搭錯線：錯誤的時間遇上你: 第六十章：願望樹下的秘密

小息時間，katy同irene過嚟班房搵我同alice。
 
「聽日就係我地最後一年既Christmas party。」katy沮喪咁講。
 
「聽講今年學生會有新搞作。」Alice 講。
 
「係呀，佢地整左棵聖誕許願樹，話比全校學生許願。」irene講。
 
「我前幾日就見到學生會係小賣部個邊整緊聖誕樹，我仲以為佢地係裝飾擺設。」我講。
 




「陣間午息我地睇下棵樹？」Alice提議。
 
「好呀！」我附和Alice。
 
午息我地食完飯過嚟，就去小賣部。
 
我見到查利揚拎住盒飯上樓梯，由於距離太遠，我都叫唔切佢。
 
聖誕樹上已經掛左少量既願望。
 




「希望聖誕出pool！」
望到呢句，突然諗起黃大仙既我，個陣我話想出pool，但我個陣心浮氣躁，求極都求唔到籤，查利揚就幫我求籤。
 
籤文話會出現表白或者暗戀，個陣我以為，就算用查利揚隻手抽，佢都係抽比我，冇諗過呢支籤對於佢本人係靈驗左——確實我一直暗戀緊佢。
 
而下面極醜樣既字引起我注目，我睇左陣先睇得明，有啲字仲要靠我去估。
「希望dse中史班既學生，無論係考試抑或人生，都可以達成自己目標。DSE加油！」
 
好明顯係查利揚寫，連寫願望都諗住我地中史班。
 




「喂，Hailey，你睇緊啲咩咁開心？唔好收收埋埋，要開心share~」Alice講完，就拱過嚟睇願望紙，講：「啲字鬼畫符，我淨係睇得明dse咋喎！」
 
Katy同irene聽到Alice 咁講，都望左過嚟。
 
Katy講：「明顯係我地中史阿sir寫，佢啲字不嬲咁潦，Hailey, Alice, 我拎埋你地啲願望紙。」
 
Irene比埋筆比我同alice。
 
我地就係到寫大家既願望。
 
我再望望「鬼畫符」既願望紙，於是就開始寫我既願望。
 
「我寫好啦！！！」Alice好興奮咁講。
 
「咁快，啱啱好我都寫完，仲差Katy同Hailey。」Irene講。




 
我寫完願望紙，就望向Katy，只見佢一臉苦惱，願望紙上面仲係空白。
「你想寫你想做既野就得啦，唔洗咁苦惱喎！」我講。
 
「Katy，你睇下Alice 寫咩？」irene拎左alice既願望紙。
 
「我要做香港小姐冠軍！」
 
Katy捂住嘴偷笑，眼角帶住一絲狡黠：「噗哈哈哈，我支持你！只不過美貌與智慧並重，你有美貌但智慧方面呢….」
 
「喂！屌你老母！」Alice 嘟起嘴，一手推咗Katy一下。
 
Katy笑得更開心：「你睇下你，到時比人笑一笑，就爆粗，你咩形象都冇晒啦！」
 
我係旁邊聽到都覺得好搞笑，默默咁將自己個願望掛左係查利揚附近，只係佢附近都冇咩位。




 
「Hailey你掛呢到啦！」 irene指向下方。
 
我睇到irene既願望，寫住「我要直入A1！」。
 
「Irene，你想讀咩科？」我問。
 
「我想做心理醫生，聽下人講心事，咁你呢？」
 
「我想做老師，教識人好有成功感，同埋做老師甚至可以改變一個學生，我都想成為一個好老師。」
 
「見到願望紙就知你諗咩。」irene笑一笑咁講。
 
「Katy條友，啱啱仲笑我，你寫到願望未呀！」Alice 挪喻katy講。
 




「得啦得啦，寫完啦！」katy寫完，就show左3張願望紙比我地睇，分別係：
 
「Dse一定要攞爆5**，hku大門等緊我！」
 
「早日識返個靚仔同專一既男朋友，凡事以我為先🩷」
 
「我要賺好多好多錢，40歲退休環遊世界！！！」
 
「屌你呀，咁撚貪心㗎，人地學生會寫明一人一個願望，你就寫3個願望，之後啲人想掛就冇位掛，到時我會同佢地舉報你！」Alice講。
 
「香港小姐冠軍，你趁依家學習下儀態，你咁講野嚇走晒啲評判！」katy反擊。
 
「你咁多願望，點解你咁先諗咁耐？」我疑惑咁問。
 
「諗緊寫邊個呀嘛～最後唔理學生會寫既野lu！Hailey你寫左咩？」




 
「我寫左：『希望dse可以達到自己理想分數，可以揀到自己想要既科。』」我指住下面願望紙講。
 
「咁我希望大家既願望都可以實現～」katy興奮咁講，就將3個願望掛係聖誕樹上。
.
今日係Christmas Party，一諗到依家距離study leave越嚟越近，可以見查利揚既日子都倒數緊。
 
所以要趁Christmas Party，搵查利揚影相！
 
一返到學校，我就去教員室搵佢，但叫左幾次咪都唔見佢出嚟。
 
我只好抱住失望既步伐離開。
 
之後我就同Alice一齊落去Hall睇表演。
 
Katy話最後一年，想儲多啲回憶，於是Irene問佢上台玩唔玩比賽，Katy就應承左。
中六學生既好處係，可以坐Hall最前排睇表演。
 
Kpop dance、估歌時間、大電視、搭錯線，仲有最後新加既環節——「最後一分鐘」，參賽者二人一組，一分鐘內完成項目，方可得分。
 
「接住落嚟我地玩搭錯線，有請5A班…..」
 
台上係女學生同男老師，就好似上年既我同查利揚。
 
「真係可惜啦，今局冇分，不過表現非常精彩，帶咗好多歡樂比大家！比啲掌聲鼓勵下佢哋！」
 
「今年嘅搭錯線對答都好有娛樂性，而五組之中，只有第一組成功得分，所以恭喜第一組奪冠！」
 
我腦海閃返起上年嗰一幕——
「有人同你表白，你會應？」
查利揚望住我，答案係：「今日係我哋拍拖第一日。」
 
我當時問查利揚，佢既回答係：「因為我咁啱就係搭啱線，我都覺得好神奇。」
 
之後佢就轉身離開，當時我都睇唔到佢咩表情。
 
其實，到依家我都有諗過──搭啱線唔係巧合。
 
雖然一次又一次比佢劃清界線，但我總覺得我一直以嚟既感覺，並唔係錯覺。
 
*******
調整更新時間，逢星期四同五更新，多謝大家支持。
加更條件：追稿讀者每達5人，即可加更。