搭錯線：錯誤的時間遇上你: 番外篇：Felix視角（3）——點解又搞我？

後來我終於可以同Hailey傾偈，一齊出街，都要多謝我既好brother kyle。
 
愛情上算順利，但學業就…
 
「李軒宇，又瞓覺？你差我既英文功課仲未交！」
 
「李軒宇，今日留堂補測默書，係《爸爸的花兒落了》，你唔好留堂個陣先問我係咩課文。」
 
「李軒宇，呢份咪今日要交既中史功課？」
 




我抬頭一望，係中史堂，眼前既人係查sir。
 
我隔離放住左Paul既中史功課，另一邊係我個份功課，進行「copy & paste」 動作。
 
之前佢都係由得啲人做功課瞓覺，所以中史堂我一向拎嚟補做功課，或者「做功課」。
 
唔通新一年新作風？
 
佢留堂班捉我玩天下太平，最近上堂仲成日叫我答問題。
 




我成日覺得挑戰題第一個總係叫我答，唔難個啲佢都唔叫我答。
 
我圍觀四周，瞓覺既人繼續瞓覺，做功課（應該其他科）仲做緊，點解偏偏咁啱揾我嚟搞？
 
「阿sir，我今日放學會交份返功課比你。」我笑一笑講。
 
「科長，仲差邊個人未交，除左李軒宇之外。」查sir微笑問Paul。
 
呢個男人簡直係笑裡藏刀！微笑問緊咁恐怖既事！
 




Paul向我打眼色，眼神動盪既佢表示「仆街！」。
 
事關Paul份功課仲係我手上。
 
「Errrr…仲有幾位同學未交…不如我放學直接放落簿櫃，唔洗阿Sir拎落去咁麻煩啦！」Paul支支吾吾講。
 
「我依家收埋功課，未交功課既人有Felix，Heidi，Roy，你地幾個仲未交，落堂前做唔晒就聽日留堂。」查sir環顧全場，唔止望住我，仲掃過成個班。
 
我望向鐘，仲剩返唔夠5分鐘。
 
再望眼前既中史功課，仲有4至5頁未做。
 
事關我啱啱先「做完」數學功課，中史功課先係啱啱開始做。
 
加上查sir睇到我實一實，我好難拎Paul份功課出嚟抄，仲要諗埋點交Paul份功課比佢…




 
依家唔容許我諗咁多野，就試下憑我既智慧去做啦！
 
MC 亂撞！
 
後面問答題，見到好幾行。
 
中史，難我唔到既！
 
第一題：「孫中山提出『三民主義』，列出三民的意思。」
 
三民主義？
 
三文魚我就識！
 




第二題：「北洋政府由邊個控制？佢最大依靠係咩力量？」
 
我淨係識孫中山。
 
至於力量…應該係慈禧太后。
 
如是者，我亂寫啲答案，求其做晒5頁功課。
 
「叮噹叮噹叮噹叮噹….」
 
「Goodbye class. 」
 
「Goodbye and thank you Mr.Cha.」
 
當查sir拎住功課準備離開既時候，我從座位上衝出嚟。




 
我將paul份功課夾係我份功課入面。
 
「5分鐘內又真係交到功課，叻仔！」查sir微笑講。
 
「邊到係呢…哈哈哈…」我抓抓頭笑住應佢。
 
「Heidi同Roy你地聽日要去留堂班。」查sir留下呢句就走左。
 
「喂，Felix，你上堂抄功課做咩比佢發現，一日最衰都係你！」Roy睥住我講。
 
「Felix，你唔洗留堂，唔講Roy，你係咪應該做返啲野補償比我？」Heidi 不滿講。
 
「咁我要做啲咩？」我驚恐咁問。
 




「喂，你地兩個，Felix都差啲做唔切功課啦！你地揾查利揚求情咪算！」Sam 大喊。
 
「放心啦，呢樣野包Felix有得賺！」Heidi奸笑講。
 
「我唔覺喎…」我細聲嘀咕。
 
Heidi 強而有力既臂彎，搭係我肩膞上。
 
「我咩都冇講過，哈哈哈…」
 
「聽日因為你要留堂，咁後日放學你同我一齊走！」Heidi挑起眉頭講。
 
呢個時候我見到Kyle望過嚟，然後佢再望向褲袋。
 
於是我小心翼翼從褲袋中取出手機，放係櫃桶用。
 
「你係咪On 9 㗎？Heidi明顯玩鳩你！後日你死梗！」Kyle打。
 
「Why？」我問。
 
「Heidi姐屋企開拳館。」Sam秒回。
 
「比Heidi姐打下都好，我都因為你差啲要罰留堂。」Paul都上線。
 
「Pk…」我抱怨住打。
 
Kyle望向我個邊，用手劃過頸，加上兇狠既樣，令我覺得後日實有死冇生。