搭錯線：錯誤的時間遇上你: 第六十七章：查利揚視角（2）——搭啱線

日記入面，跌左張聖誕卡出嚟，係Hailey form 5 Christmas Party送比我。
 
我掀開聖誕卡，上面係密密麻麻既字。
 
查Sir:
Merry Christmas! 好多謝你一直以嚟既教導！如果唔係統測考衰，我都唔知原來死記硬背温書係無用，我之前上堂做成日唔聽書，做自己野，你都仲肯教我，講緊凌晨都肯覆我。而且你好有耐性引導我去諗野，從而知會當中既推論點寫，所以我今次考試咁高分，都係全靠你！仲有上次手機事件，都係多得你幫我，我先避開唔洗比訓導罰。所以你有咩事都可以幫我幫手，嚟緊既統測同考試我都會比心機，唔會令你失望。
Ps 初初識你的確覺得你好長氣，雖然依家都係，但係已經習慣查sir就係咁長氣既人。
Hailey
 
重睇封信，我先發現，原來Hailey已經係我心中，佔左一席位置。




 
當時Christmas Party搭錯線，我係咪真係為左贏個一分？
.
Christmas party個陣，我估唔到，我既搭錯線拍擋，竟然係Hailey，好彩係熟既學生，我即刻放下心頭大石。
 
Hailey今日著左針織連身裙，感覺睇落成熟左。
 
可能平時見開佢著校服，突然有啲睇唔慣。
 
司儀開始講規則，佢講完我就戴上耳機，入面啲歌好嘈，基本上我地都唔會聽到對方既聲音。




 
由我開始提問，睇下問題紙上既題目之後，我決定順次序提問題目。
 
「見到小強會點做？」
 
「手術失敗，醫生會講？」
 
「被人綁架你會嗌？」
 
「有人同你表白，你會應？」




 
「清代求見皇帝，大臣會？」
 
「比阿媽發現0分測驗卷，你會？」
 
「當外國人同你say hi，你會？」
 
然後我見到司儀舉手，示意角色調轉。
 
Hailey每問完一題，我就隨意讀出紙出既答案。
 
「我錯啦！」
 
「I’m fine thank you and you?」
 




「下跪」
 
當我揀完答案，再望向Hailey，見到佢對眼停左係題目紙幾秒，然後微微低頭，再讀出題目。
 
點解Hailey會咁既反應，到底係咩題目呢？
 
唔通佢都係順住題目讀？
 
如果我冇記錯，第四條題目係：「有人同你表白，你會應？」
 
印象中我頭先仲未講呢題答案，於是我毫不猶豫咁答：
 
「今日係我地拍拖第一日」
 
我終於可以答啱題，唔知有冇機會贏到呢個比賽？




 
我睇埋剩低答案，發現餘下題目對唔上正確答案，唯有求其答埋剩低答案。
 
司儀舉手，我同Hailey都除低耳機，睇答案揭曉。
 
原來第一題「見到小強會點做？」，Hailey答左「今日係我地拍拖第一日」。
 
見到答案之後，我既嘴角微微一動，怪唔知個陣見到全場學生係到笑。
 
我唯有數3秒，令自己冷靜落嚟。
 
我望Hailey一眼，只見佢既臉紅到好似蘋果。
 
隔左一陣，司儀公開埋我既答案。
 




我感覺到有炙熱既目光望向我，我對視過去，見到Hailey雙眼略微增大，呆晌望住我。
 
我本能反應報以微笑，然後望返落熒幕。
 
有人同你表白，你會應？
答案：今日係我地拍拖第一日
 
因為第四題搭啱線，Hailey頭先眼神除左表面驚訝，中間流露一絲我睇唔透既複雜情緒。
 
Hailey係對於我搭啱線覺得驚訝，定係有其他....
 
清醒啲，查利揚，唔好亂諗。
 
聽到女司儀話叫第2組出嚟，我就同Hailey返左入後台。
 




「頭先我估唔到搭錯線對手會係你。」
 
因為學生會事前冇同我講學生身份，對於係認識既學生，係有啲驚訝。
 
「我都係臨時比人捉過嚟，我都唔知原來對手係你。」 Hailey微笑回答。
 
Hailey對眼並唔係笑眼，平時佢笑的話，對眼係彎月形，呢個係刻意既笑容。
 
唔通，佢事先知道對手係我？
 
「雖然我地事前都唔知對方身份，但上台都玩得好開心。今日Christmas party，同朋友玩得開心啲！」
 
我準備轉身離開，但Hailey上前擋住我既腳步。
 
Hailey抬頭直盯我對眼，似乎有重要事情要講。
 
「查sir，今日搭錯線真係玩得好開心。頭先聽左咁耐嘈歌，對耳都有啲攰，你點解都可以答啱一題？」Hailey微笑既同時，雙手緊握拳頭。
 
「因為我咁啱就係搭啱線，我都覺得好神奇。」我輕輕一笑咁講。
 
「哇，聽完你咁講，我都覺得好神奇。」 Hailey 講完，勉強笑一笑。
 
「下次有機會再玩，咁我行先。」我揮手同Hailey 講再見。
 
Hailey係我中學朋友個妹，我只係當佢係細妹咁照顧。
 
返到教員室，我即刻改手上既功課，只要專注工作，自然唔會再諗其他野。完兩班功課，我就上去搵3C同3D。
 
「Hailey師姐，你今日著呢套衫好好睇」
 
Hailey？
 
我抬頭一望，係Hailey同緊Felix講野。
 
「多謝你呀，仲有唔洗叫我師姐咁生外啦，叫我Hailey咪得囉！」Hailey笑到彎月眼都出嚟。
 
Hailey比男仔讚下就開心。
 
咁容易開心，絕對唔係一件好事，好容易比人呃。
 
「Hailey，今日我地都見到，不如我地一齊影相！」felix提議。
 
影相？
 
「好呀。Katy，幫我同felix影相，影2張。」
 
我見到katy同一個好高既男仔，傾得好開心，聽唔到hailey講野。
 
我向前邁向幾步，講:「咁不如我幫你地影？」
 
Hailey轉身望向我，好快就比左相機比我。
 
從鏡頭可見，Hailey同felix都笑得好開心，特別係felix，笑到對眼都唔見埋。
 
「咁你地準備，321！」
 
「咔咯！咔咯！」」我兩張相都隨意按下快門制。
 
影完兩張相，我比返部相機比Hailey。
 
「查sir，我地不如都影返2張相？」Hailey主動問我。
 
我點點頭，然後將相機交比felix。
 
當Hailey行左過嚟，我下意識行過少少，保持距離，以免被人誤會。
 
揀完相之後，我就叫felix幫我拎簿，有時我做留堂班老師，總會見到佢坐係角落瞓覺，肯定唔係乖學生。
 
況且，見到佢同Hailey一齊，唔知點解心入面總係有一種講唔出既鬱悶。
 
原本Hailey仲想幫我拎簿，我拒絕左佢，因為Hailey平時做科長，已經幫左我好多。
 
對我嚟講，Hailey只係盡責既科長，同勤力讀書既學生。