搭錯線：錯誤的時間遇上你: 第五十七章：因為，我唔想…...

「依家有請新郎同新娘，一齊切蛋糕！」主持人笑住宣布。
 
Hazel同Wilson對望一眼，嘴角同時揚起，像是心照不宣。隨即，兩人一同握住刀柄，在眾人注視下，慢慢將蛋糕切開。
 
之後，家姐同Wilson都坐低同我地一齊食野。
 
「Hailey今年係咪中六，就嚟考dse？」Wilson媽媽問。
 
「係呀。」
 




「咁忙都幫Hazel同Wilson收左成日禮金，你食多啲蝦啦！呢度啲蝦好好食㗎！」Wilson媽媽將盤撥去我個邊，方便我夾餸。
 
「唔該晒。」我燦笑向Wilson媽媽講。
 
Wilson媽媽坐我對面，佢身後就見到查利揚個枱，查利揚隔離分別係John，仲有一個陌生臉孔既女人。
 
佢身穿一套剪裁俐落既深藍色西裝，雙排鈕扣設計襯托出幹練氣質，內搭簡潔白色上衣，顯得清爽而專業。長直髮自然披肩，眉下勾勒出精緻五官──直挺鼻樑、細緻唇形與一雙俐落有神的雙眼。
 
呢個人應該就係Charlotte。
 




佢同查利揚有傾有笑，查利揚仲要比平時笑得輕鬆，呢個係我好難先見到既畫面。
 
我送生日禮物就係想見到呢個笑容，點解佢同Charlotte 傾幾句，就可以展現出嚟？
 
Charlotte靠近查利揚耳邊講悄悄話，睇嚟佢地真係識左好多年既朋友，完全係冇異性距離咁滯。
 
我同查利揚既距離，或者就好似隔左一張枱，睇落好近，實際好遠，我淨係知表面既佢，同埋觀望佢既反應，而查利揚枱上任何人，都比我更了解佢既性格，特別係佢地有過去中學6年既回憶。
 
我瘋狂將野食放落口，咬碎佢地。
 




「Hailey做咩食得咁急，你好肚餓？」爸爸細聲咁講。
 
「唔係呀，學Wilson媽媽話齋，啲蝦太好食啦，哈哈…」我覺得有啲口乾，就拎左杯可樂嚟飲。
 
我一口氣飲晒成杯，先發現啲可樂味怪怪地。
 
因為我飲落係酸酸地，又苦苦地，唔甜同冇氣既。
 
「Hailey你做咩飲我個紅酒！」爸爸緊張咁講。
 
「我拎錯左咩？」我趕快望枱上既飲料，只見眼前充滿氣泡既啡色氣泡水映入眼簾。
 
今鋪真係仆街，未夠18歲飲左酒。
 
「Hailey，你有咩唔舒服同阿爸講呀！」爸爸一臉憂慮講。




 
「少少啫，冇事啫！」我笑住同爸爸講。
 
爸爸夾左隻蝦比我，我就繼續食野。
.
上晒菜之後，家姐就同Wilson 去換衫，準備影相環節。
 
我地一家人影左相，再同親家一家影完相。
 
之後我同父母坐係到等，等啲人差唔多影晒，先再送客。
 
我見到Charlotte 同查利揚並肩行出嚟，上梯級個陣，查利揚仲伸手比Charlotte 扶。
 
我今日都著左高踭鞋，都行到上去呢啲咁低既梯級，Charlotte 唔係真係要查利揚扶呀嘛？
 




下一秒，Charlotte 微微一笑，就將手輕輕放係查利揚手心上面。
 
Charlotte唔通對查利揚有意思？
 
一諗到呢到，我就將枱上面未食完既餸，繼續放落碗食。
 
「Hailey你今晚食左好多，仲食得落？」媽媽皺住眉頭問。
 
我滿口都係炒飯，講：「鵝食吉晒！！」
 
媽媽搖搖頭，繼續覆朋友msg，冇再理我。
 
等緊家姐同人影相既時候，唔知點解，我越嚟越覺得頭暈，仲有啲想嘔，於是我衝左去廁所嘔。
 
我既腳步微微一晃，高跟鞋在地毯上卡了一下，差點失去平衡之際，有人扶住左我。




 
「小心！」
 
我望向旁邊既人，係一個冇戴眼鏡既靚仔。
 
「冇戴眼鏡既靚仔，邊個嚟㗎？咁熟口面既！」我傻笑咁講。
 
佢冇出聲，只係扶住我，帶我返去宴會。
 
「哇，你真係好人，唔似得某啲人……送完禮物比佢，就比佢鬧到成面屁，唔想…唔想睬佢呀！」我接住講：「喂，靚仔，正常有人送左….送左份禮物比你，你唔會開心咩？開唔開心啫？」我係咁拉住佢手臂講。
 
「當然會開心，但要睇對象同場合。」眼前靚仔點解分裂左2個？
 
「生日送禮物係好正常既事，家陣送禮物都得罪人呀？佢發咩火啫！到底我做錯啲咩喎？」我坐係地下，開始大喊。
 




靚仔跪低盯住我，我連佢呼吸聲都聽得一清二楚。
「因為，我唔想….」靚仔終於合二為一。
.
 
「鈴鈴鈴….」鬧鐘響起。
 
我揉揉雙眼起床，只感覺陣陣頭痛。
 
「喂，盧正希你終於起床，你知唔知你琴晚幾失禮？」家姐帶點生氣咁講。
 
「發生咩事？」我打住呵欠問。
 
「你琴晚啲野唔記得晒啦？總之你刷完牙洗完臉，快啲wts查理多謝人啦！」
 
「點解要多謝個查利揚？」
 
「你仲咁冇禮貌，你整污糟左查理套衫，佢套衫好貴，洗唔甩就麻煩！」家姐唔耐煩咁講。
 
我連牙都唔刷，即刻wts查理揚。
 
「查sir，聽家姐講琴日我整污糟左你套西裝，真係唔好意思。」
 
「如果琴晚有咩令你唔高興，我同你道歉。只係琴晚到底發生咩事，點解我冇晒印象？」
 
我努力想記起琴晚既事，只係越用腦回憶，個頭就越痛。
 
「唔緊要，好小事啫，西裝洗一洗就冇問題。」
 
「你琴晚飲醉，咁啱我去完廁所，見你睇落醉醺醺，就扶左你出嚟。」
 
廁所靚仔果然係查利揚。
 
「之後你父母見你咁既樣，就問我可唔可以留到完場，主要佢地要招呼賓客離開，咁我同Charlotte 就係隔離睇住你，你走唔切，唔小心嘔左落我到。」
 
又係Charlotte。
 
原來都係3人行。
 
「咁你係廁所扶我個陣，係咪講左啲好重要既野？」
 
對話顯示輸入中….
 
我緊握手機，心臟怦怦地跳動，呼吸都變得急促。