搭錯線：錯誤的時間遇上你: 番外篇：Felix視角（2）——搵到你！

佢回頭一望……瞳孔卻係普通不過既黑色。
 
「喂，Felix，你當我波咁拍，咁鬼大力！」Heidi皺晒眉。
 
「啊…唔好意思，認錯人，哈哈…」我急忙跑走。
 
關乎我既生命安全，我有咁快跑咁快。
 
「Felix，我同你同班，你咁都認錯？」Heidi 擋係我前面講。
 




今鋪仆街！點解佢跑得咁快！
 
「Heidi姐，小弟一時眼殘，睇錯睇錯，有罪莫怪！」
 
「你知就好！既然係咁…」Heidi 拍左我膞頭兩下，然後臉上掛住滿足既笑容離開。
 
我即刻㩒住膊頭，陣陣痛楚襲來。
 
「喂！Felix！你到底幾想揾藍色瞳孔先搞成咁？Heidi姐你都認錯？佢只係留長頭髮既男人婆！」Kyle講。
 




「咁佢地都係黑色頭髮呀嘛！Kyle你又話幫我！揾唔揾到人呀！」
 
「即係咁，你唔揾佢，佢個人自然會出現，所以呢，我地做人要隨其自然。」
 
「屌！你收皮啦！」
.
「李軒宇，你交左功課未？」Miss Wong擋住我既前路。
 
「Felix，籃球隊仲差你。」Kyle講。
 




「李軒宇，我真係要同你講下行為違規既問題。你一個月遲到成4次，成績又啱啱好先升到班…」訓導主任只要一講野，就冇停既一日。
 
由於我太受歡迎，午息太多人預約我既關係，就算我用餘下既時間，都揾唔到師姐。
 
「Felix，試都考埋，應該要開心啲先啱！」Kyle嚟我個位講。
 
「唔通一切只係幻覺？」
 
「打返場波，人都會開心啲啦！」Paul已經拉我起身。
 
「或者打波可以見返佢呢！」Sam講。
 
係喎！通常我地一打波，就好多女仔睇！
 
「只不過之前打波都唔見佢喎！」




 
「你唔去又點知呀！次次睇波都有唔同人嚟睇！」Sam
講。
 
「好啦…」
 
「總算夠人打波！felix係到，起碼我地未必會輸！」Paul 興奮講。
 
我就知呢班朋友，只係想湊夠人數！
 
落到球場照舊打球。
 
「或者打波可以見返佢呢！」
 
Sam講完呢句之後，我就不斷望下觀眾席。




 
有個黑長髮既女仔逼緊入去，佢係藍色瞳孔。
 
藍色瞳孔？？？？？
 
我努力打住籃球，同時不斷望向師姐個邊。
 
只見佢拎住筆記温書，似乎對睇籃球冇咩興趣。
 
突然我見到Sam望向我奸笑，佢特登將波傳偏左，正向住師姐個方向。
 
條友真係痴線！
 
電光石火間，我將波接住左。
 




我回頭一望，只見師姐一臉驚訝望住我。
 
「師姐你冇事呀嘛？洗唔洗去醫療室？」我緊張問。
 
「唔洗啦，真係唔該晒你。」師姐有禮貌回道。
 
「Felix英雄救美，鳴鳴鳴…」Sam即刻帶領全場人起哄。
 
「喂，你地咪嘈。夠鐘換衫，午息就嚟完。」我尷尬抓抓頭講。
 
「好囉，我地換衫先，你地慢慢傾！」kyle對住我奸笑講。
 
「Kyle你條友仔！」我忍唔住大喊。
 
我心臟怦怦咁跳，見到師姐真人，我竟然一句說話都講唔出。




 
我按住胸口，鼓起勇氣問師姐：「Errr… 話曬啱啱我都幫左你，em…你可唔可以同我講你叫咩名？」
 
師姐愣一愣，然後微笑講：「我叫Hailey。你係咪叫Felix ?」
 
佢竟然知我叫咩名！！！！！！
 
唔通佢一直都記得我？
 
心中雖然好興奮，但我唔可以表露出嚟，我驚嚇親Hailey。
 
「咦，你知我叫咩名，今日識到你我好開心，你下次會唔會睇我地打波，我地逢午息就係呢到練波。」
 
「啱啱你啲朋友叫你Felix，所以我先知。今日我都係陪朋友嚟，佢嚟我就應該係到。」Hailey講完，望向後面。
 
佢朋友同緊kyle講野。
 
咁又係，見佢睇波係到溫書就知，佢對睇波真係冇咩興趣…
 
「哦，係呀…」我講。
 
唔知幾時可以再見到Hailey呢？
 
「叮噹叮噹叮噹叮噹…」
 
「唔緊要，我地遲啲學校見到面就打招呼啦！」我努力展開笑容講。
 
「好呀，拜拜。」Hailey自然地揮揮手。
 
陽光透過髮絲折射光點，佢既眼神同笑意係呢一刻顯得格外耀眼。
 
「怦怦怦…」
 
心臟你要冷靜啲！！！！
 
「點呀，Felix，同藍色瞳孔進展順唔順利？」Kyle搭我膊頭講。
 
「佢叫Hailey，唔好再叫人藍色瞳孔。佢話陪朋友睇波，都唔知佢之後會唔會再嚟…」
 
「佢朋友好似對我有意思，或者我可以幫你地一把！」
 
「幾時都話kyle係我好兄弟！」
 
我同Kyle同時舉高手，做左Give me five既動作。