搭錯線：錯誤的時間遇上你: 第七十四章：查利揚視角（9）—— 後悔

旁邊既鐘顯示時間係4點19分。
 
「咳、咳…」
 
咳嗽聲震得腦袋一片轟鳴，額頭熱得發燙，眼皮沉重得好似壓住鉛。
 
感冒令我頭昏腦脹，連思緒都像被棉花塞住一樣。
 
我打開櫃桶，拎左盒pandol，食完最後一粒pandol。
 




意識模糊之下，我進入夢鄉…..
.
我係中史班房，搞緊行政野，個陣既我仲戴緊口罩。
 
跟住我見到熟悉既身影——Hailey，正在打開班房門。
 
唔通我返左去嗰一日？
 
個陣既我睇住Hailey做做下中史練習，體力不支，然後我即刻扶住佢。
 




眨眼到左Hailey屋企樓下，我見到正在熟睡既Hailey，就係隔離望左佢好耐好耐。
 
口罩下只剩下雙眼，閉眼下只見濃密既眼睫毛，耳朵旁邊正流汗。
 
我輕輕將手覆蓋到佢額頭上，感覺Hailey發緊燒。
 
明明自己都唔舒服，點解仲要返嚟補課？
 
睇嚟傻妹真係想拎5**比我睇。
 




我緩緩掃過臉頰既髮絲，並將冰涼水樽放係Hailey額頭上。
 
Hailey突然睜開雙眼，随即更做出意想不到既舉動。
 
雖然隔住口罩，但我感覺彼此間既鼻息。
 
當時既我諗，我係咪應該好好享受呢一瞬間？
 
下一秒Hazel說話係我耳邊迴繞：「其他人我唔夠膽講，但係你係查利揚，個妹比你睇住我就100%放心！」
 
「聽講查sir私下同女學生出街！」
「哇！佢唔想做老師？」
數個老師背後議論紛紛。
 
婚宴個陣，我照顧Hailey既時候，Charlotte 用奇怪既眼神望住我….感覺我好似唔應該咁做….




 
大學既我同緊有好感既女生wts傾緊偈。
「你憑乜野咁開心？」媽媽見到我講。
 
當時既我馬上推開Hailey，低頭默默講：「Hailey……唔可以咁。」
 
我係旁邊見住自己咁做，於是大叫嗌：「查利揚，點解你咁忍心推開佢？」
 
「因為，我唔想…你既努力化為泡影，唔想你失望，唔想你為左我…而犧牲自己。」Hailey複述當日婚宴既說話。
 
我見到自己個表情帶點驚訝，畢竟我都冇諗過，Hailey竟然記得飲醉酒個一日我所講既說話。
 
「明明…你就緊張我，唔係咩？」
 
「我一直以嚟既感覺，唔係錯覺！」




 
Hailey發現真相，霎時之間我完全比唔切反應，呆晌數秒，完全諗唔到藉口為自己行為辯解。
 
車上既我沉默一會，只好講：「Hailey，你依家仲細，遇既人都唔多，我知呢個年紀好容易就會鍾意一個人，只不過…呢個人唔應該係我。」
 
「查利揚，我會拎 5**返嚟比你睇，證明我呢份感情係認真，唔係玩玩下！」Hailey大喊。
 
我鍾意你個人，就算你攞唔攞到5**，其實我根本唔介意。
 
「你依家病左，頭腦未必好清醒，啱啱件事我都當冇發生過，我亦都唔會同Hazel 講。」另一個我講完呢句，就打開副駕駛車門，示意Hailey離開。
 
Hailey不情願咁落車，並用堅定既眼神盯住我。
 
當時既我急住避開Hailey，急住揸車走。
 




我上前截住自己，過去既我停車。
 
「查利揚，你依家走左，就後悔一世！」我大喊。
 
佢只係無奈講：「你知好多因素注定我同Hailey冇可能，如果我地一齊，受傷最重既人一定Hailey！」
 
「好過你依家揸車直接走人！呢度又唔係學校，你地都唔係老師同學生啦！」
 
「Hazel, Charlotte, 同事, 父母，仲有旁人目光，會點睇我同Hailey？」車上既我冷笑講。
 
「就係你成日顧晒所有人諗法，所以隔左8年，每一晚你都後悔！Hailey依家都有男朋友！」
 
車上既我講：「咁你想我點？衝去過錫佢，攬佢？」
 
「我只係想你正視自己感情，唔好成日搵藉口！」




 
「你講乜野？」車上既我準備揸車衝向我。
 
「查利揚你正懦夫！」我係佢前面大嗌。
 
電光火石間，Hailey拉走左我。
 
「Hailey！」我驚訝咁講。
 
「查利揚，如果我地當時試下一齊，會唔會彼此間都冇遺憾？」Hailey 苦笑講。
 
「呢8年，我一直都好掛住你。」我盯住佢講。
 
「你明明就知我一直鍾意你，點解一直都避開我，到依家先講？」Hailey 一臉受傷講。
 
「我遲左8年，依家同你講返我一直以嚟既心意。」我拉住Hailey雙手講。
 
「咁點解你鍾意我，又要成日鬧我？因為我生得似你細妹？到底你係鍾意我，定係當左我係詩韻？」Hailey 鬆開我對手講。
 
「起初因為你似詩韻，所以先會留意你。後來同你相處之後，你既真誠、相信，其他人都比唔到既野，你比到我。Hailey，我愛你。」講完呢句，我向前行一步，輕輕吻上Hailey。
 
下一秒佢推開我講：「我地冇可能，之前我因為你拒絕felix，況且我已經有男朋友。我都向前進，你都唔好在停留係過去。」
 
講完之後，Hailey 就係我面前慢慢消散，好似細沙從指縫間一點一點漏走，捉極都捉唔住。
 
「Hailey！」
「你唔好走！」
「點解我成日淨係識推開你？」
「又剩返我一個….」
我跪坐係地上痛哭。
 
我睜大雙眼，發現自己瞓係床上，枕邊已經被淚水沾濕大一半。
 
原來頭先只係一場夢….
 
「嘟…嘟」我拎起手機一望，見到Miss Kwan sd左msg比我。
 
「校長請左新老師，聽講係舊生，仲要係校長重聘過嚟，佢會教中文同中史。」
 
「Oic。」
 
「你唔想知點解校長重聘佢過嚟咩？」
 
Miss Kwan出名是非當人情，我決定已讀不回佢。
 
只係呢位兼教中文同中史既老師，原來就係Hailey……