搭錯線：錯誤的時間遇上你: 第六十六章：查利揚視角（1）——理解

「呼——嘩啦——啪——沙沙——」Youtube播放既海浪聲，係我耳邊迴旋中，手機時間顯示為12點半。
 
我閉上眼睛，慢慢回想起同Hailey第一次相遇，係兩年前黃大仙廟新年求籤。
 
第一次見到佢，我係被佢對眼吸引住——藍色瞳孔，以及留烏黑長髮，相似而陌生既臉孔令我忍唔住望多佢兩眼。
 
Hailey係好率直既小妹妹——喜怒哀樂都會寫晒係臉上既人。
 
然而，我就係佢既相反——習慣隱藏情緒，用微笑掩飾一切。
 




我覺得第一次同Hailey見面，都尚算愉快。
 
後來調校，我冇諗過會再同Hailey見面，畢竟全香港咁多官立中學，甚至我負責教佢高中中史。
 
當校長介紹我既時候，我意外見到熟悉既臉孔，Hailey係眼睜睜咁望住我，睇嚟佢應該好驚訝，我既習慣係保持微笑。
 
鑑於我想「公還公，私還私」，同時我見到Hailey入嚟揀位個陣停低左，覺得唔自在，於是當我知道佢係科長時，就叫佢『科長』，點知Hailey反而好在意，覺得我無視左佢。
 
個陣交換電話號碼，佢sd左個「屌你」sticker比我，令我哭笑不得，只好提醒Hailey唔好再sd呢啲sticker比其他老師，以免遭受懲罰，到時我都幫唔到佢。
 




Hazel曾經同我講過，細妹粗心大意，叫我係學校多啲留意同照顧佢細妹，身為朋友當然會應承，反正都係舉手之勞既事情。
 
如果話真正接觸去了解Hailey，一定係中五上學期統測，因為係Hailey第一次搵我，問我點解會考衰，個陣佢係凌晨問我，點解咁答佢會冇分，Hailey一問再問，刨根問底。
 
我之前係中史科成績記錄睇到，Hailey一直以嚟係中史全級第一，雖然佢今次統測失準的確令我有啲意外，但以佢好學同刨根問底既精神，我總算明白點解佢一直都係第一。
 
我相信只要鼓勵學生，提升自信心，一定可以推動佢地進步。
 
自此之後，Hailey總係好夜搵我，而我都會秒回，反正攤係張床都無所事事。
 




Hailey果然冇令我失望，自從統測之後，佢就好認真聽書，亦都會wts問我功課，儘管凌晨搵我，當然我樂意答佢，之後考試完左，我都好期待改卷，結果不出我所料，佢進步左好多，起碼答野係扣題，同埋推論飽滿，係高階學生水準。
 
諗起以往夜晚同Hailey傾偈既時候，夜晚既時間總係過得特別快。
 
我拎起手機睇下時間，依家2點半，個腦仲係好精神。
 
冇左Hailey搵我，夜晚時間長到令我唔習慣，呢排又開始食返安眠藥瞓覺。
 
只不過上次搵Dr. Lee，佢叫我試下聽住白噪音瞓覺，唔好依賴咁多安眠藥，畢竟我既問題，唔係安眠藥可以解決到既問題，況且，瞓覺都唔代表發到好夢。
 
我只好放下手上既安眠藥，拎起旁邊寫住2018年既日記簿，並往前掀開數十頁。
 
2018年12月14日晴
 
我午息落去買飯，咁啱見到Hailey一個人食飯，就去搵佢講下野。




 
點知傾傾下，突然我見到Hailey眉頭深鎖，手緊握住裙袋，驚慌望向身後。
 
我聽到訓導主任余sir同班學生既笑聲。
 
「滋滋滋——」我聽到震機聲。
 
個傻妹冇熄機入學校，一陣比訓導捉到就麻煩，到時hazel實話我冇照顧好佢個妹。
 
我靠近Hailey，細聲講左句：「你比你部手機比我。」
 
佢呆左一秒，緩緩比左手機比我。
 
我幫佢接咗電話，扮係係選科講座要搵helper，我不慌不忙對住震動既手機講左一段說話。
 




我講完之後，就比返部手機比Hailey，順便cut埋來電既katy。
 
就算katy同hailey望落乖，我諗99%學生入到學校都會開手機，即係違反校規，只係冇比人捉到。
 
望住Hailey，我就諗如果細妹仲係到，佢同Hailey差唔多大，發生呢啲事，我諗佢會好徬徨無助。加上佢係熟人個妹，呢件小事就幫佢。
.
2018年12月28日陰
今朝第一堂係中史堂，我如常上課。
 
當我教緊書個陣，我又見到Cammy同Joyce係櫃桶底用手機。
 
老師企係講台教書，其實學生做緊啲咩我係一清二楚。
 
Hailey同katy通常好認真聽書，而後面既人有啲做自己功課，有啲瞓緊覺。
 




平時我會隻眼開隻眼閉，但佢哋考得差又上堂玩手機，繼續落去唔單只害咗自己，仲會影響我既教學評價，特別係有學生考唔好，係會被校長問話。
 
於是我叫cammy同joyce交手機，午息再嚟搵我。
 
當我完堂返去教員室，發現漏低左保溫杯，於是上返去班房拎。
 
我就行入班房既時候，聽到Cammy 同joyce 話我，主要教書悶，比唔上舊老師。
 
老師都聽慣是非，反正又唔係第一次聽。
 
只係呢個咁尷尬既時候，我無謂入班房，當我想轉身離開，呢個時候，我聽到Hailey
既反駁。
 
原來，有人企你個邊，幫你講說話，係會幾感動。
 




「…..仲有老師都係人，有邊個人會鍾意比人講壞話？你同我都唔會想自己成為是非對象啦！」Hailey同Katy抱怨講。
 
老師都係人，聽到閒話是非，其實點都會有啲唔開心，只係聽得太多，麻木已成習慣。
 
突然心中有一股暖意湧上嚟，係一種被理解既感覺。
 
「哥哥，粒糖比你食呀！唔好唔開心啦，媽咪只係要求高，只要我彈琴唔彈咁好，媽咪就唔會話哥哥啦！」個一刻既我，耳邊聽到細妹既聲音。
 
係咪因為太耐無人理解我，所以我都唔敢再期待有人會明白？
 
趁佢地未行，我都係先行一步，我既存在會令人尷尬同有壓力。
 
我急忙離開，卻遇上教員室門外既Hailey。
 
我原本想問Hailey嚟呢度咩事，有冇野需要我幫手，佢迴避我既眼神。
 
到底發生咩事？我做左啲野令佢唔自在？
 
Miss Tsang比左啲功課同保暖杯比我，同我講Hailey搵過我，但唔見我，只好Miss Tsang代為轉交。
 
 
功課同保暖杯咁多野，佢點一個人跑住拎晒落嚟？
 
*********
IG Reel 有呢一話其中一句對白：https://www.instagram.com/in.the.fantasy/
Thread 係放埋behind the scene：https://www.threads.com/@in.the.fantasy?hl=zh-tw