搭錯線：錯誤的時間遇上你: 第六十三章：口罩之吻

「Merry Christmas!」
 
「Happy new year!」
 
我係中史群組收到查利揚既message。
 
而我永遠係群都係第一個覆佢。
 
轉眼間已經嚟睇新年前既課堂，我地都如常咁上堂。
 




反正放完新年假之後，仲要返多一個月學，先放study leave。
 
我冇諗過，新年前既課堂係最後一堂。
 
疫情嚟得太突然，所有人都措手不及。學校停課，考試臨近，空氣裡瀰漫住一種不安。我開始焦急，覺得自己準備唔夠，仲有好多野未識。
 
即使提早放study leave，我都係網上交左Pp比各科老師改，當然包括查利揚。
 
只係對返dse cut off，如果想拎5**，講緊只有1-2%既人先拎到，換言之我要贏全港99%既考生。
 




「我係認真，唔係講笑。你有天份，只係差自信。比啲心機啦！我睇好你同Katy，你地一定可以拎5以上。」
 
我腦海中浮現呢句說話。
 
於是我決定wts查利揚。
 
「查sir，想問你呢排洗唔洗返學校？」
 
「當然要。點解咁問？」
 




「我想返嚟補課，我覺得有啲問題要面對面先明。」
 
「依家疫情好嚴重，你留返係屋企溫書準備考試。」
 
「我都唔知dse會唔會延期….同埋我硬係覺得溫得唔夠熟。同埋都係出嚟一陣啫，戴左口罩，就冇問題啦！查sir你都係咁返工咋嘛！」
 
查利揚隔左一陣輸入中。
 
「呢排學校都冇咩人，可以係課室溫一陣書，但你要記得，2個鐘以內要完，同埋放學時間，你有冇問題？」
 
「Okok！咁聽日放學得唔得？」
 
「好，聽日放學中史班房見。」
 
除左問中史功課之外，主要目的係——想見你。




 
疫情中，你過成點？
.
雖然今日有啲頭痛，不過約左查利揚，我就唔想甩底。
 
「查sir！」我滿心歡喜打開門口，只見查利揚用緊電腦做野。
 
「Hailey！」查利揚同我say Hi，我地就開始補課。
 
我問晒我唔識既野，查利揚就比左5條題目，全部都係唔同題型，我要寫論點論據，證明方向係正確。
 
死啦，點解依家又開始頭痛….痛到有啲諗唔到野….
 
