查利揚，會係點呢？
 
「我諗你唔太清楚我地之間既關係，我係老師，你係學生。」
 
呢句話係我腦中一直揮之不去。
 
「咀佢，咀佢，咀佢！」全場起哄聲此起彼落。
 
我急忙拍手，跟住在場既人一齊起哄。
 
Wilson微微一笑，目光溫柔地望住Hazel，慢慢伸手輕摟住佢條腰。Hazel眼神閃過一絲羞澀，但很快被幸福蓋過。兩人一步一步地靠近，兩片唇瓣輕輕相貼，深情地吻落去。
 
台下再次爆出熱烈嘅掌聲，閃光燈此起彼落，定格咗呢個屬於佢哋嘅浪漫一刻。
 
然後，我望一望查利揚，佢唔知幾時望返嚟，同我四目交投一秒。
 
點解佢都會望左過嚟，巧合定係…刻意？
 
我即刻移開視線，係枱拎起水杯，即刻飲左啖水。
 
童話故事既結局最後都係結婚，如果我係女主角，唔知我既男主角係咪你呢？