搭錯線：錯誤的時間遇上你: 番外篇：Felix視角（1）——心動

「死啦死啦！」我急忙著鞋，準備又跑去地鐵站。
 
「軒仔～你又唔食早餐？」嫲嫲講。
 
「嫲嫲，我返學校食！你記得定時食藥，我出門先啦！」
 
「軒仔！你….」嫲嫲未講完，我就飛快跑出門。
 
如果開學遲到，實比訓導主任煩好耐，因為我已經試過。
 




「請勿靠近車門。請不要靠近車門。Please stand back from the doors.」
 
總算趕到45分班車！我鬆下一口氣，戴上耳機。
 
「下一站，九龍灣。Next station is Kowloon Bay. 」我行出車廂，一直急步前行。
 
「唔好意思！」耳邊突然傳來一把女聲。
 
回頭一看，係一位黑長髮既女生，佢眼睛好特別，係藍色瞳孔，整體五官精緻。而佢身穿白色襯衫，胸口掛上紅色蝴蝶結，下身則係灰色百摺裙，裙尾有白邊。
 




佢臉上掛住淺笑，手上拎住黑色銀包，仲有幾張紙。
 
個銀包咪係我既？
 
「你跌左銀包，仲有呢幾張紙….你書包冇拉拉鏈。」
 
我望書包之後，立即拉返拉鏈。
 
「天天清早最歡喜 在這火車中在重逢妳
迎著妳那似花氣味 難定下夢醒日期……」




耳機正播住Beyond既早班火車。
 
女生將銀包同紙比送到我既手心，就急步離開。
 
我呆晌數秒，先發現未多謝佢。
 
「唔該你呀！」我大喊。
 
雖然女生已經行前左幾步，但我希望佢聽到呢句說話。
 
等等先，佢著左我地學校校服….佢都係我地間學校！
 
佢唔係我地個級，成熟既感覺似師姐！
 
「多渴望告訴妳知 心裡面我那意思 多渴望可得到妳那注視




又再等一個站看妳意思 三個站盼你會知
千個站妳卻是仍未曾知…..」
 
我檢查手上銀包，確保書簿費仲係到。
 
好彩冇跌錢，如果唔係都唔知點交書簿費。
 
呢啲錢都係嫲嫲辛辛苦苦賺返嚟比我….
 
而我打開手上既紙，發現係上個學年既歷史測驗卷。
 
「20分」
 
佢會唔會睇到分數？佢咪知我成績好差？
 




望住佢既背影，唔知聽日搭地鐵，會唔會再見到師姐呢？
 
翌日，後日，一個星期，一個月，我都再見唔到藍色瞳孔師姐。
 
「唉！」我僕係張枱上面。
 
「老友，咩事咁愁？」Kyle問我。
 
「你係學校有冇見過藍色瞳孔師姐？」
 
「藍色瞳孔？咪玩啦！香港人又點會有藍色瞳孔呀！」
 
「見過佢對眼既人，肯定都會過目不忘！我好肯定佢著住我地學校校服。」
 
「哦！brother!」kyle突然對住我奸笑。




 
「你知邊個藍色瞳孔？」我興奮問kyle。
 
「Brother！你有暗戀既人！」
 
「重點唔係呢個，重點係藍色瞳孔！」
 
「我咪話左唔知！最多同你行學校！」
 
趁午息時間最多時間可以行學校，都唔見藍色瞳孔師姐。
 
突然，眼前有個黑色長髮既人，係我身邊經過。
 
係佢啦！我急忙拍拍佢膊頭。
 




佢回頭一望…..