搭錯線：錯誤的時間遇上你: 第六十一章：最後一分鐘
「跟住落嚟，就係我哋嘅新節目──『最後一分鐘』！大家準備好未？」男司儀講。
「準備好未呢？」女司儀做出遞咪既動作。
「準備好！」台下既歡眾紛紛大喊。
「最後一分鐘係今年啱啱新增既環節，參賽者需要一分鐘內完成任務。而參賽者由2個人組隊，同另一隊對決，最快完成既組伍就會勝出，未能係一分鐘內完成任務，當作落敗，我地會以3局定輸贏。」男司儀講。
「依家有請中六同學James, Katy, Alice同Cindy上嚟比賽。」
全場拍掌歡呼。
Katy同James係同一隊，而Alice同Cindy係另一隊。
「你地會唔會幫隊伍改返個名呢？」女司儀問。
「哼﹗我地個隊叫『巨無霸』，代表一定稱霸全場！」James神氣咁講。
「哇～原來係『巨無霸』隊，睇個名就知好有霸氣，誓要稱霸全場！」女司儀笑住講，帶動氣氛。
「咁另一組呢？面對住咁有信心嘅對手，你地又諗住用咩名去迎戰呢？」
Alice神秘一笑，然後自信咁講：「我地叫『金碩珍』！追開Kpop同BTS綜藝就知啦──只要個組名叫金碩珍，就一定贏！」
女司儀即刻接住落去：「嘩～原來有迷信加持！咁今場比賽就更加有得睇啦！」
「事不宜遲，即刻同大家介紹第一個遊戲——手震腳震。參賽者需要在手臂同大脾綁上四個計步器，然後手腳不停郁，只要一分鐘內，計步器要累積到共500，如果兩隊都超過500下，就揀最多步數為勝利隊伍。」男司儀講。
司儀講野既同時，學生會既人已經幫佢地扣緊計步器。
「巨無霸同金碩珍隊，你地準備好就可以向司儀點頭示意開始。」女司儀講。
兩組都點頭，比賽正式開始。
Katy同James好努力咁跑步，至於Alice同Cindy係到跳舞，仲要跳緊Bts 既 Boy with luv。
有睇開Kpop既人當然嗌得好勁，尖叫聲令佢地跳得更起勁。
儘管對手氣氛高漲，James同Katy繼續跑步，冇被對方影響節奏。
「嘟嘟嘟….兩邊請停低，等工作人員count 兩邊步數。」
隔左一陣，男司儀講：「由於兩組都過左500下，我宣布係『金碩珍』以589步勝出『巨無霸』既543步，『巨無霸』下局要加油啦！」
「接落嚟係『蘋果疊羅漢』，參賽者需要將四個蘋果逐一搭高，形成一個蘋果塔。若果個塔倒塌，可以重新再搭，但必須要喺60秒內完成，否則呢個就輸！」女司儀語氣拉長，台下已經傳來一陣歡呼聲。
Alice同Cindy全神貫注望住枱面，喉嚨忍唔住吞咗一啖口水。反觀James同Katy，雖然嘴角帶笑，但其實不停交頭接耳，似乎都在密謀戰術。
「準備好未？」司儀環視兩邊。
四個人同時深吸一口氣，然後向司儀重重點頭。
「3…2…1——開始！」
秒針聲響起，現場氣氛即刻繃緊。
Alice小心翼翼將第一個蘋果放穩，當佢將第二個慢慢疊上去時，上面個蘋果「咕碌」一聲跌落枱面，觀眾忍唔住發出驚呼。Cindy急忙彎腰撿起蘋果。
另一邊，James捧住蘋果轉來轉去，眼神專注，似乎要揀一個最穩既角度，然後比Katy小心翼翼疊上去。第三個蘋果擺上去時，成個塔開始危危乎，晃得台下同學都「嘩」聲四起。
時間一秒一秒流逝，四人幾乎屏住呼吸，包括觀眾既我睇得好緊張，生怕一個不小心佢地就前功盡廢。
最後一個蘋果由James放上去，蘋果輕輕觸到頂端，整個塔瞬間搖晃，晃得台下觀眾齊齊「啊——」一聲。
倒數聲響起：「五！四！三！」
蘋果塔睇落好似下一秒就會倒，但最終穩穩停住。
「二！一！」
「時間到！成功！」男司儀高聲宣布，頓時全場爆出熱烈掌聲同歡呼聲。
Katy忍唔住雀躍跳起，轉身同 James 擊掌：「贏咗！」
James勾起嘴角，抬高下巴得戚咁講：「講過啦，巨無霸必勝！」
Alice同Cindy都拍手恭喜佢地贏左呢個回合。
「啱啱睇到我地都好緊張。跟住就係纏『棉』遊戲，參賽者必須用鼻子將六個棉花球逐一由左邊既碗運送到右邊既碗。參賽者在鼻尖搽上啫咖哩膏幫忙運送，如果無辦法在60秒內完成任務就會輸，你地準備好就向我地點頭，示意開始。」女司儀講。
兩隊討論戰略，過左一陣，佢地都點頭。
「3…2…1——開始！」
James點完啫咖哩膏，再點棉花球，Katy跟隨佢既步伐，而隔離組同樣做法。
一分鐘內要6個棉花球，意味住平均10秒1個，可能因為時間太緊湊，兩邊不斷加緊腳步。
當James 點棉花球時候，Katy就係到掂啫喱膏。
Katy抬頭一剎那，唔小心撞到James個頭。
James㩒住個頭，就跑向另一邊繼續送棉花。
Katy步伐跌跌撞撞，但都努力點緊棉花球。
以我平時認識既James，我仲以為佢會即刻鬧Katy，出奇地佢專心比賽，冇講過一句野。
「三、二、一，比賽結束！『金碩珍』啱啱好運送到6個棉花球，而『巨無霸』差1個，所以今日勝利者係『金碩珍』，請比啲掌聲比兩隊，佢地今日都辛苦啦！」
Alice同Cindy 滿面笑容，同對方擊掌，仲大嗌：「金碩珍必勝！」
全埸歡呼同拍手之餘，更聽到唔少人既笑聲。
我見到Katy望住James睇落唔好意思，James 反而笑一笑，拍左Katy膞頭。
雖然James同Katy平時打打鬧鬧，但重要時候James冇發過Katy脾氣，仲好冷靜繼續進行比賽，可能因為呢點，就算James平時講野刻薄，Katy 仲會同佢玩。
有冇機會係——Katy係James既例外？