搭錯線：錯誤的時間遇上你: 第六十五章：好朋友的妹妹

「學生組織於2月25日開設『要求教育局延遲香港中學文憑試』聯署，截至本月3日，共收集26,952個簽名….」
 
DSE期間感覺好煎熬，考生驚感染Covid，同時又要專注温書。
 
「特區政府表示，截至3月17日，累計確診個案已達157宗，其中4人不幸離世，另有88人康復出院。」
 
聽Alice講，佢堂姨中左Covid，不幸離世。
 
Covid期間，白事比起紅事多。
 




「原定於2020 年3月27日開考嘅香港中學文憑試（DSE），受到新冠肺炎疫情影響，已正式作出調整。本港教育局及考評局於 3 月 21 日 宣佈：考試將延後 四星期，即改為4月24日 開始…..」
 
Dse淨係延遲左一個月，最後都順利開考。
 
䀆我所能，每科都努力作答，當中做中史卷既時間，我耳邊總係聽到查利揚既教誨。
 
「隨住疫情短暫受控，5月香港社會運動再度爆發。多區商場響起抗議口號，新城市廣場爆發警民衝突，防暴警察進入商場驅散市民，場面混亂。」
 
「6月迎來「反送中運動」一周年。多區市民自發抗議，6月12日更出現零星衝突，多名民主派人士被捕。」
 




「5月底通過的《港區國安法》加速推進，並於6月30日正式生效。」
 
「7月1日，國安法實施後首次回歸紀念日遊行，警方拘捕逾370人，其中至少10人涉違國安法…..」
 
「2020年中學文憑試於7月22日放榜。由於本港新型冠狀病毒肺炎疫情惡化，行政長官林鄭月娥公布一系列防疫措施，包括要求所有學校於放榜日採取採取特別措施，在網上發放成績，避免學生回校聚集。」
 
