搭錯線：錯誤的時間遇上你: 第七十二章：查利揚視角（7）—— 守護
原本我以為，只要做好本分就唔會為人詬病，但我實在低估學校傳謠言既速度。
之前Hailey, Katy 仲有我一齊搞選科講座，只係有部分既老師講我同Hailey非比㝷常。
只係有心人難防，Hailey成日嚟教員室問我功課，再之前我同Hailey一齊放學，呢啲事會一併傳開去。
後來我一返到學校，就被校長叫去問話。
「查sir，聽講你最近同一個女學生行得好埋。」校長講。
「佢純粹係之前幫我搞選科講座，我地搞耐左，太夜先一齊走，同埋佢係好勤力既學生，我有信心佢可以係中史科攞5以上既成績。」
「呢個情況如果比家長同同學見到，會引起好大誤會，男老師盡量同女學生保持距離，最好係人多既地方見面。」
「明白。」
「查sir，雖然你嚟左好短既時間，但你既工作表現唔錯，繼續努力。」
「多謝。我只係做好我既分內事。」
校長點點頭，然後我就離開校長室。
我明白校長講得無錯，但當我諗起Hailey嗰雙期待既眼神，就覺得呢種距離係一種殘酷。
「叮噹叮噹叮噹叮噹….」上課鐘響起。
陣間見到Hailey，我係要咩表情？
冷漠───無視佢？
憤怒───鬧佢？
行入班房既時候，Hailey 突然遞左張卡比我。
封面係一幅色彩溫柔嘅手繪插畫——畫中人正係我，戴住眼鏡，手裡捧住一個大蛋糕。蛋糕上面鋪滿奶油同士多啤梨，最頂一支蠟燭燃點著，火苗被她特意畫得閃爍，好似會隨風搖曳。
「好呀，你地真係有心，Hailey你畫得好靚喎！」我驚嘆望住Hailey講。
「查sir生日快樂呀！你快啲睇下我地寫左啲咩啦！」Kelvin好興奮咁講。
我打開張卡，入面係滿滿既祝福說話。
「Happy birthday！」
「我地中史班阿Sir最靚仔！」
…..
最後熟悉既秀麗字跡吸引我注意。
「查Sir，生日快樂！希望你幸福度過每一日！」睇完我不禁微微一笑。
短短一句，卻好似比任何華麗祝福更打動我。
原來今日係9月30號。
我都醒唔起自己既生日，生日對於我嚟講，都係要返工，同平日分別唔大。
到底幾時開始，我連自己生日都唔記得？
.
「媽咪！爹地！今日阿哥生日呀！有冇買蛋糕呀？」細妹手舞足蹈講。
「我地點會唔記得阿揚生日？況且詩韻你前幾日先提我買蛋糕。」爸爸拎住我最鍾意食既雜果蛋糕講。
「計我話呢個女就係為食！查詩韻，你食幾啖好啦，肥左著唔落演奏服，到時上台就唔好睇。」阿媽皺眉講。
「老婆，今日阿揚生日，咪比詩韻放鬆一日。」爸爸拉拉媽咪手臂講。
「冇你地咁好氣….」阿媽無奈咁講。
爸爸將蛋糕放係我面前，而細妹負責係上面插蠟燭，總共15支。
「Happy birthday
to you~ Happy birthday to you. Happy birthday to Charlie~ Happy birthday to
you~」
爸爸、媽媽、細妹都幫我慶祝緊生日，臉上掛住幸福既笑容。
距離依家係10年前既事….
「查sir生日快樂！」成班中史班同學喊道。
「真係好多謝你地！」我感激對住成班同學講，特別係準備呢個驚喜既Hailey。
Hailey咁有心，我點可以無視同鬧佢……
小息既時候，Hailey拎住Gucci盒比我，同我講生日快樂。
望住Gucci盒，我唔只見到Hailey既心意，仲見返十年前自己已經消失咗既生日。
16歲，空蕩既屋企，枱上係Gucci禮物盒，打開係領帶。
17歲，係Dior 銀包。
18歲，Rolex手錶。
禮物一件比一件名貴，但我根本唔需要。
我只係想返去十年前——一家人圍住餐枱，細妹插好蠟燭，唱歌、拍手、笑聲此起彼落。
18歲之後生日，淨係剩低包裝精美既盒子同空洞既祝賀。好多時候朋友忙住做野，未必即時祝賀我，而父母淨係速遞禮物比我，代替「生日快樂」4個字。
我已經好耐冇食過雜果蛋糕。
「呼！」細妹吹熄晒我既蠟燭，臉上掛住得意既笑容。
就算依家有蛋糕同蠟燭，冇人再搶我啲蠟燭嚟吹。
只要一望到呢啲名牌，就好似再次提醒我：嗰份單純嘅快樂已經一去不返。
再加上謠言纏繞，令我腦海更加混亂。
「盧正希，頭先上中史堂，我都想問你，你到底點知我生日。」我用一副冷漠既臉孔，拋出心中疑問。
「我都係聽人講…學校啲同學講⋯」Hailey 楚楚可憐咁講，彷彿一隻受傷既兔仔。
「生日呢啲咁私人既野我唔知你點樣知道，仲有你呢份禮物我唔會收，你自己收返。」我轉身就想返入教員室。
我怕，如果再望Hailey，我會心軟。
「點解？」Hailey 問。
我深呼吸，努力整理表情，轉過身講：「首先，老師係絕對唔會收學生咁貴重既禮物，其次官校教師身為公務員，不得收超過學生同家長價值500蚊或以上既禮物，否則有受賄既嫌疑。我諗你唔太清楚我地之間既關係，我係老師，你係學生。」
如果我唔劃清界線，我地就會比人誤會。
「但係份禮物你都收左佢…」Hailey勉強牽起笑容，想比份禮物比我。
我見到gucci盒，就諗起父母冇再幫我慶祝生日，繼而用禮物慶祝既日子….
「我唔會再重覆我所講既野。你退左佢，拎啲錢買野食仲好啦！」我講完就走左。
老師返工都有賺錢，一個學生可以有幾多錢？
明知你係唔食野去買禮物，我更加唔可以收。
比起名貴既領帶，我更加鍾意你畫既心意卡。
最重要係，收左呢份禮物，代表我地既關係就會被旁人認為唔正常。
生日，本來係受到祝福既一日，但我推開祝福….其實我唔值得擁有幸福，甚至我覺得呢啲係我應有既懲罰，要為細妹贖罪。
鬧你，係我唯一可以守護你既方式。
我希望你可以得到幸福，鍾意我只會令你人生不幸。
只係我唔知，呢件事會成為你心中第一根刺。