搭錯線：錯誤的時間遇上你: 第六十四章：我們也醉了

https://www.youtube.com/watch?v=igIfiqqVHtA&t=1s

BGM：Taylor Swift - Enchanted

************************************

個陣我去廁所嘔完，出返嚟就見到查利揚。
 
佢見到我就嚟仆親，不但扶住我，仲提我小心。
 




之後我開始發酒瘋，大喊大鬧，仲問查利揚點解唔收我份生日禮物。
 
一直以嚟我都唔明佢點解唔收我份禮物，直到佢講左呢句：「因為，我唔想…你既努力化為泡影，唔想你失望，唔想你為左我…而犧牲自己。」
 
當時既我只係傻笑咁應佢：「我，點解會，失望？努力，點解會冇用？鍾意一個人唔係會為左對方，而犧牲自己，換取對方既快樂咩？你開心，所以我開心。」
 
查利揚就講：「正如你所講，對自己總會受影方影響，你流淚，所以我流淚。如果愛一個人，係唔會想見到對方為自己而犧牲，自己都會心痛。」
 
「咁你依家好心痛，對我呀？」我攤係地下，好開心咁講。
 




查利揚只係望住我苦笑，然後伸手整理我臉頰既髮絲。
 
「睇下你，就嚟食頭髮！仲要地下污糟呀！」佢無奈咁講。
 
「做咩緊張我食頭髮，我食頭髮都唔關你事啦！除非你鍾意我呢？哈哈哈！」
 
查利揚淡淡一笑，繼續整理我既髮絲，講：「如果我唔係老師，你唔係學生，或者答案就會有唔同。」
 
「咩呀，依家我係你中學朋友個妹，都唔係老師同學生，點同呀！」我發脾氣，係地下滾動。
 




「唉，點解連發脾氣都咁得意….」查利揚笑住講完，就直接背住我。
 
「放我落嚟呀！」我打住查利揚背脊講。
 
「陣間就放啦！忍多左先啦！」
 
我玩弄查利揚既頭髮，講：「哇，查利揚，你啲頭髮比我想像中少喎，都叫左你，咪飲咁多齋啡！」
 
「我啲頭髮真係咁少咩…」查利揚講。
 
「典解你日日都忍齋啡？你真係好鍾意飲齋啡喎！」我挨緊查利揚，聞到佢微微既髮香。
 
「我唔飲就會好辛苦，每一日會好難度過。」查利揚苦笑講。
 
「十萬個為什麼？為什麼！！！！」我繼續傻笑咁大喊。




 
「自從你既出現，我日子已經冇咁難過。」查利揚淡淡然咁講。
 
「查利揚，查利揚，查利揚！！！」我繼續發酒癲。
 
「我同你講個秘密呀，你唔好同其他人講，講左比人知我就會扯你頭髮，等你甩頭髮！」我扯左查利揚頭髮幾下。
 
「好好好，你講。」
 
「如果我唔係鍾意你，可能我就比felix打動左，做左佢女朋友！」
 
「Felix同你表左白？幾時？」查利揚突然焦急咁問。
 
「你咁緊張㗎～你估下？」
 




「你話講秘密，仲未講完。」
 
「我生日之前呀～我都已經拒絕左佢….佢個陣….佢個陣好sad，就好似你唔要我份生日禮物咁，個心個痛…你應承我，以後唔好咁惡對我，唔好忽冷忽熱…鳴鳴鳴….」我鳴咽。
 
「好，以後我就溫柔咁對你，唔再用惡個面對你，好唔好？」查利揚好似哄小孩咁哄我。
 
「講過要算數，你都知你會反口！講大話甩大牙！」
 
「講大話，我甩頭髮ok？」
 
「算你啦～」
 
「Hailey，點解你會揀我唔揀felix？」查利揚問。
 
「你靚仔過felix囉！哈哈哈！」




 
「除左靚仔呢？」
 
「查利揚係中史傻佬！淨係識中史！」
 
「查利揚係A0！！！！！」
 
「唔係，查利揚係O1，其實佢女朋友係….中史！！！」
 
呢個時間，查利揚將我背到婚禮場地，並將我放係櫈上，叫Charlotte 睇住我。
 
查利揚同我屋企人交代左我既情況，佢就同Charlotte 一齊睇住我。
 
「阿揚，你真係唔話得，背左阿妹咁耐。」Charlotte 同查利揚講。
 




阿揚？Charlotte 叫到查利揚好親切。
 




「佢係hazel個妹，又係我學生，見到佢飲醉，冇理由唔帶佢返嚟。」
 
「阿妹同 Hazel 生得幾似樣……不過，佢對眼最似 Cecilia。」
 
Charlotte 停咗幾秒，望咗查利揚一眼，再慢慢講：「阿揚，你都飲左酒，啱啱又用左咁多體力。陣間我揸車送你返去，你休息下啦。」
 
點解我覺得佢地咁登對，好似男女朋友。
 
仲有Cecilia 係邊個？佢同查利揚係咩關係？
 
「你啱啱返到香港，我係咪你架車第一個乘客先？」
 
「我個車第一個客係我Daddy，你幾時得閒上嚟我屋企食飯？」
 
除左心酸，我個口仲有一股酸意。
 
查利揚諗左陣，講：「我諗下星期….」
 
「呃——嘔——」我忍唔住向前嘔。
 
我抬頭一望，好似係查利揚？
 
之後腦前一片漆黑，我就冇晒印象。
 
我諗，個一晚發生既事，大致應該咁多。
 
依家既我啱啱食完藥，攤係張床，望住wts對話框發呆。
 
我做左快測，有兩條線。唉，我留係屋企竟然都中左，應該係阿爸前幾日開始咳，我仲以為係普通感冒，點解都咁攰。
 
唔只個身攰，連腦都攰到郁唔到。
 
我諗緊點同查利揚講好，對於今日kiss左佢既事。
 
我醒起書包有包pandol，係咪要還返比佢？
 
用呢個做藉口，去搵佢啦！
 
「查sir，你盒pandol洗唔洗還返比你？」
 
「唔洗，我仲有好多盒。」
 
「疫情一盒pandol難求，不如我比返你，萬一你比我傳染到點算…」
 
「你病就好好休息，唔洗擔心我。」
 
佢又推開我。
 
「我考試之前，係咪仲可以搵你，淨係問功課？」
 
「冇問題，但你記得溫埋其他科，特別英文。」
 
「我知道啦，我唔會令你失望。」
 
「👍」
 
即使查利揚咁講，我考試之前冇再搵過佢。
 
我想靠自己，考到5**返嚟。
 
只係，呢個對話結尾，足足停留左成8年，直到我再遇返你。
 
「鈴鈴鈴」我既電話鈴聲響起。
 
「我諗你應該冇左我個電話，我電話號碼冇變過。」查利揚望住我講。