今日，我唔洗返學校，等緊放榜既Msg。
 
「叮咚！」
 




我戰戰兢兢打開信息。
 
英文有3﹗可以入U！
 
中文5
英文3
數學4
通識5
中史5*
地理4
 
中史：5*
 
點解唔係5**？
 




做卷個陣，明明好多題目都識答。
 
如果拎唔到5**，查利揚會點諗我？會唔會覺得教左我咁耐係晒時間？
 
最重要係佢睇好我拎5**，佢知道咪會好失望？
 
電話鈴聲突然而至，尖銳得像劃破空氣，把我思緒一下子拉返現實。
 
來電人係Katy。
 
「喂～Hailey！你考成點呀！」
 
「我英文有3，可以入到U！」
 
「我Sd左我個成績比你睇！DSE出嚟既成績比起學校Mock仲更加好！我估唔到中史同Chem拎5**！」




 
Katy 中史拎5**？我記得Mock pre 佢拎5。
 
我即刻打開Wts，見到Katy既成績。
中文5
英文5*
數學5*
通識5
中史5**
化學5**
生物5*
 
「哇，Katy，你全部都有5以上。」同時我都將自己成績Sd比佢。
 
「Hailey你都比起Mock個陣考得好！」




 
「只係我諗要唔要返學校搞覆核。」
 
「覆核？邊科？」
 
「我想覆核中史，畢竟我想讀中史，可能覆核可以拎到5**，大啲機會入教大中史，呢科好多人爭。」
 
「咁你返學要睇時間，我睇通告覆核唔同班都有時段。」
「好呀！Katy，你想揀咩科？」
 
「我諗下先，睇下有咩神科揀！我唔阻你啦！」Katy就好快收線。
 
Katy 中史有5**，而我先得5*。
 
一直以嚟Katy成績都比我好，唯一我勁過佢既科，就係中史。




 
我冇諗過，Katy會拎左5**，成為查利揚第一個拎5**既學生。
 
只係第一個拎5**既學生，並唔係我。
 
我仲同查利揚講，話一定要拎到5**比佢睇，證明我同佢一樣，都可以拎到5**，同埋佢可以記住我呢個學生。
 
我一定要覆核，或者可以拎到5**。一諗到查Sir見到我覆核成功，只要見到佢開心，我就開心。
 
順便返到學校，同佢講我英文拎左3，全靠佢之前比我既Notes。
.
10點正，我返到學校，打算揾Miss Tsang搞覆核事宜。
 
「查Sir你一嚟到九官，就出左兩個拎5*同5**以上既學生！特別係Hailey，我冇諗過佢中史竟然攞5*！我呢個班主任都沾左啲光！」
 
當我踏上樓梯，走到轉角位時，忽然聽到查利揚同 Miss Tsang 嘅對話。當中竟然傳出我個名，我不禁停下腳步，屏住呼吸，想聽清楚佢哋到底講咩。
 
「Hailey本身就係有天分既學生，佢缺乏係信心，只要你比多啲鼓勵佢，佢就會做得好。至於Katy，佢係舉一反三既學生，我本身就睇好佢地兩個係中史可以拎到好成績。」
 
查利揚都幾了解我同Katy。
 
「Katy係我地老師不嬲都睇好既學生，如果冇James，Katy就會係今屆考得最好既學生。不過查Sir你都好了解Hailey！我做班主任，都冇你知得咁多！」
 
「我本身都識Hailey，佢係我中學好朋友個細妹，理論上都應該多啲照顧下佢，我當佢係我親妹妹咁睇。」
 
中學好朋友個細妹？親妹妹？
 
由幫我隠瞞手機，統測考衰，搭錯線，我凍個陣比暖包比我….
 
全部都係照顧我？因為當我親妹妹咁睇？
 
「怪唔知我見你咁照顧Hailey，之前我仲以為你地咩…真係唔好意思。查Sir，你今年學生成績咁好，校長應該會睇好你，如果未來你再教多幾多5**學生，科主任都有得你做！」
 
「誤會就算啦，都過左去，我同Hailey只係師生關係，校外最多咪係….熟人個妹。科主任邊有咁易做，Miss Tsang你唔洗咁抬舉我！」
 
我腦海中回想起呢一幕：
查利揚笑住點頭：「你咁樣keep住落去，5**都有機會拎到！你分分鐘做到我第一個拎5**既學生。」
 
「係咪真㗎？5**邊有咁易拎到？」我講。
 
查利揚認真望住我講：「我係認真，唔係講笑。你有天份，只係差自信。比啲心機啦！我睇好你同Katy，你地一定可以拎5以上。」
 
我係佢手上其中一粒棋子，對佢有利用價值，佢所謂既鼓勵，只係為左升遷。
 
一直以嚟，我只係一個學生，熟人個妹，係佢心中不值一席之位既人。
 
原來我一直以為自己「特別」，其實咩都冇。
 
「熟人個妹。」
呢四隻字好似刀咁割入我心口。
 
我努力溫書、逐頁逐頁抄 Notes、甚至抱住「一定要攞 5**，證明自己」嘅執念……最後都係一場笑話。
 
原來一切只係因為佢識我家姐。如果佢唔識我家姐，我諗佢直情唔會留意我。
 
原來我從來冇走入過佢心入面一步。
 
眼淚熱辣辣衝上嚟，我咬住嘴唇，強忍住唔好喊出聲。
但越忍，越覺得窒息。
 
原來我所有既幻想，所有既勇氣，所有既心動——都係自作多情。
 
我冇必要再覆核中史，因為即使真係由 5* 變 5**，佢眼中既我，都唔會因此變得特別，佢亦都唔會記得我。
 
我只係一個學生，一個「熟人個妹」。
 
我轉身快步離開，腳步聲喺樓梯間迴盪，好似要將我壓碎。
 
盧正希，你真係好傻！
 
強忍住嘅眼淚，最終都喺走廊上撲簌落下。
 
我剛好碰到James。
 
「你無野呀嘛？考得唔好可以讀Asso同Hd，都係用返2年就升U！」James細聲咁講。
 
「我冇野呀！」我急步行。
 
「喂！我都係呢間學校既榜眼，如果你想retake，最多私人幫你補習，唔收你錢！」
 
我冇應James，就跑走左。
.
我望左WhatsApp既對話框一段時間，我地對話停係「👍」。
 
朝早我以為會收到Message，點知到夜晚，我一個Message都未收到。
 
我播住海浪聲，想嘗試入睡，卻回想起嗰一幕。
 
我輕輕碰觸我既嘴唇，雖然個陣冇直接掂到，但我個陣呆左。
 
我既理性同我講，唔可以鍾意佢。
 
我唔想Hailey因為我，而受到傷害。