搭錯線：錯誤的時間遇上你: 第五十八章：就算我係你生命中既過客，都希望你記得我

「我見到你突然喊，於是就安慰你，內容冇咩特別。」
 
「不過生日個日，我語氣係重左啲，如果你介意，我講聲Sorry。」
 
內容真係冇特別？我好肯定斷片之前，佢係有嘢想同我講。
 
片段開始浮現——我半坐喺地毯上，眼前燈光搖搖晃晃，查利揚既輪廓被光影割成碎片。我含糊咁講佢唔收我生日禮物，佢一臉專注咁望住我，唇角微動：「因為，我唔想……」
 
聲音沉進人群嘅喧鬧裏，像被吞噬。下一秒，眼前一黑。
 




佢唔想？唔想啲咩？我再努力諗，都醒唔起。
 
自從婚禮個日，查利揚睇落冇咁冷漠，變返好似之前咁溫柔。生日禮物一事睇落好似冇發生過。
 
今日中史堂，查利揚比我地自習溫書，有咩唔明就問佢。
 
我見到pp有題寫住「唐初與明初在田制的目標與方法有何相似之處」，我起左個大綱，都有左啲論據，但論點同推論唔太識寫。
 
於是我去老師枱問查利揚：「查sir，你睇下呢一題：『唐太宗與明成祖在田制的目標與方法有何相似之處？ 』均田制同屯田制一定係理據，但Simon 同Judy佢地兩個咁唔同既皇帝，政策點會有相似地方？」
 




查sir聽完笑一笑，放低手上支筆。
「唐太宗同明成祖既性格、背景係好唔同，但有啲歷史規律，會令佢地既政策出現相似。」
 
我愣一愣：「規律？」
 
「係呀。均田制同屯田制表面上唔同，一個分田比百姓耕種，一個由官府組織耕作，但背後目標有共通——都係想確保糧食穩定、保障稅收來源、維持軍隊供應。」
 
「哦…即係雖然佢地方法唔一樣，但都係為左鞏固國家根基？」
 
「冇錯。仲有，兩個時期都係戰後恢復期，唐初係經過隋末大亂，明初係元末戰亂，社會秩序要重建，所以要用田制去安定民心同經濟。」查利揚接住講：「你明推論點寫未？」




 
「你頭先講既就係推論，首先搵出制度共通點，立論點，適當時候用背景同制度內容做論據。我既理解啱唔啱？」
 
「冇錯，100%正確。」查利揚笑住講，同時佢拎起我枱上面既筆記嚟睇，然後講：「你啲筆記整理得都好清楚，有齊晒背景、經過、結果同影響，怪唔知一睇條題目就知要用均田同屯田制，睇嚟你都溫到入晒腦。」
 
「中史靠查sir你既筆記唔夠㗎。」
 
「我既筆記都唔夠？」
 
「我意思係，筆記要經過自己整理先入腦，查sir你都係整理左咁多筆記，依家成個腦都係中史同答題方法。」
 
查利揚笑住點頭：「你咁樣keep住落去，5**都有機會拎到！你分分鐘做到我第一個拎5**既學生。」
 
「係咪真㗎？5**邊有咁易拎到？」我講。
 




查利揚認真望住我講：「我係認真，唔係講笑。你有天份，只係差自信。比啲心機啦！我睇好你同Katy，你地一定可以拎5以上。」
 
我行返埋位，Katy就細聲問我：「你同查sir傾咩傾得咁開心，咁快冇野啦！啱先我仲聽到我個名！」
 
「佢話我有機會拎到5**，仲話都睇好你！」
 
「梗係啦！我地係中史係霸佔1同2名既人！」katy得戚咁講。
 
「咁我地要努力啲啦～」我笑住講。
 
「Irene琴日同我講，話想組study group，佢已經問左mimi，Cindy, Alice，我就諗不如叫埋你，反正大家一齊溫書，有咩唔識都可以傾，我知你內向，不過你識我同Alice，唔太大問題啦！」
 
「有你地兩個就得啦！」我爽快答應。
 
「到時佢地約出嚟我再同你講！」katy興奮咁講。




 
我抬頭一望，見到查利揚答緊其他人問題。
 
如果我做到第一個拎5**學生，查利揚一定會記得我呢個學生。
 
就算你唔係我既男主角，係你人生中我只係一個過客，我都希望你可以記得呢一位過客。