我硬著頭皮繼續做查利揚比我既練習。
 




「Hailey，你係咪唔舒服？」查利揚突然行近我個位問。
 
「我冇事喎，仲有幾題未做完，我做完再比你睇。」我努力集中精神，繼續寫。
 
「頂硬上做出嚟既效果都唔會好，你拎返屋企做，我再改。」
 
「距離dse剩返好少時間，我唔可以晒左呢啲時間，況且今日我地約左2個鐘，依家都未完。」
 
查利揚一把拎起我手上嘅紙，截斷咗我嘅動作。
「今次補課到呢度，你放學即刻去睇醫生！」
 
我勉強想企起身，打算搶返張紙，但腳步一虛，連身體都搖晃。
 
「小心！」
 




查利揚反應極快，一手捉緊我手臂。
 
嗰一刻，時空突然重疊——眼前既畫面，同婚禮上佢伸手扶住我嘅姿態，幾乎一模一樣。
 
此時我只係覺得天旋地轉，劇烈既頭痛同時襲來，彷如鼓棍把我既頭當左鼓，不斷鼓打。
 
查利揚緩緩將我手臂鬆開。
 
「你坐低等我一陣，唔好走。」查利揚拋低呢句說話，就急忙跑走左。
 
我迷迷糊糊咁僕係將枱，等佢返嚟。
 
我感覺有人摸摸我額頭，之後搖晃我既手臀，只見到查利揚氣喘吁吁，比左盒藥比我。
 
「呢盒係pandol，你食住先。」講完之後，佢打開藥盒包裝，同時扭開水樽。




 
藥丸從我既口腔慢慢滑落喉嚨。
 
「依家送你返屋企。」講完呢句之後，查利揚就幫我執好同拎起書包。
 
我見到佢手上同時都有公事包。
 
乜老師咁早收工㗎咩？
 
我同查利揚搭lift，我本身諗住往校門方向，查利揚卻拉我向相反方向，係往停車場。
 
「你依家呢個狀態，我唔放心你一個人返去，我已經問左你家姐攞你屋企地址。」查利揚講完，我就繼續跟佢行去停車場。
 
當我地行到停車場，我就見到一架閃住燈既漆黑車輪。
 
查利揚打開車門，同時手擋係車門上面。
 
我坐副駕位，即係可以坐係查利揚旁邊。
 
突然查利揚靠近我，我心臟怦怦咁跳。
 
佢幫我扣上安全帶，同時我地好近距離咁對上眼。
 
查利揚別過臉，準備揸車。
 
我靠係車窗，腦袋仲係好暈，慢慢就瞓著咗。
 
半夢半醒之間，額頭忽然傳嚟一陣溫熱。
 
好大既手掌輕輕覆係我額頭上，同時指尖帶住溫柔既力道，慢慢移落去，順住我臉頰滑過，最後停係鬢角。
 
佢指尖輕輕撥開散落既髮絲，動作細緻得好似驚整醒我。
 
我心跳卻失控般狂跳，好似要衝破胸口。
 
「仲係好熱…」查利揚喃喃自語。
 
我感覺架車已經停左好耐，似係到左我屋企樓下。
 
但我一啲都唔想睜開雙眼，就算一秒都好，我想停留係呢個時間再耐一啲。
 
我感覺到查利揚指尖撥開我既髮絲，隨即慢慢離開額頭。
 
我忍唔住輕輕眯起眼，慢慢睜開成一條縫。
 
視線逐漸清晰，恰巧見到佢將水樽放落我額頭上。
 
冰涼一瞬滲透皮膚，令我精神稍為一震。
 
抬頭望去，我同查利揚四目相對，距離近得連呼吸都清晰可聞。
 
「因為，我唔想…你既努力化為泡影，唔想你失望，唔想你為左我…而犧牲自己。」
 
我終於記起，婚禮上我斷片前，查理揚所講既說話。
 
原來，我係佢心中係咁重要。
 
我輕輕靠近查利揚，隔住口罩吻上去。
 
車入面既空氣好似瞬間凝固，我閉上眼，好好享受呢個短暫而瘋狂既片刻。
 
過咗幾秒，查利揚輕輕將我推開。
 
我抬頭望住佢，見到佢眼神閃過一瞬間既動搖——嗰種藏唔住既溫柔同心軟。
 
但轉瞬間，佢就收返呢份情感。眼神變得冷靜而克制，好似拉起咗一堵牆，隔住我同佢之間所有既可能性，變返平時老師既眼神。
 
「Hailey……唔可以咁。」
 
佢低聲講，語氣壓抑，聽得出背後有掙扎同無奈。
 
「因為，我唔想…你既努力化為泡影，唔想你失望，唔想你為左我…而犧牲自己。」我緩緩複述當日查利揚既說話。
 
「明明…你就緊張我，唔係咩？」我聲音顫抖，幾乎喊咁樣講。
 
我接住講：「我一直以嚟既感覺，唔係錯覺！」
 
查利揚沉默一會，終於開口：「Hailey，你依家仲細，遇既人都唔多，我知呢個年紀好容易就會鍾意一個人，只不過….呢個人唔應該係我。」
 
「查利揚，我會拎5**返嚟比你睇，證明我呢份感情係認真，唔係玩玩下！」我幾乎吼出嚟。
 
「你依家病左，頭腦未必好清醒，啱啱件事我都當冇發生過，我亦都唔會同Hazel講。」佢講完呢句，就推門落車，幫我打開副駕駛車門。
 
我不情願咁落車，最後用堅定既眼神望實佢。
 
查利揚避開我眼神，勁快揸車走咗，連拜拜都冇講。
 
明明你都鍾意我，醉酒個陣你所講既野，我全部都記起。
****
Thread整左呢章既影片，仲有下章既預告🤭
https://www.threads.com/@in.the.fantasy/post/DODk0gqkTA1?xmt=AQF0OY54YvviWzXUGSASrDMQ9PQonbdhVmc5aqHWRj0VfQ&slof=1